ای عشقین اولان خبره خریداری اباالفضل
عاشقلریوون گرمیدی بازاری اباالفضل
گلزار وفانون گلِ بی خاری سن اولدون
مردانه لیگون ارزش و معیاری سن اولدون
قارداشیوون عالمده علمداری سن اولدون
پاینده اولوب عشقیده سن عزّت آپاردون
حشره کیمی دنیاده اوغول رحمت آپاردون
حیران قالوب عالم بئله دلداده لیک اولماز
قولسوز بو قدر همّت و آزاده لیک اولماز
یا اوج شهادتده بو افتاده لیک اولماز
سن مقتلی دوندردون اوغول بزم نگاره
تقدیم ائلدون وار یوخووی محضر یاره
فخریم بودی عشق عالمی اعجاز ایلیوبسن
بیکس آنووی یاخشی سرافراز ایلیوبسن
یاره گوره سن جنَّتَه دَه ناز ایلیوبسن
روشن ایلیر پرتو عشق ، دیر و کنشتی
دلبر هارا قویسا قدمین یاره بهشتی
اورگتدیم اَوَلدن سنه من رسم وفانی
پیشواز ائده سن یاره گوره درد و بلانی
آباد ائده سن بیر گون اوغول کرب و بلانی
شایسته لیگون جنگیده الحق گوزل اولدی
دلشادم آدون عشقیده ضرب المثل اولدی
سن عرصۀ میدانیده بیر شیر نریدون
دشمنده بیلوردی نجه شوریده سریدون
زهرانون عزیز اوغلونا سن بال و پریدون
سنسیز او وفادارون ابوالفضل ائلی سیندی
آلجاق سَسیوی خیمه سراده بئلی سیندی
سن عهد ائلیوب جانیوی جانانه وئروبسن
ئوز وار یوخووی عشقیده مستانه وئروبسن
بیر گوز ایکی قول جنگیده مردانه وئروبسن
ای کان وفا عشقیوه ایثاریوه قربان
سو اوسته دوشن ظلمیله قوللاریوه قربان
قوی سینه مه هر نسگلون عالمده داغ اولسون
جنتده یرون لاله لی ریحانلی باغ اولسون
من راضیم اوغلوم یوزون عالمده آغ اولسون
ائتدون اورگی قورخولی قیزلاری او گون شاد
قارداشیوی تک قویمادون احسن ائوون آباد
زینب یغور هر گون بیر ائوه آل عبانی
بر پا ایلیور حسرتیله بزم عزانی
تشریح ایلیور واقعۀ کرب و بلانی
تصویره چکور ظلم و جنایات یزیدی
محکوم ایلیور حاکم بی دین و پلیدی
گاهی دیور ای پیکری عریان باجون ئولسون
یورقون یارالی لبلری عطشان باجون ئولسون
مردانه سو اوستونده وئرن جان باجون ئولسون
عشقون هوسه موجلی دریانی گتیردی
ال باشدا ننم حضرت زهرانی گتیردی
خون دلی رخساره اَلَر دمبدم آغلار
هر دم دیر ای قوللاری تندن قلم آغلار
اوغلوندا آلار چیگنینه مشگ و علم آغلار
قلبیم آلیشور زینب زارون بو سوزوندن
اوخ دگدی دیور آی ننه میداندا گوزوندن
چوخ یاد ایلیور آدیوی ئوز اوخشاماسیندا
هی رمز و اشاریله دیور سوز آراسیندا
سالم یری قالمیشدی خدایا هاراسیندا
حشره کیمی زینب ئورگین داغلادی قبری
صد حیف او اوجا قامته چوخ خردادی قبری
- سه شنبه
- 30
- بهمن
- 1397
- ساعت
- 14:3
- نوشته شده توسط
- ابوالفضل عابدی پور
- شاعر:
-
حاج فرهاد فکری اردبیلی
ارسال دیدگاه