یا فاطمه زندان بوجاقیندا ئولورم گل
محبسده ئولن قوش سیاقیندا ئولورم گل
یوخ اهل و عیالیم باشیم اوسته ننه تئز گل
یوخ بیر کسیم آلسون باشیمی دامنه تئز گل
بی کس ئولورم ال یئتیرن یوخ منه تئز گل
گل باشیمی یردن اوجالاندیر ملکوته
قربان اولوم اول ال که اوجالموردی قنوته
شوق حرمیم خاطر محرومه دوشوبدی
جان اوسته ام آتش دل مسمومه دوشوبدی
قلبیم داریخوب گویلومه معصومه دوشوبدی
افسوس اولا بوردا دگول اول قلبی شکسته
اولسیدی آلاردی باشیمی سینه سی اوسته
گل باشیمون اوسته اوتور آغلا ننه زهرا
گوزیاشوی توک سینوی داغلا ننه زهرا
بیرده یارالی بوینومی باغلا ننه زهرا
دردیم بودی کی یاره لی حالدا چیخا جانیم
غسل ایلیه لر سن کیمی بند اولمیا قانیم
چون یاره لی شخصه کفن ائتمک چتین ایشدی
حیدر سنی مین زحمتیله کفن ائلمیشدی
قان چیخجاق ایکیمجی کفنی آچدی دئیشدی
غربتده نه تک غسل ائده نین حسرتی ام من
ئولسم هله اوّل کفنین حسرتی ام من
هرکیمسه نین آرامین الیندن آلا جسمی
اون بیر ائیله بالغ یرین آلتدا قالا جسمی
مرطوب مکاندا اریوب خیردالا جسمی
بیر عمر تیکه یوللارینا گوز بالالاری
هیهات قیتسه تانیا ئوز بالالاری
گوندوز که ایشیق یکسره دنیایه ساتور گون
من گورمورم اما نجه پایانه چاتور گون
هئچ بیلمیورم هاردا چیخور هاردا باتور گون
دریای بلانون کیم اولوب من کیمی غرقی
ظلمت گجه نین گوندوزیلن یوخ منه فرقی
گوندن دانیشان وقته سوزوم قلبیمی داغلور
یادیمه دوشور جدّیم حسین گوزلریم آغلور
بو نیسگیلی قلبیمده ره چارمی باغلور
گون گورمگه من حسرتم آهیله نواده
یاندیردی حسین جسمینی گون کرببلاده
باخ گور سوزومون رشته سی هاردا هارا گلدی
گون شاخدی او قدری ئوزی آخر زارا گلدی
گویدن یاغوب اوت زحمته سایسیز یارا گلدی
زلفون یولوب عمّم توکه اول جسمه یوباندی
ایستی گونون آلتیندا او دورت مین یارا یاندی
اول گون کی بیبیم تلّی انوب مقتله چاتدی
گوزلردن آخان اشکی ئورک قانیله قاتدی
بیلمم نجه اول نعشی گوروب باشه ال آتدی
آغ ساچلارینی یولدی بیبیم مقتله توکدی
یل لر باجینون آغ ساچینا قارداشی بوکدی
زینب دالیسیجا اسرا مقتله دولدی
قیز باجی اوشاقدان بویوکه زلفینی یولدی
تل تل یولونان ساچلار حسینه کفن اولدی
خلعت توخونوب ساچلاری هشتاد بش اسیرین
نیلوردوله قوم اسدین کهنه حصیرین؟
بیر سوز دئیوم الآن ولی اؤز قلبیمه اوخدی
البته حسینون هامیدان محنتی چوخدی
بیر نعمت حسینده واریدی منده او یوخدی
ئولسم منه غربتده عزادار اولان اولماز
ئولسم باشیم اوسته اوتوروب باش یولان اولماز
- شنبه
- 10
- فروردین
- 1398
- ساعت
- 17:7
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه