سر سخن بو شعریمه بیر اهل معنادن یازوم
عاشق آل عبا فرهاد میرزادن یازوم
شاهزادیدی تشیّع عالمینده پایدار
صاحب شخصیت ممتازیدی صاحب وقار
دوستدار موسی جعفر امام مقتدا
قلبدن اول حجت حقه محب و آشنا
باشدا بیر عده رجال معنوی اهل ولا
کاظمینه رهسپاریدی او شخص با وفا
قویمادی یتسون اجل کامه او والا گوهری
کاظمینه آز قالوردی اولدی یولدا بستری
احتضارینده وصیت ایتدی اول عالیجناب
اولمادوم منکه دریغا بو سفرده کامیاب
آب وصلیله گویول پیمانه سین دولدورمارام
بو گیجه آخر گیجم دور بستریمدن دورمارام
گر اجل درک ایلسه غسل ایلیون کفن ایلیون
آستان پاک مولاده منی دفن ایلیون
ساخلیون فکروزده اما دفنیمون بیر شرطی وار
اولمیون اجلاله طالب ایتیمیون چوخ آه و زار
ایستسز خشنود اولام جالب اولا بو مرحله
سیز سالون بیر تخته پاره بیرده بیر زنجیر اله
بوینوما زنجیر ذلت طوق عزتدور ورون
سانمیون شهزادیم شان و مقامیم سیندیرون
حلقه ی زنجیریله یار اولماقیم خوشدور منیم
تخته اوسته گیتماقیم خوار اولماقیم خوشدور منیم
من غلامم خوش دگل مدفون اولام اجلالیله
چون آقام قبره گیدوبدی دورد نفر حمالیله
خاتمه تاپدی وصیت شرح ایدوبدور هر سوزون
دلده یا موسی بن جعفر آغلادی یومدی گوزون
دوتدی ئوز زوارینی باب الحوائج محترم
امر واضح دور کرم اهلی ائدر دائم کرم
خادم دربارینون حضرت گلوب رویاسینه
ملتزم ائتدی اونی ئوز امرینون اجراسینه
درک ائدور یولدا اجل بیر با وفا دلداریمی
صبح اولاندا پیشواز ایله ئولن زواریمی
زندگیده احترام ایلردی آل یاسینه
بیر وصیتن ایلیوبدی مانع اول اجراسینه
قویما ویرسونلار اونا زنجیر ذلتدن قوتار
تخته پاره ایستیوبدی سن اونا تابوت آپار
بیر نفر شهزادیه اولسا اهانت خوش دگل
هیچ کیمه مندن صورا ایله حقارت خوش دگل
سالسا آهن سلسله گوزدن دوشر شهزاده لر
خوش دوتار زنجیری محبس ده ئولن آزاده لر
- شنبه
- 10
- فروردین
- 1398
- ساعت
- 16:59
- نوشته شده توسط
- ابوالفضل عابدی پور
- شاعر:
-
مرحوم انور اردبیلی
ارسال دیدگاه