عارفا قدر بنی آدمی کیمدن سوروشوم
اورگیم یاره لیدی، مرهمی کیمدن سوروشوم
یاریمه چاتمور الیم همدمی کیمدن سوروشوم
یادگار نبی اکرمی کیمدن سوروشوم
آقامیز مهدی عیسی دمی کیمدن سوروشوم
ای هوادار علی گوزله عوام اولمیاسان
دلده شیعه، عملاً ضدّ امام اولمیاسان
پنج تندن ال اوزوب کفره غلام اولمیاسان
گونده بیر شاخه ده مرغ نچه بام اولمیاسان
طال اول علمه دئمه اعلمی کیمدن سوروشوم
ساده دانشجو گئدور مکّیه خیرالعمله
خصم تبلیغاتی قویمور گتوره فرصت اله
قورخورام بعضی سی شیعه گئده وهّابی گله
یالوارون اللها مهدی گله ایشلر دوزله
یوخ دوا درده، علاج غمی کیمدن سوروشوم
متنوّعدی بو خلقت هره نون بیر دیلی وار
موسوی تورات اوخور عیسوینون انجیلی وار
هر ائلون عارفی، دیوانه سی یا عاقلی وار
قورخما یاز شیعه لرینده بیر ابافاضلی وار
مدرکیم وار، سند محکمی کیمدن سوروشوم
ائله نفرین عربستان وهابی نَسَبه
یولّور اغیاری قالور قمدا بنام طلبه
عجمین سرّین ائدور فاش اؤ حیاسیز عربه
گوزله ئوز نقطه ی ضعفین دئمه هر بی ادبه
جلد محرمده بو نامحرمی کیمدن سوروشوم
دکتر فوق تخصّص تانورام اهل ولا
نسخه ایستر یازا بیماره، دییر یازهرا
بعضی نونده شرفی بسته دی عالمده پولا
قاریشوب بیربیره پیس یاخشی اماندی رفقا
گورسدون فرق یَمیلن، نَمی کیمدن سوروشوم
گرچه مهدی آقانی شیعه چیخوبدی ئوزونه
بیلورم گلسه دانیشسا چوخی باخماز سوزونه
عملون اولماسا گورسنمه امامین گوزونه
پرچمی آلتدا قوشول اون اوچولن اوچ یوزونه
سسلن عباسی دئمه پرچمی کیمدن سوروشوم
کیم عزیز عمرونی وئرسه هدره خوار ئوله جاخ
کیم علی حقّینه منکر اولا بی یار ئوله جاخ
دینینی کیم ساتا دیناره دل افکار ئوله جاخ
میلیادرده اولا واللهی بدهکار ئوله جاخ
فتنه ی جامعه ی درهمی کیمدن سوروشوم
نعمتِ عشقیدی قلبونده تولّای علی
تضمین ایلوب بو سوزی قانیله زهرای علی
قورخما ایمندی جهنّمدن احبّای علی
آپارار صدر بهشته سنی امضای علی
بودی رضوان، چمن خرّمی کیمدن سوروشوم
بیز که زهرایه شهادت دوتوروخ اوچ فقره
هانسی دوزدی نیه مین ایلدی دییلمور بشره
اعتمادیم نه مورّخلره وار نه خبره
قورخورام نشر اولا مطلب دوشه دینیم خطره
اهل منطق، خبر ماتمی کیمدن سوروشوم
اگمه باش هرکسه ای دل تانی عرفان قاپوسین
اوزلی سائللره تاپشور هامی اعیان قاپوسین
دوگمه بیگانه و بی مایه و نادان قاپوسین
باغلاماز مهدی زهرا بیزه احسان قاپوسین
اؤ اولان یردهر درِ حاتمی کیمدن سوروشوم
وحدتی حفظ ائله، حق رتبه بسیجه وئره جاق
اجر و مزدون هره نین ئوز عملیجه وئره جاق
صِله وی زینب و زهرا و خدیجه وئره جاق
قره گئی ، بو قره قبرونده نتیجه وئره جاق
بلّیدور یول ، دئمه پیچ و خمی کیمدن سوروشوم
خصم قرآندی اؤ که عترتیلن جنگه چیخار
متکبّرلرین ئوز قلبینی ئوز کِبری یخار
ئولسون اونلار که بنی هاشم آدیندان داریخار
بیزه هرکس ورا طعنه ائوین عباس یخار
گورموشم چوخ داغیلان مخیمی،کیمدن سوروشوم
ئول اگر نخوت آتیندان اشاقا انمه موسن
گول اگر طعنه وروبلار ولی دیللنمه موسن
عمرووین ارزشی یوخ گر ادب ئورگنمه موسن
دیلیوی کسدیر اگر یاعلی سسلنمه موسن
حیدر آواره سیم چاره می کیمدن سوروشوم
جان وئرن وقته نبی کلّ رسل دلبندی
ایستدی لوح و قلم تا یازا حق کیملندی
مانع اولدی اؤ کی سیلی وران اهریمندی
مرتضائیله اؤ ظالم نقدر دشمندی
یاندیروب قلب شه اعظمی کیمدن سوروشوم
آتمیش اوچ ایل علی عمر ایلدی یتمیش نچه جنگ
سیندیرا بیلمدی وقرین نه خوارج نه فرنگ
بیلمورم نیلدی زهرایه غم کوچه ی تنگ
غسل ائدن وقته نه گوردی رُخ آئینه ده زنگ
دئدی اسما بو غم مبهمی کیمدن سوروشوم
سو توک اسما اورگیم یاندی دانیشدیرما منی
قویما بو صحنه نی گورسونله حسین و حسنی
منیم عذریم وار آچا بیلمیورم چوخ محنی
سن دئنن قمچی لر ئولدوردی جوان فاطمه نی
کیم یخوب قلعه ی مستحکمی کیمدن سوروشوم
بویودی فرقی سنیلن اؤ بیری خادمه نین
فضّه مأموریدی دوتسون قولونی فاطمه نین
سنده یار اول منه، ساخلا قدمین قائمه نین
سارالیب گور نجه رنگی یارالی نائمه نین
بو گول اوسته دوزولن شبنمی کیمدن سوروشوم
الله الله بو منی درده سالان فاطمه دی
منه خاطر ایاق آلتیندا قالان فاطمه دی
اوت ایچینده منی اللردن آلان فاطمه دی
بو جوانلیقدا الهی قوجالان فاطمه دی
آی باتوب راز شب مُظلمی کیمدن سوروشوم
آب غسلیله گوزوم یاشی دوچندان توکولور
وای منه باشیمه خاکستر هجران توکولور
سینه گنجینه سی سینمیش یره مرجان توکولور
میخ در نیلیوب الله یارادان قان توکولور
دئمه میشدی منه، بیش و کمی کیمدن سوروشوم
کیملری آفاقا چکدون یاناسان آی دنیا
اوجانی آلچاقا چکدون یاناسان آی دنیا
یاریمی تپراقا چکدون یاناسان آی دنیا
قلبیمی یانماقا چکدون یاناسان آی دنیا
دوشدی الدن اوزوگوم خاتمی کیمدن سوروشوم
- سه شنبه
- 23
- بهمن
- 1397
- ساعت
- 10:52
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه