عم اوغلی محضرون درک ایلماق عین سعاتدور
منه جان اوسته تشریفون خدادن بیر عنایتدور
ایدوب یمن قدومون قلبدن خرسند زهرانی
بو احسانون بتوله منتهای لطف و رأفتدور
گل رخساروه اگلش تماشا ایلیوم بیرده
گلیله صحبت ایتماق، بلبله دیرینه عاتدور
طواف کعبه دن افضلدی طوف کعبۀ حسنون
اورک بو کعبیه هر لحظه مشتاق زیارتدور
وجودون علت غائیدی خلق کون و امکانه
رهین منت نفس نفیسون، نفس خلقتدور
ولایت چرخنه سن مهرسن، من بیر مه تابان
بو مهر و ماهه افلاکین مه و خورشیدی حسرتدور
زمین و آسمان و عرش و کرسی، ثابت و سیار
جلال و شوکتونله صاحب عز و جلالتدور
سنیله هر گونوم شاد و مسرت بخش اولوب، اما
منه هر ساعتیمدن خوشترین ساعت بو ساعتدور
سن ای شمع وفا، ایله نظر پروانۀ عشقه
بو زهرادور همان پروانۀ شمع محبتدور
دم جانبخش عیسی پرورونله دخت طاهایه
طبابت ایله، بیماروندی محتاج طبابتدور
سنی ملک ولایه بولمین والی، دانان حقّون
جزاده مستحق ناردور چون بی ولایتدور
ولی اللهدن ایتماق حمایت خلقه واجبدور
خدا فرمانیدور آیین و قانون شریعتدور
مباهات ایلرم سن تک امامه جان فدا ایتسم
سنه قربان ایدم مین جان، گنه بو جانه منّتدور
سنه الله ئوزی قیمت ویروب، قدرون بولر عالم
بیری گر بولمسه قدرون، ئوزی بی قدر و قیمتدور
عیاندی فاطمه بیر تار مویون عالمه ویرمز
منی بو امره وادار ایلین عشق ولایتدور
سنه لایق بولوب حق، مسند حق تکیه گاه اولسون
ولیکن حقّیوی غصب ایلین چوخ بی لیاقتدور
گورنده قدرت الله اللرین باغلی باخوب یاندیم
پوزان زهرانین احوالین او پوزقون وضع حالتدور
گیدنده مسجده، یوزده نقابی ایلدیم محکم
که بولسون اهل عالم، فاطمه تندیس عفتدور
بحمدالله من اولدوم بو سببدن لطفوه شامل
که قرب محضر شهده، نصیبیم بیله دولتدور
مبادا خاطرون رنجیده اولسون بیر وصیتدن
که مندن بیر اشارت مختصر سندن اجابتدور
ویروب تغسیلمی بیرده تدارک ایله بیر تابوت
گجیله قبرده دفن ائت، سنه هر چند زحمتدور
یاخوندور قابض الارواح مندن قبض روح ایتسون
حلال ائت حقوی زهرایه چون هنگام رحلتدور
بتوله یوخدی امکان بسترین ترک ایلسون هرگز
دوروب اگلشماقا یوخ طاقتی، سینه جراحتدور
گذشت ایله اگر بو حالیله من ایلورم صحبت
بله احوال، من تک همسره عالمجه خجلتدور
جزاده منتقم قهاره جور و ظلم دشمندن
شکایت ایلرم حق محضری، جای شکایتدور
کمان چرخ وارونی، خمیده قد ائدن غمدن
عم اوغلی زهرۀ زهراده کی بو قوس قامتدور
هامی درد و غمی نه من دیوم، نه سن سوال ایله
دیسم یتمز تمامه چون مُطوَّل بیر حکایتدور
قسم ئوز جانوه، جانیم عزیزی بو حسینیمدور
اونا خاطر نه یوز ویرسه بو خسته جانه منّتدور
ئوزون بو نکته دن آگاهسن ای خسرو آگاه
که بو کلثوم و زینب قلبیمه یارا و طاقتدور
بو گللردن حفاظت ایلدیم بیر باغبان مثلی
نه تک هر تک تکی بیر گلدی، گلدن با لطافتدور
بیری لاله، بیری سوسن، بیری یاس و بیری زنبق
گلستان بهشته هر بیری بیر طُرفه زینتدور
توجه ایتموشم اولسون اثر«صالح» یازان سوزده
بولورسن دخت طاها معطی نطق و فصاحتدور
- یکشنبه
- 14
- بهمن
- 1397
- ساعت
- 11:17
- نوشته شده توسط
- ابوالفضل عابدی پور
- شاعر:
-
صالح علی نژاد
ارسال دیدگاه