قلبیمی قان ائلیوبدی غم هجران یارالی
غربت ائلده ئولورم زار وپریشان یارالی
نفسیم تنگه دوشوبدی اورگیم درده گلوب
حاش لله تاپیلا دردیمه درمان یارالی
باجیوی بیرده فلک غصه لی شاماته سالوب
خوشلیور زینبوی بی سر و سامان یارالی
باجینون وای حالینا اولماسا گر قارداشی
جان وئرن وقتده اولار من کیمی نالان یارالی
گؤزومون یاشی امان وئرموری بیر آن دانیشام
جاریدور صورتیمه بحر خروشان یارالی
آتش غصه ده بیر عمرودی هر دم یانورام
حالیمه یوخ یانانیم گل منه سن یان یارالی
دیلیمون ازبری آدوندی حسین جان وئرورم
جانیمی خوشدی ائدم بو آدا قربان یارالی
ای جدا اوسته باشی سورهٔ کهفی اوخویان
باشیم اوسته یئریدی گل اوخی قرآن یارالی
بو آدامسیز باجیوی یاد ائله اللهه گؤره
دم آخرده ائله زینبه احسان یارالی
باخورام یوللارا قارداش دئیورم اودلانیرام
سس وئرن یوخ سسیمه ایلورم افغان یارالی
نیلیوم هر باجینون آرزیسیدی جان اوسته
قارداشین گورماقا بلکه تاپا امکان یارالی
مهربانیمسن حسین روح و روانیمسن حسین
مهروی کسمه بو دل خسته باجوندان یارالی
الیوی قویسون اگر سینمه راحت ئولرم
چالیشوب بیربئله چرپینماز اودم جان یارالی
آلورام عطروی سینمده کی پیراهندن
اورگیم اودلانور ای روحیمه ریحان یارالی
یئرگوی آغلور منیم احوالیمه بو غربتده
منده هرآن دئیورم جان یارالی جان یارالی
باخورام کوینگوه غصه لریم تازه لنور
گؤرورم محشر کبرانی نمایان یارالی
مین یول ئولسمده یادیمدان چیخا حاشااوگونی
سن آدامسیز دولی اشراریله میدان یارالی
اوخ یاغور نیزه یاغور داش توکولور قان سوزولور
بیربیره سبقت ائدور نشتر وپیکان یارالی
اولمادی فاطمه نون اوغلونی اللردن آلان
کربلاده دئدیم هئچ یوخدی مسلمان یارالی
یاخشی امت باباما اجر رسالت وئردی
ییرمی ایل زحمتینی ایلدی جبران یارالی
قصد قربتله گلن ویردی گئدن ویردی سنی
دوغریور فکر ائلدیم کوفه لی قربان، یارالی
قان مناسینده بوروندون قیزیل احرامه حاجی
حج عشقونده سنون قالمادی نقصان یارالی
نقدر پیکروه ویردیلار اوخ ، آخ دئمدون
تاپاسان درگه جانانیده رجحان یارالی
دئمدون گؤرسه باجیم نعشیمی طاقت ائلمز
قتلگهدن کئچه جاق زینب نالان یارالی
اوردا بیر منظره گؤردوم کی آغارتدی باشیمی
گجه نی گوندوزی ائتدی منه یکسان یارالی
قانلی گوداله دؤشنمیشدی دیدیلمیش بدنون
سانکی میدانیده اوراق اولا قرآن یارالی
نه حسین آتلار ایاقینده حسیندن نه قالار
نعل لر نعشوی ائتمیشدیله تالان یارالی
جسموین حالینه آغلوردی جدا اوسته حسین
اوندا گؤردوم یئره گویدن یاغور القان یارالی
یئری وار حشره کیمین(ناعمی)قان آغلاسا گر
هاردا بو حاله قالار سن کیمی سلطان یارالی؟
- سه شنبه
- 6
- فروردین
- 1398
- ساعت
- 11:19
- نوشته شده توسط
- ابوالفضل عابدی پور
- شاعر:
-
علیرضا حضرتی (ناعمی)
ارسال دیدگاه