صبا حسینه خبر ویر ئولور بلالی باجون
کفن تدارک ایله جان ویرور یارالی باجون
بو شهر شامده یرده یوزی گوزی قاپودا
ئولور بو گوشۀ غربتده کربلالی باجون
باسوبدی سینه سینه قانلی اوخلی کوینگوی
بو پیرهندن آلور نکهت وصالی باجون
تراب بستریدی خشت پاره بالینی
قوری یر اوسته ویرور جان آتوب جلالی باجون
تک ایوده جان ویروری یدّی قارداشون باجیسی
نجه مزاره آپارسون بو بیر ملالی باجون
نه واردی گوزلرینی باغليان نه آغلیانی
صاقا صولا باخار آغلار قدی هلالی باجون
اگرچه قبلیه اولسون یوزی گرک ئوله نین
ولیک کرب و بلایه باخار وفالی باجون
گل ای باجیسنا قانلی جنالی کعبۀ دل
بو صون نفسده گوره بیر او گل جمالی باجون
گلنده قاره گتور سال جنازه سی اوسته
قرائيله دوتوب اُلفت باشی قرالی باجون
گلنده بیرده گتور قارداشیم ابوالفضلی
باخوب جمالینه جان ویرسون ابتلالی باجون
اگر چه هر ایکی اَلدن خجلدور عباسیم
بولور بو نکتۀ دلسوزی ابتلالی باجون
ولیک اَلسیز الی اوسته ناتوان بدنی
سُوَر مزاره قویولسون چو نی نوالی باجون
علی اکبری بیرده میسّر اولسا گتور
گوره دویونجا یارالی او بیر غزالی باجون
تلاوت ایلیه قرآن جنازه م اوستونده
یارالی دلدن آتا غصّه و ملالی باجون
اونون گوزل سسینه عمّه سی اولا قربان
سُوَر او لحنی او صوتی او خوش مقالی باجون
هنوز وار قولاقمدا او شاهزاده سسی
ایدر گوزینده مجسم او نونهالی باجون
بو حالده ایکی خوش لحن وار قولاقیمده
خیال ایدر او ایکی لحنی بو خیالی باجون
او سسلرون بیری شهزاده اکبرین سسیدور
ویروب اذان ایلیوب سیر ماه و سالی باجون
بیریده کوفه ده محشر بپا ایدن سسدور
که نیزده ایشیدوب توکدی اشک آلی باجون
آخاندا داش یاراسیندان دوباره قان یوزوه
نه حاله قالدی گورنده او وضع حالی باجون؟
دوزنمیوب باشنی چوب محمله چالدی
ساچی آغارمشیدی ایلدی حنالی باجون
یارالی باشوین آردینجا باش آچوخ گزدی
جهازسیز دوه اوستونده بو حیالی باجون
نجه بو رسمیدی آی دوره سین آلار اولدوز
گوروب بو منظره نی چرخده لیالی باجون
باشون کنارین ایله قانلی باشلار آلمشدی
باخوب او حاله چکوب آه اِتّصالی باجون
کناریدی ولی بیر قانلی باش کناروندن
چوخ آختاروردی جداده او مه جمالی باجون
اوشمع وش غمی پروانه لر آلشدیردی
باخوب یاتانلارا یاندوردی پرّ و بالى باجون
دلیم یانا که دِیم هاردان او آسلمشدی
دوباره یاره لمز قلبوی یارالی باجون
آخان او نجمه باخوب باغلادی سولان یوزینه
ایکی گوزوندن ایکی چشمۀ زلالی باجون
- سه شنبه
- 6
- فروردین
- 1398
- ساعت
- 12:39
- نوشته شده توسط
- ابوالفضل عابدی پور
- شاعر:
-
مرحوم نجمی تبریزی
ارسال دیدگاه