گل اجل سالوب بو یالقیز
زینبی کمنده قارداش
شامه گل بلا چولوندن
منده جان وئرنده قارداش
خاطرینده وار حسینیم قتلگهده جان وئرنده
قانلی مقتله یتیردیم باشیوی عدو کسنده
خنجرون نه نوعی دوتدوم باشون اوسته اندیرنده
منده اؤلدوم او مکاندا سن حسین اؤلنده قارداش
قالموشام غریب و بی کس دوشموشم عجب فشاره
باخ بو چرخ کجمداره باخ ایشه بو روزگاره
وار کیمیم منیم اؤلنده جسمیمی قویا مزاره
آختارار باجی مسلّم قارداشی اؤلنده قارداش
زینبون اؤلونجه وئردی قانلی نهضته ادامه
کوفه دن گلوب نه نوعی عترتون دیار شامه
گوندوزی گوزومده قارداش شامی دوندروبدی شامه
آنداولا کسوک بوغازه یوخ رمق بدنده قارداش
زینبون اؤلوبدی چوخدان روحی یوخ قالوبدی جانی
گوردی نیمه شب او چولده ماجرای سایبانی
بوسه گاه مصطفاده لبلرونده خیزرانی
یا باشین جدا باشیندا کو به کو گزنده قارداش
چوخ تکم بو چولده قارداش یوخدی بیر نفر پناهیم
نه آتام آنام قالوبدی نه قالوبدی تکیه گاهیم
کیم قویار بو جسمی قبره یوللارا قالوب نگاهیم
یاحسین اولاردی ذکریم قمچیلر دگنده قارداش
- سه شنبه
- 6
- فروردین
- 1398
- ساعت
- 12:40
- نوشته شده توسط
- ابوالفضل عابدی پور
- شاعر:
-
مجید قلعه بیگی
ارسال دیدگاه