برهم آنوین اولدی تفاقی گوزل اوغلوم
سنسیزائویمون سوندی چراغی گوزل اوغلوم
قان آغلادیم ازبس گوزومون نوری اولوب کم
گل گور منی نه حاله سالوب غصه و ماتم
عمروم قوتارور باش آغاروب قدیم اولوب خم
هجران اوخی دنیاده دل زاری بولوبدی
هانسی ننه نون من کیمی دورت اوغلی ئولوبدی
گه فکره گئدوب گاهی الی سینه ده قاللام
عزتله گچن گونلریمی یادیمه ساللام
باخدوقجا اوغول هرطرفه عطروی آللام
گه عونی گهی جعفری گه فضلی چاغیرّام
قلبیم داریخان وقته ابوالفضلی چاغیرّام
گوز یولدا قالار غملی ننه آخشام اولاندا
دلخوشدی اوغول آدینه صبح و شام اولاندا
گوزلر گله بایراملیقی هر بایرام اولاندا
ایستر گونوزوم شام سیاهه دونه اوغلوم
بایرام گونی گل قویما چراغیم سونه اوغلوم
گوندوزلری آهیله آنون عالمی داغلار
خون جگری سیل کیمین صورته باغلار
اوغلون گجه لر بوش یروه هی باخار آغلار
دردین بو بالا آیری غمه قاتماز ابوالفضل
من تک گجه لر صبحه کیمین یاتماز ابوالفضل
سن تک ادبون درسینی یاخشی بیلر اوغلون
هردم منی گورجک گوزینی تز سیلر اوغلون
آغلار تک اولاندا منی گورجک گولر اوغلون
بیلّم که بو احوالیده اوغلون منی گوزلر
صبحه کیمی آغلار گوزی اما سنی گوزلر
عالم بَیَنوب سن ائدن ایثار و گذشتی
دوندردی قانون گلشن و گلزاره او دشتی
بیر یر که حسین دفن اولا واللهی بهشتدی
ایسته منی زوار ائلسون حق او دیاره
ای کاش الیم چاتسون او ششگوشه مزاره
اورگتدیم اوغول من که سنه رسم وفانی
تک قویمیاسان دهریده شاه شهدانی
اخلاصیله تقدیم ائده سن قارداشا جانی
بیر گوز ایکی قولدان کئچ اول راه وفاده
وور پرچم قرآنی اوغول کرب و بلاده
دین پرچمی سایونده فرات اوسته اسردی
بند دل دشمنلری میداندا کسردی
اعدا گوزونه هیبتون اوخ مثلی دیَردی
تا سن واریدون غم اثر ائتمزدی حسینه
هئچ کیم دولانوب چپ باخا بیلمزدی حسینه
تا سن واریدون یاتمازیدی آل امیّه
اهل حرمه ایلدون آسایشی هدیه
راحت گجه لر یاتدی پناهونده رقیه
گاهی سنه گه اکبرینه ناز ائلیردی
لایلای گجه لر اصغره شوقیله دیردی
تا سن واریدون چوخ چوخیدی عشقوه میلی
بیر کیمسه ورانمازدی او شیرین دیله سیلی
زهرا کیمی اولمازدی اونوندا یوزی نیلی
نه کیمسه او جیرانه بلا دامی قوراردی
نه کیمسه اونون قولّارینا قمچی وراردی
تا سن واریدون خیمه ده قیزلار دولاناردی
تازه گلینون خیمه سینون شمعی یاناردی
هر محنت و اندوهی او قیز سهل ساناردی
کیمده واریدی جرأت اونا سوز دیه اوغلوم
مجلسده دوروب شامی کنیز ایستیه اوغلوم
تا سن واریدون ائتمدی زینب غمی احساس
خندانیدی لعل لبی چون غنچه گل یاس
سسلردی دوشن وقتیده هر مشگله عباس
نه باشدا دوشردی خطره معجری اوغلوم
نه قانه باتاردی باجوین اللری اوغلوم
اولموشدی اگرچه هامیا شهرتی بلّی
اولمازدی گورن وقته سنی غصه لی غملی
ورمازدی اونا دیل یاراسی کوفه نون اهلی
گوزیاشلی قولی باغلی گلوبدی هارا زینب
قویمازدون اقلاً ائله باشین یارا زینب
«فرهاد» وئر عباسی قسم امّ بنینه
عشقی بیلوسن چوخدی او بی یار ومعینه
آچسون گره کاروی مولا ئوز الینه
ایستر آناسین چونکه او سردار لب عطشان
ایلر آنانون خاطرینه دردوه درمان
- سه شنبه
- 30
- بهمن
- 1397
- ساعت
- 18:47
- نوشته شده توسط
- ابوالفضل عابدی پور
- شاعر:
-
حاج فرهاد فکری اردبیلی
ارسال دیدگاه