زینبون یانوبدی دلدن
جان وئرنده سن یارالی
گل حسین باجون وئرور جان
سربسر بدن یارالی
سن وئرنده تشنه لب جان
کربلاده قوملار اوسته
گلدیم اُول زمان حسین جان
قتلگاهه دلشکسته
شمر الین دوتاندا اولدی
اللریم شکسته بسته
عورتی ندن وورورسان
اولمادی دییَن یارالی
لطف قیل بو غربت ائوده
گل یارالی سینه داغلا
قبلیه چوور یوزومی
باخ منه سیزیلدا آغلا
اللرون بدنده اولسا
باری گوزلریمی باغلا
قالماسون اؤرکده نسگل
جان وئرنده من یارالی
ارث دور بیز اهل بیته
غربت اؤلکه ده وئراخ جان
خوشدی زینبه بو اؤلماق
چونکه ایسدیوبدی جانان
بیرجه گُل یوزون گورِیدوم
تا که جان وئریدیم آسان
قبض روحه وئرمرم سن
گلمیینجه تن یارالی
گر سنون بو گلماقوندا
زحمت اولسا ای برادر
گلمه سنده گلمه قارداش
باری اکبریمی گوندر
سویله اکبریمه عمّون
جان وئرور یولووی گوزلر
چون بولور نجه چتیندور
اولسا جان وئرن یارالی
قیل قدم عزیز قالسون
قویما یولدا گوزلریمی
آل بو غصّه لی اؤرکدن
بیر یانخلی سوزلریمی
باشیم اوسته بیرجه اگلن
چک کناره گوزلریمی
گور اؤرک باشیندا قانلو
کهنه پیرهن یارالی
گر چه روح زینب ایمدی
آیریلور حسین بدندن
جانیوه قسم ئولوبدور
آیریلان زماندا سندن
قبض روحی اوندا اولدی
سن وداع ائدنده مندن
یوز قویوب جداله گئتدون
با دل محن یارالی
سن وئرنده جان گَلَنموب
قزلارین او سرزمینه
باغلاسونلا گوزلریوی
قویمیوبدی اهل کینه
نسگل اولماسون گوزیمی
باغلوری قزون سکینه
ساچلارین ایله یولوبدور
مثل یاسمن یارالی
آغلیانلارون باش اوسته
جان وئرنده سن اولورسان
آغلیان منی حساب ائت
گل قدملریوه قربان
گور نه حسرتیله غربت
ایچره زینبون وئرور جان
گه دیور حسینیم ایوای
گه دیور حسن یارالی
تاپمادیم بلا چولونده
جسم پاکیوه کفن من
قویمادی یارالی نعشون
بیر قویام مزاره دشمن
من خجالتم ولیکن
بو غریبه لطف قیل سن
جسم زینبی گوروب یان
ائتگیلن کفن یارالی
وار مرامی دلده گورسون
بیر او گل جمالی زینب
باشیوه دوروب دولانسون
قالماسون ملالی زینب
بیر دیوم یارالی قارداش
سنده دئ یارالی زینب
ای یارالی بیر یارالی
آختارور ئولن یارالی
زینبی اؤزون بولورسن
چوخ سوؤر او تشنه سقّا
اولماسون خجل برادر
اولماسا سوئی، دئ امّا
قولّارون بدنده اولسا
گئت باجون گوزینی باغلا
بیر اؤپوم او قولّاریندان
ای شه زمن یارالی
زینبون ئولونجه «شوری»
ال گوتورمه دامنیندن
عمّه وای دیوب سیزیلدا
عرض قیل ای عمّه سندن
ایستیرم حسین مزارین
آیریلام خانم وطندن
ورد ائدیم سنون دیلونجه
سن یارالی من یارالی
- سه شنبه
- 6
- فروردین
- 1398
- ساعت
- 14:21
- نوشته شده توسط
- ابوالفضل عابدی پور
ارسال دیدگاه