فخر نسوان بنی هاشم و اولاد خلیل
شامل موهبت حضرت خلّاق جلیل
نفسینون عزتی عالی، نسبی پاک و اصیل
فاطمه آدلی علینون حرم و هم نفسی
لقبی امّ بنین یعنی اوغوللار ننه سی
دهریده بو خانمون اوخشاری گلمور نظره
کیمدی دامانیده دورت شیر شجاعت بجره
عمرونون زحمتینی قویمادی گئتسون هدره
چیخدی دنیای فنائیله عجب کشمکشه
وئردی غیرت صودونی ساقی دشت عطشه
دامنیندن یتیشوب کرب و بلایه برکات
فدیه گاه حقه بو مادر علّیّه صفات
دورت فدا یوللادی بیردن ائلدی هاجری مات
آنالار ایچره مگر امّ بنینون تایی وار
او مناده خانمون هامّیدان آرتیق پایی وار
حیف اولا چرخ دنی ایلدی اعدایه کمک
گوهر صبرینه دنیا نجه گور ویردی محک
آلدی دورت اوغلون الیندن ائوینی یخدی فلک
بیر گونه قالدی ئولن وقتیده یالقوز گئتدی
بو اوغوللار ننه سی قبره اوغولسوز گئتدی
گویلوم ایستور گینه غم مطلبی عنوان اولونا
جان وئرن لحظه باخوردی نگران صاق صولونا
گوزونی تیکمیشیدی کرب و بلانون یولونا
مایلیدی ئورگی بیلمگه وصلت دادینی
دیلده ازبر ائلمیشدی فقط عباس آدینی
سسلنوردی ئولورم آی اوجا بویلی بالا گل
هارداسان پیک اجل جانیمی ایستور آلا گل
آنوون قویما آچیق گوزلری یولدا قالا گل
تئز یتیش باشیمون اوسته یره سالما سوزومی
ئوزگه لر قویما منیم باغلیا آغلار گوزومی
معجریم قاره یازیم قاره گونوم قاره دی گل
قفس سینه ده روحیم قوشی آواره دی گل
چاره سیز دردیمه بیر یول باخیشون چاره دی گل
کیم قالوب من کیمی ئوز گوردوگی گوندن دالیا
یالواروب هانسی ننه من تک ئولنده بالیا
آی او سقا کی گوزوندن آپاروب اوخ ایشیقی
آغلاماقدان آزالوبدی گوزومون چوخ ایشیقی
گل قراسی آغاران گوزلریمون یوخ ایشیقی
ولی کچسون قاپیدان منزله بیلّم والله
آلجاقین عطروی ئولسمده دیریلّم والله
ای علمدار غیور سپه سرور دین
صبحی جاهد گجه نی زاهد سجاده نشین
گل وئرور جان غربا مثلی ننون امّ بنین
اجلین سایه سینی ایلورم احساس ئولورم
گوزی یولدا منی چوخ ساخلاما عباس ئولورم
ننه وای نالوه حسرتده قالوبدی قولاقیم
یوزومی تَر بوریوبدی سوییوب ال ایاقیم
جان وئرن لر کیمی گرچه قوریوب دیل دوداقیم
ولی اصغر جانی اصلا هوسیم یوخدی سوا
گویلوم ایستور سنی تئز گل ننه قربان بویوا
آند وئرّم سنی عباس، خجالت جانوا
آند وئرّم سویون اوستونده توکولموش قانوا
گل بو آخر نفسیمده بالا باش چک آنوا
رشته الفتووی غملی ننوندن قیرما
دوره مه چوخ یغیشان واردی منی سیندیرما
گلمسون قاره می اگنیمدن اوغول کیم سویاجاق
گلمسون سویله گوروم کیم منی قبره قویاجاق
گلمسون ئوزگه منه آغلاسادا تئز دویاجاق
گل اوتور باشیمون اوستونده ئورک داغلا منه
چون یاد آغلار یالان آغلار گل ئوزون آغلا منه
من سنه چوخ گجه لر یاتمامیشام آغلامیشام
قلبیدن نسگلوی آتمامیشام آغلامیشام
من سنی ئوزگه لره قاتمامیشام آغلامیشام
گویلومون ایندی هواسی دوتولوب صاف دگول
گلمسون آغلاماسون سن منه انصاف دگول
چوخ سیخوب سینمی اوغلوم غم غربت گجه لر
چکمیشم هی او کچن گونلره حسرت گجه لر
یوخوسوز قالماق اولوبدور منه عادت گجه لر
اوتوروب گاهی قرانلوقدا اوغول وای دئمیشم
گه ربابه قوشولوب اصغره لای لای دئمیشم
من ئولن لحظه حسین قلبی شکسته گله جک
چون امامیمدی او سلطان خجسته گله جک
باشی دالدان کسیلن باشیمون اوسته گله جک
قورخورام نور دوعینیم گله ،سن گلمیه سن
قورخورام آخرحسینیم گله،سن گلمیه سن
گل داخی کهنه یارام اوستونی چوخ آچما بالا
منتظر قلبیمه حسرت اوخونی ساچما بالا
چوخ اوتانما گوز ائویندن بو قدر قاچما بالا
آنوون سینه سینه اوخ ساچوسان گلمورسن
آی حیالی بالا کیمدن قاچوسان گلمورسن
آگهم نیسگلوه قلبوون اودلی سوزونه
اوتانورسان باخاسان خیردا اوشاقلار یوزونه
گل گوزون دوشمیه جک غملی ربابین گوزونه
فانی دنیا ائلیوبدی ننوی خانه خراب
بالا چوخداندی ئولوبدی ئورگی داغلی رباب
او قدر صورتینه سیل سرشکین اله دی
قانلی قنداقی قویوب بوش بشیگه سیلکله دی
بالاسی اوخلانان آهو کیمی دائم مله دی
عاقبت عشقینی دنیایه نشان وئردی رباب
باسدی قانلی بلگی باغرینا جان وئردی رباب
- سه شنبه
- 30
- بهمن
- 1397
- ساعت
- 18:10
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه