خیالیمه سالارام عون و جعفر و فضلی
ئولونجه اوخشیارام شیردل اباالفضلی
باشینون اوسته ئولن وقته اولمادیم نیلوم
آچوب بو زلف پریشانی یولمادیم نیلوم
اگر اولیدیم او چولده قیامت ایلردیم
بالاما دشت بلاده حمایت ایلردیم
نقدر ائدیدوم اگر آه و ناله دویمازدیم
کسیلن اللرینی توپراق اوسته قویمازدیم
همان او قوللاری جان تک سینمده ساخلاردیم
گلینجه قارداشی داده اؤپردیم آغلاردیم
حسینیمه او کسوک اللری وئرردوم ئوزوم
دیردوم آل بولاری ساخلا یوخدی منده دوزوم
فغان و آهیمیلن کائناتی داغلاردیم
حسین دینده بئلیم سندی منده آغلاردیم
قولاق وئرردیم اونون دقّتیله نوحه سینه
سسیمی منده قوشاردوم حسینیمون سسینه
دینده آچ گوزون عبّاس نور عینیم وای
دیردوم اوندا یقین منده وای حسینیم وای
او باشی اوسته نوا ایلینده آغلاردیم
ایاق طرفده ده من چکمه سین قوجاقلاردیم
یارالی سینه سی اوستن چکنده پیکانی
تزلزله گتورنده او دشت و صحرانی
دیردوم آغلا بالا اوخلارا ال آتما حسین
یاتوبدی نازیله عبّاسیمی اویاتما حسین
چتین اولوب سنه گر چه بو نوعی یانما بالا
باشینون اوسته اباالفضلیمون یوبانما بالا
سن آغلاسون غمیوه کوفیان ائدلَّه طرب
گئدک خیامه منیلن گوزتلیور زینب
- سه شنبه
- 30
- بهمن
- 1397
- ساعت
- 17:41
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه