ولایت چرخینه گلدی بیر اولدوز
نه اولدوز آفتاب عالم افروز
بو بیر اختردی هر بیر اختره باش
سالار آردینجا مهرو ماهی بیر باش
بو بیر اختردی حیرانی فلکدی
بونون نازین چکن حورو ملکدی
بو بیراختردی حسنی بی بدلدی
گوزللربزمینه ضرب المثلدی
بو بیر اختردی برج نه طبقدن
آلار تاب و توانی مهرو مه دن
تمام نجمدن تابنده دور بو
ولایت چرخنینه زیبنده دور بو
نه مریخ و زحل نه زهره دور بو
هر ایکی عالم ایچره شهره دور بو
بونون نوری همان نور ازلدی
هر اولدوزدان بو آیدیندی گوزلدی
دیدیم اولدوز بو تشبیه غلطدی
بو نور پاک اجداد سلفدی
چخار آخشام سحر ایتمز هر اولدوز
بونون آخماقی تک اولماز جگر سوز
دیسم گلدی آچار اما سولار گل
بولاردان عطر آلار گل تا اولا گل
بو نه گلدی نه اولدوزدی نه ایدی
عروس حضرت زهرایه پایدی
بونون حسنی یقین گلمز حسابه
مدال فخردی الحق ربابه
آدی اصغردی اما شانی اکبر
خانم زهرایه بیر ایستکلی دلبر
آدی اصغردی اجلالی رفیعدور
شفیع ابن الشفیع ابن شفیعیدور
آدی اصغردی پیر عشقدور بو
هامی عشق اهلینه سر مشقدور بو
گوزل بیر غنچه دور باغ ولاده
که یوخدی مثلی بو ارض و سماده
بونون عطری هامی باشدان آلار هوش
ایدرعاقلری سر مست و مدهوش
معطرعالمی ایلر گلابی
هامی دلدن آلار بو صبر و تابی
سولاربو غنچه وقتی گل یانیندا
اولار پرپر غم و غصه باغیندا
اولار نسگل لری باش هر محندن
آلار صبر دلی شاه زمندن
سالار بیر اوخ بونی دلدن او چولده
آلار گل رنگینی گلدن او چولده
قلم #غمخوار تک یانما آلیشما
ولادتده شهادتدن دانشما
دایان سائل کیمی آل عیدیانه
گلر بیرگون یازار سان یانه یانه
سگ گمنام دربارم علی جان
سیزه قیرخ یئلدی پرگارم علی جان
مریض عشقیوه بو دم دوا ویر
منه ایوبیله بیر کربلا ویر
ویروب #غخمواره خلاقی قریحه
یازوبدور چوخ گوزل شعر مدیحه
ایدوب ملحق یازوب «صدری» نالان
اولا بیر مور تک پیش سلیمان
بو بیر اختردی شانی بی قرینه
سالوب نوری ضیا روی زمینه
- چهارشنبه
- 15
- اسفند
- 1397
- ساعت
- 13:47
- نوشته شده توسط
- ابوالفضل عابدی پور
- شاعر:
-
حاج اسماعیل فرشی
ارسال دیدگاه