ای اولان حجّتِ حقِ باهر!
یا امامِ مُحَمَّدِ باقر!
گول جمالونده نورِحق ظاهر
یا امامِ مُحَمَّدِ باقر!
رجبین اوّلینده اولدوق شاد
چوخ گوزل گوندی بو گوزل میلاد
سؤیله‌روق بیربیره مبارک‌باد
بیزی شاد ائتدی خالق قادر
یا امامِ مُحَمَّدِ باقر!
ای اولان لطفی دهریده اکسیر!
فضل و شأن و جلالی عالمگیر
نفسین‌ده یقین اولار تأثیر
دئسه هر نوحه‌خوان و هر شاعر
یا امامِ مُحَمَّدِ باقر!
وارث علم مصطفی سن‌سن
زاده‌ی شاه لافتی سن‌سن
عالَم علمه مقتدا سن‌سن
سن‌سن علمیه پَر ووران طائر
یا امامِ مُحَمَّدِ باقر!
ای اولان اهل عشقه سرمایه!
آند اولا روح پاک زهرایه
وئرمروق آدیوی بو دنیایه
سن‌سن علم پیمبره ناشر
یا امامِ مُحَمَّدِ باقر!
یوزو گولدو یئنه بو دنیانین
شاد اولوب قلبی اهل ایمانین
من فدا شأنیوه کی، طاهانین
سنه گئتدی سلامی‌نی جابر
یا امامِ مُحَمَّدِ باقر!
ای امام حسن، حسین، نوه‌سی!
جذب ائدن دیل‌لری یاتیم‌لی سسی!
ایکی عالمده شیعه دادرسی
سن‌سن ای یار طیّب و طاهر
یا امامِ مُحَمَّدِ باقر!
آدون آیینه‌ی حقیقتدی
عشقون عشّاقه جاه و عزّتدی
قبر پاکون بقیعه زینتدی
کاش اولاق قبر پاکیوه زائر
یا امامِ مُحَمَّدِ باقر!
سن‌سن اَسرار خلقته مَحرم
دییر عشقیله اهل دیل هر دم
سن گلوبسن، اودور، گئدوبدور غم
اولموشوق دیلدن آللّها شاکر
یا امامِ مُحَمَّدِ باقر!
- پنج شنبه
- 16
- اسفند
- 1397
- ساعت
- 13:0
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه