دوتور گوگول قوشی سنسیز بهانه عباسیم
دونوبدی گلشن صبریم خزانه عباسیم
سؤنوب چراغ امیدیم آییم باتوب نیلیم
ملالیلن باخورام آسمانه عباسیم
اوغولسوز اولماقیمی ایندیده اینانمیورام
حزین نوا ائدورم مخفیانه عباسیم
مدینه اهلی بالام جانی دای گلوبدی دیله
ز بسکه آغلیورام یانه یانه عباسیم
یاتانمورام گجه لر هر نقدری سعی ائدورم
اویاق قالوب گلورم من فغانه عباسیم
گئدوب اطاقوه سجاده وی قوجاقلیورام
امیدیلن تیکورم گوز اذانه عباسیم
کی بلکه وقت نماز ئوز اطاقوه گله سن
عبادت ایلیه سن عارفانه عباسیم
او حالدا منده دویونجان باخام گوزل گوزوه
همان گوزی که باتوب لخته قانه عباسیم
کتاب عشقه اوغول گل ویراق دوباره ورق
مرور ائدک اونی بیز محرمانه عباسیم
او گونکی قافله ی غم گئدوردی یثربدن
یاناردی قلبیم او کوچ نهانه عباسیم
خدا بیلور کی نجه سعی ائدردیم آغلامیام
عذاره اولمیا اشکیم روانه عباسیم
وقاریلن دایانوب ایله دیم سیزیله وداع
دئدیم گرک کی دؤزم امتحانه عباسیم
ئوزوم مدینه ده قالدیم اگرچه ظاهرده
عزیمت ائتمدیم آیری مکانه عباسیم
ولیک سن کیمی روحیم قوشولدی باطنده
گئجیله عازم اولان کاروانه عباسیم
مین آرزوئیله هرگون گوزتلدیم یولوی
قییتمدون نیه سن آشیانه عباسیم
کوسوبسن اولمیا مندن کی آیریلیق وقتی
سنی قوجاقلامادیم عاشقانه عباسیم
قسم او سوز عطشدن یانان دوداقلاروا
واریم دلیل بو سرّ نهانه عباسیم
ننه لیک ایلمه دیم چون حسین ننه سیزیدی
بو دردی ایله دیم الده بهانه عباسیم
کئچن کئچوب قره گونلر فقط قالوبدی منه
بوکوبدی قدیمی جبر زمانه عباسیم
هایانداسان گوزلیم ای جمالی آی پاراسی
قالوبدی اللری قوینوندا دورت اوغول آناسی
خوشا سعادتوه کاموه چاتوبسان اوغول
دیولّه خیرداجا بیر قبریده یاتوبسان اوغول
چتین گونومدی منیم دلده سوز و سازیم وار
آماندی گل آی اباالفضل سنه نیازیم وار
خوشام طریق محبتده سینه داغلاماقا
بهانه آختاریرام بیر دویونجان آغلاماقا
نوالی نی کیمی دائم نوائیلن گزورم
ائله قوجالمیشام اوغلوم عصائیلن گزورم
بلالی دشتیده تاپدی اثر منیم عملیم
گرک حسینچی اولیدون جهاندا سن گوزلیم
سینمده من سَنَد عشقی چونکی بسلمیشم
وئرنده صود سنه اولده یاحسین دئمیشم
ئولونجه فخر ائدرم من وجود اطهروه
سلام او علقمون اوسته کسیلمیش اللروه
اوتوز بش ایل سَنیدون عمرومون صفاسی اوغول
بلایه سالدی منی باشیوین یاراسی اوغول
نجه یارا کی بویاندیردی قانه ماه تِلین
همان او یاره دیوللر حسینون اگدی بئلین
نجه یارا کی یئریندن گلاب غم چیخدی
نجه یارا که سوسوز قیزلارین ائوین یخدی
ولی مصیبت اعظم بو غملی مطلبدی
بو مطلبی که اونون نوحه خوانی زینبدی
دئیور جفانی قوتاردی جهاندا قوم عنود
آچیق باشی ننه بیر حاله سالدی آهن عمود
ئورکده مشعل آمالی یاندیرانمادیلار
او باشی شامه کیمین نیزیه ویرانمادیلار
بو نوحه«قاسمی»ایلر نوالی مهر و مهی
سلام او باشه عمود آلتدا سیندی سجده گهی
- سه شنبه
- 30
- بهمن
- 1397
- ساعت
- 13:59
- نوشته شده توسط
- ابوالفضل عابدی پور
- شاعر:
-
بهزاد قاسمی اردبیلی
ارسال دیدگاه