چرخ زمانه اورگشوب هاردان بو عادتی
سالدی الینه اهل فریب و سیاستی
اهل وفانی سلطه سی آلتیندا ساخلیور
اهل جفانی سینه ده جان تک قوجاقلیور
جمله ائمه نور هدایتدی تک به تک
ایستور او نوری ظلمیله خاموش ائده فلک
وئردی امام هادیه هشدار بیر لعین
یعنی سیاسی ایشلره چوخ ویرماسین الین
چاتدی امام هادی قولاقینه بو خبر
وقت حکومتیندن ائدوب قلبدن حذر
خلوت ائدوبدی منزلی تا آلدی دستماز
قیلدی خدای عالمه ایکی رکعت نماز
عرضی بو اولدی کای حق دادار وی الاه
هرنه جهاندا ایلمیشم اول اوزون گواه
حاصل او سرور اولدی بهانیله دستگیر
چاتدی مدینه دن اونی بیر عدهٔ کثیر
گلدی دیار سامره ده ایلدی جلوس
اولدی او شهرین اهلی او مولایه پای بوس
عمری یازیلّا قرخ ایکی یا قرخ اوچ ایل اولوب
زهر اثریله باغ ولانین گلی سولوب
اولدی او لحظه لخته لنوبدور جگرلری
قالدی اورک باشیندا او مظلومین اللری
یاتما بویوردی من ئولورم گل اوغول حسن
فوری تدارک ایله من بی کسه کفن
ذره دایان قلم نه یازورسان بو جمله نی
گلدی کفن قضیه سی غم چولقادی منی
ابر و ملالدن یره آه و فغان گلور
بوردا خیاله پادشه انس و جان گلور
قلب جهانی داغلادی بو غملی ماجرا
باشدان ایاقه پیکر سلطان دین یارا
شمر کسوب باشین بیری ظلمیله قول سالوب
آتلی پیاده نعشینین اوستونده یول سالوب
نیزه قلج سینقلاری آتلار ایاقلاری
وحشی عربلرین همی ضربتلی داشلاری
جسم امامی چولقیوب ائتمیشدیلر نهان
اوغلی گلنده قتلگهه اولدی باغریقان
اهل قبیله دفنینه گیزلینجه گلدیلر
یعنی ستون پنجم دشمن اونی بولر
اللر ئورک باشیندا پریشان هامی باخور
اشک ملال چهره لرینه روان آخور
ناگه او چولده گوردوله بیر سیدی گلور
الده عمامه گوزلرینون اشکینی الور
دوردی سلامه اهل قبیله کچیک بویوک
دسته به دسته فرداً و فرداً بولوک بولوک
گورجک امام عصری دل افسرده دوردیلار
ناله کنان باشلارا تپراق سویردیلار
بزم عزا قورولدی هامی باتدی ماتمه
گتدی بو غم کدر دل آدمله خاتمه
ائتدی اشاره سیز آتامین قبرینی قازین
منده آلوم قوجاقه چکوم اصغرین نازین
بلکه مزاره دفن اولا بو یاره لی بدن
اگنی یالین دی یوخدی لباسی تاپون کفن
دوشدی قبیله نین ایچینه غملی زمزمه
گتدی او زمزمه دل سجادی ده غمه
بولدی کفن تاپولمیاجاقدور او شاه دین
امر بویوردی نصفی یانان خیمیه گئدین
گزدی یانان چادرلاری جمله صغیرکبیر
هر کس الینده گتدی یانق کهنه بیرحصیر
شه که ملبسیدی بهشتی حریریلن
گئتدی مزاره پیکری کهنه حصیریلن
اهل قبیله گوردولر الله رضاسی وار
جمله منا فدالرینه قازدیلار مزار
دفن بویوردی شاه زمانه ئولنلری
جسم حبیبی قاسم و عباس و اکبری
فارغ اولوبلا دفن شهیدانیدن تمام
اشک فشان بویوردی او جمعیته امام
اجروز او عالمی یارادان خالقیز ده دی
مزد بهشتی ایسته سوز الان الیزده دی
پولدا اگر دئسوز سیزه من تقدیم ایلرم
عده نقدر اولا هامیا تقسیم ایلرم
ائتمه دیدیله چوخ بیزی شرمنده ای آقا
هاردا اوتورسان ایله بیز بی کسه دعا
دوردی نظامیلن هامیسی وردی قول قولا
کوفه دیارینه او شهی سالدیلار یولا
اولدی او طایفه ابدی صاحب وقار
قبره آپاردی هر بیری بیر نام افتخار
اولدون«امینی»خادم دربار قدس یار
یازدون امام هادیه بیر غصه لی شعار
اجر جمیل حضرت دادار الینده دی
جمله دوا او دکتر بیمار الینده دی
ائتسون او شاهه دردیوی اظهار بالیقین
بول که عنایت ایلیه جاق زین العابدین
- پنج شنبه
- 23
- اسفند
- 1397
- ساعت
- 11:42
- نوشته شده توسط
- ابوالفضل عابدی پور
ارسال دیدگاه