گلشن باغ جناندور گوشه زندان منه
چون ایدور هر دم تجلی جلوه جانان منه
خلوت بزم لقادور هوش جان باشدان چیخور
حلقه زنجیر کینه لاله و ریحان منه
سینه سینادی ایلر نور حق هر دم ظهور
رشگ ایدر بو شوکتیمدن موسی عمران منه
عاشقم ایتمم گلایه یوز ویره یوز مین بلا
من او بیمارم که تنها درد دور درمان منه
هر بلایه جان و دلدن سجده شکر ایلرم
فضل جاناندور ایدوب درد و بلا احسان منه
جام صهبای وفادن ایله مستم یوخ غمیم
کاسه کاسه قان ایچیردور ساقی دوران منه
لطف جانان شامل حالیمدی بو غمخانه ده
هر چتین بیر درد و محنت وار گلور آسان منه
وصل جانان آختاران جاندان چوخ آسان ال چکر
مین اولومدن چوخ چتین دور بو غم هجران منه
من سلیل مرتضایم اگمرم باش ذلته
بو ودیعت ارثدور احسان ایدوب یزدان منه
طوق عزتدور بو بوینومدا نه زنجیر جفا
بزم الفت دور بو یر نه خلوت زندان منه
من کرم درگاهیم علت اودور هارون دون
گوندریر هر لحظه مین جور و جفا مهمان منه
امر ظاهرده منه مامور اولوب سندی ولی
باطنا روح الامین دور حاجب و دربان منه
من خلیل الله عشقم گر اشاره ایلسم
آتش نمرود اولار باغ گل و بستان منه
عاشقم فرق ایلمز غربت دی یا ملک وطن
عشق جانان دور نه جان بو عرصه ده میزان منه
شایقم تسلیم ایدم غربتده جان جانانیمه
قسمت اولدی شکر اولا بو دولت شایان منه
عالم و آدم بیلور باب الحوائج منصبین
رحمتیندن ایلیوب احسان حق منان منه
وار یری شب خیز ائدم گر انفس و آفاقه فخر
شکرلله ایلیوب بو طبعی حق احسان منه
- شنبه
- 10
- فروردین
- 1398
- ساعت
- 16:23
- نوشته شده توسط
- ابوالفضل عابدی پور
ارسال دیدگاه