ظلم متوکلدن اولوب برهم عوالم
مسموم ائلیوب حضرت هادینی او ظالم
آزاده علی النقی اول نور هدایت
بعد از آتاسی ائتدی اوتوز اوچ ایل امامت
قرخ آلتی یاشیندیدی ایچوب شهدشهادت
رحلت ائلدی دهریدن اول عامل و عالِم
آلدی باشینی عسکری اوغلی دیزی اوسته
یرمی ایکی سیننّده جوان قلبی شکسته
عرض ایلدی بابا ائلیوب غم سنی خسته
گوردوم سنی بو حالیده سیندی پروبالم
گوز آچدی اوگل نیمهٔ ذالحجه ده دهره
رشد ایتدی گلستاندا وئروب عالمه بهره
افسوس که دؤندی فلکین شربتی زهره
اعدای دنی قویمادی حضرت قالا سالم
خون دل زهرانی فلک اشکه قاتوبدی
هادی بالاسی سامره شهرینده یاتوبدی
غربتده قویوب ائللرینی گوزدن آتوبدی
یانّام او غریبه توکولر اشک زلالم
هرچند که مسموم ائدوب اول حضرتی اعدا
ظلم آتشینه خیمه لری یانمادی اما
ای دل او حسیندور که قالوب بیکس وتنها
سسلردی سپاهیم داغیلوب غملی دی حالم
دوشموشدی حسین یاره لی اشرار آراسیندا
قالمیشدی اوگل پیکری مین خار آراسیندا
سسلوردی باجی قارداشین اغیار آراسیندا
دور یاتما حسین زینبوم چوخدی ملالم
ایستور حرم عصمته ظلم اهلی ال آچسون
ایستور دل زهرایه عدو ظلم اوخی ساچسون
ایوای یارالی قورخولی قزلار هارا قاچسون
عباسه دئنن اوتدا یانور اهل و عیالم
غم جامه سینه سن آنامون اوغلی بورونمه
دشمن گوزونه غصه لی حالیله گورونمه
چوخ یاره لیسن سن آنامون جانی سورونمه
قربان سنه هم عزت و هم جاه و جلالم
- پنج شنبه
- 23
- اسفند
- 1397
- ساعت
- 11:57
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه