او گونکی حق اراده ی نزول رحمت ایلدی
وجود آل احمدی صفای خلقت ایلدی
باخوبدی عرش داوره یاراندی چون ابوالبشر
گوروبدی اول مقامیده وار آیری خلقیدن اثر
بشردی ظاهرا اولار اولوبلا گویده جلوه گر
او جلوه نی ابوالبشر گورنده حیرت ایلدی
دئدی الهی کیمدیلر چاتوبلا قرب اقدسه
رکوع ائدوله یا سجود او ساحت مقدسه
جواب گلدی خالقین نیازی یوخدی بیر کسه
ولی سنون وجودیوه بو جمعی علت ایلدی
محمدیله فاطمه علیدی اوغلیدور حسن
بئشیمجی نوریدور حسین صفای عرش ذوالمنن
تمام آفرینشه دلیلدور بو پنج تن
سن آدم اولموسان اگر ، بولار کرامت ایلدی
بویوردی خاتم رسل خدیو کل ماسوا
که عالمین تمامینی یاراتدی نوریدن خدا
عنایتیله گویلره او نوریدن وئروب ضیا
او نوریله خلایقه نثار رحمت ایلدی
بولوندی ثلث قسمته اونور علم کبریا
منم ،علیدی،فاطمه،او نوریدن اولان جدا
بیزیم وجودیمیز وئروب تمام عالمه بقا
بو عزتی خدا ئوزی بیزه عنایت ایلدی ( 1 )
اگرچه بیردی یکسره مقام پنج تن ولی
مُقَدَّم اولدی فاطمه قفاده احمد وعلی
اولار یوخیدی فاطمه واریدی عرش مشعلی
او نوریلن خلایقی خدا هدایت ایلدی
مقام کفو حیدری ائدیم نه نوعیلن رقم
مگر توانی وار یازا مقام اطهرین قلم؟
فقط بوقدری بیلمیشم ووروبدی گویده بیرعلم
او پرچم محبتی ملک زیارت ایلدی
جلالینه جانیم فدا که جان جاندی فاطمه
بیان وشرحی نیلیور ئوزی عیاندی فاطمه
خُم محبت آختاران مِیِ مغاندی فاطمه
نه خُم نه مِی اونونکیدور گوزون نه رویت ایلدی
او وقت اولوب که فاطمه قدم قویا بو عالمه
خدیجه گوردی تک قالوب دوشوبدی قلبیدن غمه
چتین زماندا حامله، نیازی واردی همدمه
قریشه بو سفارشی به قصد دعوت ایلدی
یولا دوشوبدی قاصد خدیجه دلده آهیله
بو قصدیله قریشدن گتیردی بلکه قابله
یتوبدی تا قبیله ی قریش اولان منازله
خانملارا خدیجه نین سوزون قرائت ایلدی
جواب وئردیلر اونا وار ائلده آیری مسئله
خدیجه اوز اوزین سالوب بو وصلتیله مشکله
دئنن اودم که وئرموسن محمدیله ال اله
قبیله ترک ائدوب سنی قرین محنت ایلدی
خدیجه بیلدی الغرض خطرده یوخدی یاوری
او وقت اولوب کنار ائده صدفدن عالی گوهری
دئدی خدا کمک لیگ ائت یوخومدی یار دیگری
همیشه رحمتون سنون منه کفایت ایلدی
ائشیتدی اوندا بیر سسی داریخما من وارام آنا
دانیش منیله قویما تا اورکده سوزلرون قالا
گل ایندی صحبت ایلیک انیس اولاق آنا بالا
خدای لم یزل منی سنه عنایت ایلدی
خدیجه بیلدی بطنیده اوشاقی صحبت ایلیور
تفضلات غیبدن او سس حکایت ایلیور
او حالدا استقامته آنانی دعوت ایلیور
سپاس ائدوبدی خالقه که بذل نعمت ایلدی
بو شرح حالیلن خانم قدم قویوبدی عالمه
یتشدی کوثرین ئوزی دیار چاه زمزمه
نه کوثر ونه زمزمه که بنزیور جوشان یمه
عنایت خدائیله جوشوب قیامت ایلدی
سالوب خیالیمه منیم بو سوز بیر آیری منظره
انیس اولوب بو شرحیلن آقام حسینده مادره
او کس که عزت و شرف وئروبدی شرع انوره
تولدی یتیشمَه میش آنِیله صحبت ایلدی
اناالغریب سویلدی گهی غریب کربلا
گهی دئیردی العطش شهید دشت نینوا
بو سوزلری دین زمان خانم دئیردی جان بالا
بوغملی سوزلرون منی دچار محنت ایلدی
بو سرّی فاطمه دیوب رسول حی داوره
نمای دشت کربلا عیان اولوب او سروره
دولوبدی گوزلری باخوب او بانوی مطهره
بویوردی گل قیزیم دیوم خدا نه قسمت ایلدی
اوگون که نینوایه یول بو طفل خوش سخن سالار
کسلله تشنه باشینی خیامینی عدو آلار
سویالا قانلی پیکرین یئر اوسته بیکفن قالار
گلر قباقه اول زمان ندن که صحبت ایلدی
آتا بویوردی سوزلرین بالا حسینه آغلادی
سالوبدی یاده محنتین یوزه سرشکی باغلادی
فراق اودوندا فاطمه یانوبدی سینه داغلادی
باخوب رسول حق ئوزی او حاله رقت ایلدی
دولاندی چرخ فتنه گر یتشدی موسم عزا
حسین یخلدی مقتله اورک یارا کورک یارا
بهشتیدن چوخور یره گلوبدی خیرة النّسا
گوروبدی قانلی پیکری نوای حسرت ایلدی
دئدی نه یاتموسان بالا گلوب جوان ئولن ننون
خدنگ کینه قلبینی جفائیله بولن ننون
الی سینیق قابیرقادا چوخور یره گلن ننون
سنون بو حالتون منی دچار محنت ایلدی
ــــــــــــــــــــــــــــ
( 1 ) منبع :کتاب فاطمه حلقه ی اتصال امامت و رسالت نوشته آیت اله وحید خراسانی برداشت شده است.( نوشتند تمام جهان ازنور علم خدا آفریده شده است نور علم کبریا به سه قسمت تقسیم شد و محمد و علی و فاطمه به وجود آمد که در حقیقت نور واحد هستند )
- چهارشنبه
- 1
- اسفند
- 1397
- ساعت
- 11:7
- نوشته شده توسط
- ابوالفضل عابدی پور
- شاعر:
-
حاج داود بیدق داری
ارسال دیدگاه