ای سالان زینبی گردونۀ ایامه حسین
گنه ئولمز باجوی چکدی فلک شامه حسین
حکم تبعیدی منه ایندیده مروان ویروری
خاطرمده او گچن جور و جفاسان ویروری
آنامون الده ئولن اوغلی، باجون جان ویروری
نه اولار زینبوون یانینه بیرده گله سن
دربدر زینبیوون حالنی بوردا بُله سن
من همان زینبم اطفاله پرستار اولدوم
کربلاده جگریم یاندی کفندار اولدوم
اولسایادونده اگر من سنه غمخوار اولدوم
ئوز الیلمه باشوون یاره سینی باغلاموشام
باجون ئولسون گجه گوندوز سنه من آغلاموشام
آتام اوغلی منی چوخ درده هم آغوش ائدیسن
کربلادن گهی شامه منی چاووش ائدیسن
نه روادور منی سن ایندی فراموش ائدیسن
زینبم بختی قرا من وطن آواره سیم
من سنون عشقوون آواره سی بیچاره سیم
انتظاریم بودی سنده منه امداد ایده سن
قلب ناشادیمی غربتده گلوب شاد ایده سن
آتام اوغلی نه اولار سنده منی یاد ایده سن
دیمرم باشیمون اوستونده گلوب آغلیاسان
دیورم بلکه باشیم یاره سینی باغلیاسان
ترک ایدوب جدیمی یثربده کی زهرا آنامی
قویمادوم تک قالا شام ایچره رقیه بالامی
باشیمون یاره سی خاطرلادی حیدر بابامی
ایستیرم زینبی شام ایچره سرافراز ایده سن
بیرده قرآن اوخویوب شامده اعجاز ایده سن
تک ئوزون گلمه حسین حیدر کرّاری گتور
نهر علقمده دوشن قولسوز علمداری گتور
قاسم و اکبریله مسلم سرداری گتور
بیرده زحمتدی آنام حضرت زهرانی چاقور
جان ویرور زینب نالان شه بطحانی چاقور
خواهشیم واردی بو آخر نفسیمده باخاسان
شامده نازلو رقیّمله منی یوخلیاسان
سودامر اصغری سینونده ئوزون ساخلیاسان
قوی دیوم باد صبادن سنه قارداش سوزومی
ئولورم شامیده گل باغلا بو آغلار گوزومی
سس دوشوب شامه غریب ئولدی جگر داغلادیلار
قوپدی هنگامه گلوب اهل و حرم آغلادیلار
یغشوب زینب نالان گوزونی باغلادیلار
دار فانینی وداع ایلدی زینب یارالی
باش یارا سینه یارا قلبده مطلب یارالی
دیدی غساله ندن باشدا بونون قاره سی وار؟
اللری سینه ده قلبینده یقین یاره سی وار
اللرین چکدی کناره گوره نه چاره سی وار
گوردی غساله اونون یاره لی نالان بدنین
داغلانان سینیه باسمشدی حسین پیر هنین
وار یری «نادری» یازسون بونی قبرین داشنا
بسلیوب چوخدان ارادت بو حسین قارداشنا
قانلو بیر کوینگی باسمش باجی قلبین باشنا
روز محشرده همان کوینگی زهرا آلاجاق
بالا وای سویلیوب اول کوینگی باشه سالاجاق
- سه شنبه
- 6
- فروردین
- 1398
- ساعت
- 12:36
- نوشته شده توسط
- ابوالفضل عابدی پور
- شاعر:
-
مرحوم حاج قدرت اله نادری
ارسال دیدگاه