ای اوغولسوز امّ البنین آدی
غم قرینی بی غم گسار آنا
سن کیمی اوغول داغ دیده سی
حقّی وار اولا اشکبار آنا
حشره دین ایده آه و زار آنا
دلده کی یانان شعلۀ غمه
بیز گرک یانوب سینه داغلیاق
صبح زینبی تیره شام ایدن
غمده باشه گَل قاره باغلیاق
آغلا آغلاسان هر قدر بو گون
سنده منده عبّاسه آغلیاق
بلکه عمروموز تیز فنا اولا
دور ایدونجه بو روزگار آنا
هر قدر که تار حیاتینه
اوز وجودی بستِیدی بو جوان
گلستان آل پیمبره
اولمادی یته صرصر خزان
قویمادی جفا خاری جور ایده
بیر گله بو همّتلی باغبان
گلشن حیاتینده حیف اولا
تیز خزان اولوندی بهار آنا
هارداکی بو شهزاده ایستیوب
ایله سون منی محمله سوار
خم قیلاردی اوز سرو قدّینی
بدر ماه اولوردی هلال وار
کاروان عشقه غلام اوزون
فرض ایدردی یا بیر طلایه وار
ایله با وفا جان فشانه من
حیف اولانمادیم جان نثار آنا
عاقبت مکان اولدی بیزلره
وادی غم افزای کربلا
دم به دم منیم ناله مونسیم
اولدی همدمیم محنت و بلا
نوره ابر ظلمت محیط اولوب
عاشر محرّمده برملا
آیدا باتدی گونده اولوب منیم
روز روشنیم لیل تار آنا
اونداکی شهید اولدولار هامی
آل حیدره یتدی چوخ اَلم
شیر پنجه سی بنده بندیدی
قولّار اوسته چون شاخۀ قلم
خیمه لرده بیر پادشاهیدی
بیر وزیری اول صاحب علم
العطش دیردی خیامیده
هر نفسده خرد و کبار آنا
شدّت عطشدن بنات تک
جمع اولوبلا یکسر مخدّرات
ماه دوره سین هاله تک دوتوب
گوئیا جُدی فرض ایدوب بنات
عرض ایدوب سکینه عمو منه
سو تدارک ایت، ایله التفات
چون اوزی بُلوردی او بینوا
اود دوتوب سوسوزدان یانار آنا
تشنه لبلره سو گَتورماقا
اذن آلندی دربار شاهیدن
ماه هاشمی آفتاب تک
چخدی مشرق خیمه گاهیدن
سایه تک او دم گوندن آیریلوب
پادشاه عالم پناهیدن
رزمگاهه یوز قویدی گیتماقا
شیر شرزۀ جان شکار آنا
بیر ایله شجاعت نشان ویروب
لشکره او فرزند مرتضی
فرقۀ جفاکاره تنگ اولوب
برملا او وسعتله بیر فضا
اَللری کسیلمزدی مطلقا
یازماسِیدی گر منشی قضا
شیر پنجه سیز قالماقین یقین
ایلمز اوزی اختیار آنا
وارد اولدی نهر فراته تا
آچدی بیرق فتح پرچمین
مشکی دولدوروب چخدی نهریدن
نه یسار فکرینده نه یمین
بُلمدی که دست قضا ایدوب
مشک آبی بیر تیریله کمین
مشکه اوخ دگوب شربت حیات
اولدی چوخ اونا ناگوار آنا
دینه خدمتین مقتضی بُلوب
نفسینه او سردار باوفا
خدمتینده بیر جفت اَل ویروب
تاپسون اوز مقامینده ارتقا
دفتر شهادتده ثبت اولوب
اول مکین دیهیم ارتضی
بیر دَمیر عمودیله اولماقا
مُلک عشقیده تاجدار آنا
سن کیمی بیر اهل دل ایسترم
درد دل دیوب بی قرار ایدم
شعلۀ دل داغداریمی
آه سردیلن آشکار ایدم
قورخورام دیم دردیمی سنی
قبر ایوینده ده اشکبار ایدم
بیر بیر ایتدوقوم شرح حال ایچون
سندن ایلرم اعتذار آنا
کوفه ده او گون روز حشریدن
زینبه که اعلان اولونمادی
بیر جدا بویوندا دایاندی گون
حیف آی نمایان اولونمادی
احتراماً آلچیقلانوب قمر
اقترانه عنوان اولونمادی
قویمادی قیامت قیام ایده
ماه ایلدی استتار آنا
نار ظلمیلن گوردوم اودلانوب
یاندی خیمۀ طاهراتی من
ایلدوم شکایته زبانینه
قفل قید صبر و ثباتی من
یوخسا یاندیراردوم او حالیده
نه رواقیلن شش جهاتی من
شعلۀ غمه آه سردیلن
بی ثبات و بی اصطبار آنا
سعدین اوغلی گوردی که زینبه
غم گونونده غمخوار قالمادی
خیمه گاهه اود ووردولار یانوب
دار غمده دیّار قالمادی
یاندوروردی بیماریده گوره
بیر نفر هوادار قالمادی
تار عمریمی یاندورِیدی کاش
اوندا شعلۀ حرّ نار آنا
باشیما گَلن رنج و محنتین
شرحینه ویرم گر ادامه من
عُشر اولونجا اعشاریدن بیری
عمریمی یتورّم تمامه من
قالدی کوفه و کربلا غمی
ایمدی دور گیداخ سنله شامه من
محضر امامتده گور ندور
بزم شرب و نرد و قمار آنا
ای «یتیم» همواره چنگ وور
ذیل لطف باب الحوائجه
ایسته سن خدا تیز مرادیوی
حاصل ایلسون سالماسون گئجه
سنده اوز دلونجه آناسینا
عرض قیل صباح اولسا یا گئجه
ای اوغولسوز امّ البنین آدی
غم قرینی بی غم گسار آنا
- دوشنبه
- 22
- بهمن
- 1397
- ساعت
- 19:15
- نوشته شده توسط
- ابوالفضل عابدی پور
- شاعر:
-
مرحوم مولانا یتیم
ارسال دیدگاه