زینبم جان وئرورم منتظرم گل قارداش گل قارداش
باجیوین یاسینه گل هامّیدان اوّل قارداش گل قارداش
ای جانینی فدا وئرن قرآنه
یان شمع تک اولوم سنه پروانه
آی قارداش آی قارداش آی قارداش۲
من دیردیم ائشیدوب غملریمی آغلارسان
داغلانان سینوی هجریمده گلوب داغلارسان
قان دولان گوزلره قربان گوزومی باغلارسان
قیل قدم رنجه که لطفون اولا اکمل قارداش
گل قارداش
گلمسن زینبه غربتده بیری یار اولماز
سنی گورسم بو قدر مرغ دلیم زار اولماز
دیرم آغلیانیم واردی یاسیم خوار اولماز
نیلورم شامیده سنسیزیانامشعل قارداش
سنله قارداش او گئچن گونلریمه حیف اولسون
عالمه ناز ائلین گونلریمه حیف اولسون
گل بوغازوندن ئوپن گونلریمه حیف اولسون
عشق بیرکلمه دی تشریحی مفصّل قارداش
گوز قباقندا گئچن گونلریمی سان ویرّم
گوزلریمدن یوزه کپریک وروبان قان ویرّم
نگرانم ولی گورسم یوزوی جان ویرّم
ائتمرم چوخ سنی جان اوسته معطل قارداش
یخدیلار کرب و بلاده سنی چون میدانه
گوردوگوم منظره گتدی باجیوی افغانه
کوفیان عرصه نی تنگ ایلدیلر مهمانه
ساربان کسدی الون بارماقی بجدل قارداش
ای سوسوز جان وئرن احسانیوه من عطشانم
گل گوزوم باغلا حسین گوزلریوه قربانم
فاطمه دعوت ائدوب جدیمیزه قربانم
میزبانیمدی منیم سید مرسل قارداش
کربلادن بورا قرخ منزل اولور یامولا
یتسن هر منزله بیر قاره علم ور یولدا
قره پرچمده گوزل خطیله یاز یازهرا
خیر نسواندی آنام شأنی مجلل قارداش
گوگلوم ایستوردی سفارش ائلیم عباسه
نهردن گلسه منه سو گتوره بیر کاسه
یاندی قلبیم ولی سقاده اولان احساسه
یادیمه دوشدی سو اوسته کسیلن ال قارداش
هله عباسیمیله دلده اولان سوز قالسون
اورگیم درده گلنده دئمیشم دوز قالسون
باش سیناندا نه حالا قالمیشیدی گوز قالسون
نجه وردی او باشی نیزیه نوفل قارداش
سنکه باتدون قانا مقتلده قوپان غوغاده
منه تاپشوردون عزیز عترتیوی دنیاده
منده قانلی علمی تاپشرورام سجاده
عشقوین اولمیا کابینه سی منحل قارداش
- سه شنبه
- 6
- فروردین
- 1398
- ساعت
- 15:38
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه