چاتدی عمروم منیم انتهایه
دورت بالام قویما گلسون نوایه
آخرین لحظه لردی عم اوغلی
لطف قیل سال باشیم اوسته سایه
آغلاما سینوی داغلاما چوخ
آیریلیق دردینین چاره سی یوخ
وار باشیندا حسینون بلاسی
غملی بیر ماجرا کربلاسی
گل حضورون اولا قانلی چولده
اول بتولون او دم هم نواسی
آغلاما سینوی داغلاما چوخ
آیریلیق دردینین چاره سی یوخ
ضد قرآنه مجلس قورولدی
فاطمه جور و ظلمه یورولدی
هانسی جرمه منیم بو زماندا
سیلی کین یوزومدن وورولدی
آغلاما سینوی داغلاما چوخ
آیریلیق دردینین چاره سی یوخ
یاندیم حقون آلاندا دایاندیم
سن یانان اودلارا منده یاندیم
بیعت اوسته قاپوم اودلاناندا
قانیمه اوز قاپومدا بویاندیم
آغلاما سینوی داغلاما چوخ
آیریلیق دردینین چاره سی یوخ
گلشنه صرصر ظلم اسدی
میخ درطاقت و صبری کسدی
باب وحی اود آلاندان مریضم
ایستورم قورتولام عمر بسدی
آغلاما سینوی داغلاما چوخ
آیریلیق دردینین چاره سی یوخ
ترک ایدور فاطمه بو جهانی
غسل و دفنین گجه ایت نهانی
قول سنوب سینمین یاره سی وار
قبریمه قوی یواش خسته جانی
آغلاما سینوی داغلاما چوخ
آیریلیق دردینین چاره سی یوخ
خالق هر دو عالم الهی
واردی بو«عدلینون» چوخ گناهی
قورخوری قبرین اوّل شبیندن
ایت عنایت او دم اول پناهی
آغلاما سینوی داغلاما چوخ
آیریلیق دردینین چاره سی یوخ
- سه شنبه
- 16
- بهمن
- 1397
- ساعت
- 10:59
- نوشته شده توسط
- ابوالفضل عابدی پور
- شاعر:
-
حاج اصغر فرشچی
ارسال دیدگاه