آرام جاندی حیدره موسی ابن جعفر
ذرّیه دی پیغمبره موسی ابن جعفر
تاپدی شهادت گتدی تاائتسون شکایت
هارون الیندن داوره موسی ابن جعفر
((یاندی غم هجرانیده
یومدی گوزون زندانیده
موسی بن جعفر(2)))
گوردی نه غملر گردش گردون الیندن
فریاد سند ظالم و ملعون الیندن
عرض ایلدی یارب آنام زهرایه خاطر
آخر خلاص ایله منی هارون الیندن
((گوزلردی زهرانی گله
زهراسی گلسه دینجله
موسی بن جعفر(2)))
عمریم گلی زندانیده سولدی سارالدی
آرامیمی هجران غمی غربتده آلدی
هارون بی دینون الیندن من قوتولّام
مندن صورا امّا بالام معصومه قالدی
((هردم دئدی سیندی پریم
باشسیز قالوب آهولریم
موسی بن جعفر(2)))
سند ابن شاهک قتلینه شورا قوراردی
قانیله قلب مصطفانی دولدوراردی
یاخمازدی زنداندا سولوب گلزار عمری
هر گون گلوب پیغمبرین اوغلون ویراردی
((سیندیردی عنقا بالینی
صولدیردی رنگ آلینی
موسی بن جعفر(2)))
گتدی غم تقریریله موسی ابن جعفر
فریاد عالم گیریله موسی ابن جعفر
جان وئردی کنج حبسده یا حجةالله
بوینوندا کی زنجیریله موسی ابن جعفر
((ایللر بویی محبوسیدی
زنجیریله مانوسیدی
موسی بن جعفر(2)))
یپراق کیمی گل جسمی زنداندا اسردی
مقراض حسرت رشتۀ عمرین کسردی
باغلیدی زنجیره نجه دورسون ایاقه
دورسیدی زنجیر جفا بوینون کسردی
((احوالینه کیم آغلادی
کیم گوزلرینی باغلادی
موسی بن جعفر(2)))
ــــــــــــــــــــــ
✔️ توضیح : این متن شعر از استاد دکتر کتابچی تبریزی بوده و واگیر های داخل پرانتز از جناب مصیبی تبریزی میباشند.
- شنبه
- 10
- فروردین
- 1398
- ساعت
- 16:16
- نوشته شده توسط
- ابوالفضل عابدی پور
- شاعر:
-
محمد حسین کتابچی
ارسال دیدگاه