• جمعه 10 فروردین 03


متن شعر ترکی لای لای ای جبهه لرین یورقونی ... -(وار سوزوم باشلیورام ایللر ایچون یاشلی گوزیله)

2814
5

وار سوزوم باشلیورام ایللر ایچون یاشلی گوزیله
قان اورک داغلی سوزیله


یارا گوگلوم سوروشور باشلادیقین سوز ندی قارداش
بو نه سوزدور که اورکلرده تلاطمده دی قارداش
سویله مکدن یوخاری گورمدی قارداش
دیماق افسانه دی قارداش


یاش گوزیمدن اَلَنَر کن کاغاذ ایسلاندی یاش اولدی
گوز یاشیم سئلَّنوب اَروَندیدن آخماقدا باش اولدی 
گینه گوز یاشیله دولدی


گینه دوران کاغاذ اوسته دوران دوتدی دولاندی
گینه اروندیده کی صحنه جان آلدی تازالاندی
گینه غملر قالاق اولدی یغوشوب قالدی قالاندی
دوزومون قابی جالاندی


ایتیررکن اؤزیمی گاه دولانوب گاه دایانوردوم
گاه اویوب گاه اویانوردوم
دهلی اروندی تانوردوم


دهلی اروندی تانوردوم نجه طوفان ایلمیشدی
گیجه نین صون چاقی غوّاصلارا طوفان ایلمیشدی
بدر و خیبر آجیغین سینه ده پنهان ایلمیشدی
قانلارا قان ایلمیشدی


منی وجدان سیخاراق قان تر ایچینده بوغولوردوم
بوغولار کن گینه جان آلوب جان دوغولوردوم 
داناق آلتیندا قالوب گاه سیخیلوب گاه اوغولوردوم
اللاهیندا قاپوسیندان قوغولوردوم


او حزین پرده نی گورماقدا پوزولدی نجه حالیم
قارا کیپریکلری غواصلارا بنزنتدی خیالیم


اود ووروب اودلادی بیر لحظه ده سؤنموشدوم آلیشدیم
اوج محنتده چالیشدیم


قلم ایستر که سو قربانلاری غواصلاری یازسین
تیتریور ال یازا بیلمز
حولیدن آز قالور آغزیم قورویر کن سوزین آزسین
سوز گوزلدور آزا بیلمز


قلمیم ایستیوری تا یازا غواص بالالاردان
اورگیم سویلیه ایللر بویی سیزقین یارالاردان
او یورولماز قارالاردان
کیم یازور گور هارالاردان


یوخ سو قربانلارینی  وصف ایده قدرت قلمیمده
یوخدی ایثار حدیثین یازا جرئت قلمیمده
یوخ لیاقت قلمیمده


اولارین نسگلینه موجلار آغلار بلم آغلار
کاغاذ آغلار قلم آغلار


بیلمورم خوردا جا بیر کلمه ده قدرت نقدر وار 
هامی قارداش قانا بیلمز
بیلمورم عاشق اولان قلبیده جرئت نقدر وار
بونی کیمسه انا بیلمز


طبع شعریم دایانارکن دیوری سوزده اثر یوخ
عملین اولماسا یازساندا یاوان سوزدی کسر یوخ 
آغاجین اولسادا بَر یوخ


یاش گوزیمدن آخاراق سویلدیم ای طبع دایانما
آرخایین اول منی دانما


دوزدی یوخدور عمل اما قارا باغریمدا یارام وار
بو گوزل بنده لریله دانوشام منده آرام وار
کیمسیه یازمالیام هاردا هارام وار


منده عشق اهلیم اما هله منصور اولا بیلمم
بالاجا زمزمه نیم نغمۀ پرشور اولا بیلمم
ذره یم نور اولا بیلمم


قلمیله کاغاذی اوز اوزه چخناشمادا گوردیم
ده لی اروندی ایاق باش باش ایاق داشمادا گوردیم
قانی قایناشمادا گوردیم
قانلی نخلستانا باخدیخجا سچیلمیشلری گوردیم
قارا گیمیشلری گوردیم


آیریلیق آخشامی کند ایچره نه هایلار نه هرای وار
آیریلیق دائمی اولدی نه بیر آیلار نه مین آیلار
یار اوز یارینی هایلار


او قارانلیق سوله لر ایچره عجب زمزمه لر وار
قانلی اروند کنارینده بویوک خاطره لر وار
نخل لر ایچره نه لر وار


یا حسین نغمه سی کندی بورویر کن اوجالوردی
بیری ایستکلی سینه چاتماقینین قولین آلوردی
اللهی یاده سالوردی


بیری باش سجده ده معبوده مناجات دیوردی
بیری ده آیریلیقین خلعتین عشقیله گیوردی
نلر اللهه دیوردی


بیرینین گوز یاشی نیسان کیمی گوزدن اَلَنوردی
بیری بیر گوشه ده یوز تپراقا قویموش مله یوردی 
نجه سس سیز دیلنوردی


یا غیاث المستغیسین یا الاه العالمین
یا غیاث المستغیسین یا ولیّ المومنین
انا عبدک الذلیل
انا عبدک الضعیف


بیریده کرببلا سمتینه حسرتله باخوردی
گوزونون یاشی آخوردی


یاحسین یاحسین گلوروق ها ... آقا جان
بیله که معلوم اولور دینجلوروق ها ... آقا جان
سندن اوتری ملوروق ها ... آقا جان


اللهیندا الگی اؤسالیوب صونرا سئچَردی
سئچیلنلر هامی بیر بیر اَلَنَر کَنده گئچَردی
هاموسی جام بقادن سو ایچردی


آیری بیر عالمیدی آخشام او گون نخللر ایچره
بیله بیر عالم اولارموش؟


گرک استاد طریقت اوتوروب درس آلا قارداش
وورا زانوی تعلّم یره حیران قالا قارداش
«شمس» او خلوتگهه بیر لحظه اگر یول سالا قارداش
قییدَر دال دالا قارداش

اوردا عرفان باش آلوب اوج دوتار کن هاوالاندی
سیندی سرّین قوروقی پرده لر اوردا آرالاندی
سان تماشاگه رازیندا حجابی پارالاندی
اوردا نامحرم اولانلار قووالاندی


اورانین عالمی باشدان باشا حالدور داحی قال یوخ
اوردا دیدار او قدر واردی که معشوقه مجال یوخ
شهدا مهدی بقا عالمیدور اوردا زوال یوخ
اوردا حالدور داها قال یوخ


اورا بیر یردی که آهولری ما فوق ختن دور
اورا بیر یردی هامی لاله لری پاره بدندور
اورا باشدان باشا گوز ایشلیه لی سرو و سمن دور
اورا بیر آیری وطندور


اورا مهد شهدادور اورا خرگاه ولادور
اورا معبد اورا مسجد اورا محراب دعا دور
حرم امن خدا دور


گون چونوب آخشام اولوب یتدی ملاقات زمانی
باشلادی ویردی یانیق سسله موذّن بیر اذانی
بیر اذانیکه سالوب لرزیه جانی
هامونون قِینَه دی قانی


سان کی زهرا بویوران لحظه بلال وئردی اذانی
خانیمون صون نفسی آز قالوری آیریلا جانی
بلالین آخر اذانی
خانیمون چیخمادا جانی


هامی قان آغلایاراق باشلادیلار قانلی نمازی
هامی باش سجدۀ وصلتده ایدور راز و نیازی
نه درین راز و نیازی
نه نمازی


بیر نمازی که ملک لر هامی صف باغلادی قارداش
غرق دریای عبادت هامی قان آغلادی قارداش
سینه لر داغلادی قارداش


عرش اعلاده ملکلر هامی حسرتله دییردی
نه گوزل بنده لرین وار
نجه رزمنده لرین وار


قاش قارالدوقجا داها پالچیق اطاقلار بوشالوردی
بیربیریندن هامی آیریلمادا گوزلر یاشالوردی
کربلا صحنه سینی یاده سالوردی


آیریلیق وقتی یتیشدی هامی آغلاشمادا قارداش
بیر بیرین باغرینا باسماقدا حلالاشمادا قارداش
هامی غواصلار اوزاقلاشمادا قارداش


قارا گیمکده هوا قاره گینلر قارالاندی
قارا پالتارلیلارین کاروانی کوچدی آرالاندی
کیمسیه دنیا قالاندی


گون باتار کن شفق آلتیندا هوا قاره گییردی
یلده چرپوب اوزینی نخل لره بیله دیردی


بو گیجه موجلی اروند بوتون قان اولاجاقدور
بو گیجه سویگلی گللر سارالار کن سولاجاقدور
بو گیجه چوخلی بَلملر ایچینه قان دولاجاقدور
نخللر ساچ یولاجاقدور


بو گیجه چوخلاری اَروندیده مظلوم یاتاجاقلار
بو گیجه اللها عشّاق فقط جان ساتاجاقلار
بو گیجه بیر گیجه دور عالمی گوزدن اتاجاقلار
بزم یاره چاتاجاقلار


بوگیجه چوخلی رقیه دوروب  آغلار اولار اولماز؟
اریدن دنیادا داغلاری بو داغلار اولار اولماز؟


چوخلی لیلا بو گیجه اکبرینه آغلیاجاقدور
عالمی داغلیاجاقدور
نخل اسلامه ده غواص بو گیجه قان ویره جاقدور
قان ویرر کن اوزی قانسیزلامادا جان ویره جاقدور
جانی قربان ویره جاقدور


اولماسا یاره سی کیمسه حرم یاره گیدنمز
هر گوزین اولماسا قان پرده سی دیداره گیدنمز
هر باش عالمده بلی عزتیله داره گیدنمز
بزم دیداره گیدنمز


یتوشر بیر یره ایلر اوز اوزیندن سفر عاشق
عشق میدانینه شوقیله اولار ره سپر عاشق
حلقۀ داری گوروب قانلی لبیله اؤپر عاشق
تکجه یارین گورر عاشق


بو هیاهویدا شوقیله گلوب قافله گئچدی
ساقی بزم شهادت گوزل انسانلاری سئچدی
قان شرابین هره ظرفیتینین قدریجه ایچدی
فقط الله ... هامی هیچدی


تا ترانی سسی معشوقیدن اُول بزمه یتوشدی
جام اروندیده تا جلوۀ دلدار گوروشدی
دسته دسته سووا باتماقدا اوشاقلار یولا دوشدی
بو سفر ایری بیر ایشدی
آیری یول ... آیری گیدیشدی


داها گوز گورمدی مظلوم بالالاردان ال اوزولدی
گوزیمون پرده سینه قات قاریشوق صحنه دوزولدی


سونرا تا صبح آچیلینجا قلم عاجزله مه دیدی
نگران باخمادا گوزلر سحری گوزله مه دیدی
فجر صادق یاریلان کن گیجه نی بیزلمدیدی
ظلمتی دیزلمدیدی


تکجه الله بُلوری صبح آچلینجا نلر اولدی
ظلمتین باغری دلیندی  قاش آغاردی سحر اولدی
قارالیق دربدر اولدی


گیجه غواصلارا زهرای بتول آرخا دایاندی
قوپدی بیر قائله خط سینمادا دشمن قووالاندی
نعش نعش اوسته قالاندی


سحر اروند جوشوب موج ووروب باشدان آشاردی
هله وور سیندورودی خطده اوشاقلار ساواشاردی
یخیلیب بعضیسی اروندیده قانه  بولاشاردی
هله بعضیسی یاشیردی
قان بَلَملَرده داشیردی


داها صبرین چاناقی چارپلارکن جالانوردی
نگران گوزلریم ارونده باخوردی سولانوردی
آختاروردی تاپا بیلمزدی دوروردی دولانوردی

هانی عبدالله شکوفه هانی سردار دلاور
هانی منصور هانی محسن هانی جانباز تکاور
هانی راشد هانی دباغی و سلطانی و نادر
هانی کاظم هانی الوانی نجاری و قادر


مهدوی لر هانی سجاد و رضالر هارا گیتدی
شیخ علی لر هانی با عشق و صفالر هارا گیتدی
بیله معلوم اولور عشقلی باشلار دارا گیتدی
بالاسین گورمه میش عباس اورگینده یارا گیتدی
چوخ اورکلر پارا گیتدی


یری وار مظلوم ئولن مشدی علیدن یاد اولونسون
بلم ایچره او غریبانه دوشندن آد اولونسون
پاک روحی شاد اولونسون


شهدا محفلی مقتلده قورولموش نه صفالی
بزم جاناندا هامی جمعیدی شمعین یری خالی
یانا تا آرتورا حالی
او وفا مجلسینین واردی نه قیلی و نه قالی
اورا بوردان چوخ آرالی


ناگهان موج ووروب بیر بلمی ساحله قارداش
ارجمندیده شمع اولدی او گوزل محفله قارداش
دولدی دوغرولدی سینیق قافله قارداش


بلم ایچره باشینین قان شفقین شاخمادا گوردوم
عشق اودیله اریوب شمع کیمی آخمادا گوردوم
یاندوروب یاخمادا گوردوم


گوز دوشوب گوردی نچه قانه بویانموش قره لردن
قوی دیوم منظره لردن


بیر طرفده یخیلان قول بویون اوچ یولداشی گوردوم
بیر طرفده یارالی سیمه دولاشموش باشی گوردوم
بیر طرفده نچه خورشیدیه باتموش قاشی گردوم
بیر طرفده باشی یوخ بیر یارالی قارداشی گوردوم
موج ووران قان یاشی گوردوم


غسل تطهیر اولونوب قانیله طوفان آراسیندا
آخرین صبح نمازی قیلینوب قان آراسیندا
باخ بو سودایه اولور جانیله جانان آراسیندا
قانلی میدان آراسیندا


باغری قان گوزلری قان سجده سی سجاده سی قاندور
می و میخانه سی قان ساغری قان باده سی قاندور
بلمی قان قلمی قان ... وصیت نامه سی قاندور
اوجا بوی قامتی قان پیکری قان جامه سی قاندور
اوره گی قان قاشی قان سینه سی قان سجده ده گوز یاشی قاندور
یری قان تربتی قان مقتلی قاندور باشی قاندور


موج گهواره سی غواصلارا لایلای اوخویوبدور
او قوجالموش قاریدا رهلی کمانین توخویوبدور
نجه سیزقین اوخویوبدور


#لای_لای_ای_جبهه_لرین_یورقونی :
لایلای ای جبهه لرین یورقونی ای خسته جوانلار
لایلای ای شهد شهادتدن ایچوب کامه چاتانلار
لایلای اروند کنارینده قزل قانه باتانلار
خوش یاتون ای قوری تپراقلارین استونده یاتانلار


خوش یاتون یاخشی یاتوبسوز
یاخشی باش فکرین آتوبسوز
یاخشی جانانه چاتوبسوز


دوزدی تاریخده حال اولمادی ایثاریزی یازسون
هله تیز دور یازا بیلمز
دوزدور عالمده چیخار اولمادی اسراریزی قانسون
قارداشیم یوخ قانا بیلمز


دوزدی سس سیز یارالاندوز سووا باتدوز قانوز آخدی
دوزدی ظالم قودوروب خنجرینی سینه زه تاخدی
دوزدی سیز جان ویره لی بوینی یوغونلار هامی باخدی
نسگلوز عالمی یاخدی


قوی قانوز آخسادا آخسون
اجنبی باخسادا باخسون
خنجرین تاخسادا تاخسون


نقدر  جسمیده جان وار
نقدر قولدا توان وار
نه قدر داماردا قان وار


داخی چیخماز یادیمیزدان یادی ده دلده قالان دور
سیزین آوازۀ عشقوزله جهان وارسا جهاندور
باش اگن سیزلره قارداش اوجا داغلار ساوالاندور
باشی قار سینه سی قاندور


سیزین ایللر آرا ایلر بویی یادلاردا یادیز وار
آیریلق داغی گورن قانلی اورکلرده آدیز وار
اللّاهوز وار هر زادوز وار


سیزلر آخرده گیدوب مقصده چاتدوز بونا سوز یوخ
یاخشی باشدان یاشایش فکرینی آتدوز بونا سوز یوخ
یاتدوز اما یوخودان خلقی اویاتدوز بونا سوز یوخ


اما سیزدن ساری چوخ گوزلری یولّاردا قالان وار
سیز گیدندن  صورا معلوم اولالی چوخ قوجالان وار
چوخلی رنگی سارالان وار


آنالار داغی سهندین داغی تک بیرجه داغ اولدی
چوخلی بیل سندی بوکولدی قارا بیرچکلر آغ اولدی
سحر آخشام گیجه گوز یاشلاری آخدی بولاغ اولدی
غم قالاندی قالاغ اولدی


ای بولاخلار سیل اولوب کفر ایوی بر باد اولاجاقدور
او یانیق قلبلرین آهی دا فریاد اولاجاقدور
یر یوزی داد اولاجاقدور


بیله مظلوم لرین آهینی الله یره سالماز
پوزولار ظالمین ارکانی بو ظلم آخره قالماز
کفر بایداقی اوجالماز


گوره جاقسان باشا باش ارض و سما نوریله دولدی
بیر شفق شاخدی ساچیلدی بوتون عالم ایشیق اولدی
اوندا بیردن گوره سن دان یلی اسدی سحر اولدی
فجر صادقده سوکولدی قارالوق دربدر اولدی
چوخ بویوک بیر ظفر اولدی


اوندا هر یرده یاشیل  بایراقی اسمک ده گورسن
اوندا انسان هامی قارداش
اوندا انسان هامی قارداش

  • چهارشنبه
  • 22
  • اسفند
  • 1397
  • ساعت
  • 12:38
  • نوشته شده توسط
  • ابوالفضل عابدی پور

برای بارگذاری فایل در سایت اکانت مداحی بسازید


حجم فایل 1.24 MB
تعداد بازپخش 298
تاریخ بارگذاری چهارشنبه 22 اسفند 1397 05:41

ارسال دیدگاه



ورود با حساب گوگل

ورود کاربران