بارالها دلخوشام بوینومدا کی زنجیریله
گوشه ی زندانیده بو ناله ی شبگیریله
(عشقیوین پابندیم
دلشکسته بندیم)
اوزگه بیر دردیله گر بو خانه ی دل دولماسا
صرصر ظلمیله عمریم گلستانی سولماسا
قیلّام آسوده عبادت سند ظلمی اولماسا
بُلمورم فکری ندور یارب بو بی تقصیریله
هر زمان سند شقی یارب گلنده محبسه
سن بُلورسن نه اذیّتلر ایدور من بی کسه
تازیانه ضرب سیلیله ویرولّر سس سسه
بیله رفتار ایتمیوب صیّاد بیر نخجیریله
نه گلایم وار الهی درد غربتدن منیم
شاکیم نه اولموش آخِر کنج محبس منیم
سن بُلورسن رحمیسیز بیر سنگدلدور دشمنیم
اوزگه رفتار ایلوری بو قامتی خم پیریله
نه یتن وار محبس ایچره بیر نفر امدادیمه
نه باخور هارون دون بو ناله و فریادیمه
نچّه ایللردور که حسرت قالموشام اولادیمه
دلخوشام بونلا بیله سندن یتن تقریریله
سن که آگهسن نه ظلم ایلور منه سند لئیم
حکم ایله بو باره ده ای خالق عدل و حکیم
جبریله مسموم ایدوب اولادیمی قویدی یتیم
بو سوزوم واضحدی بو زهر ایلین تاثیریله
اختیار و صبریمی زهر جفا الدن آلوب
چوخ پوزوب احوالیمی آرام و طاقتدن سالوب
گلمدی اوغلوم رضا یارب گوزوم یولدا قالوب
منتظِر قویدی منی جان اوسته بو تاخیریله
باشی اوسته آختارار هر جان ویرن بیر مهربان
باشینی آلسون دیز اوسته، آغلاسون، ایتسون فغان
گلمدی اوغلوم رضا یارب ویرم آسوده جان
ایلیم دردیمدن آگه مختصر تقریریله
قورتاروب راز و نیازین اولدی یاره جانسپار
اوچ گونه تک قالدی نعشی گوشه ی زنداندا خوار
ایستیوبلر نعشینی زنداندان ایتسونلر کنار
گوردولر جان تاپشوروب بوینوندا کی زنجیریله
کیم گوتوردی نعشینی یردن ایا صاحب زمان
شرح حملی سلب ایدور قلبیمدن آرام و توان
اول مطوّل ماجرانی ایلورم مُجمل بیان
گر منی معذور دوتسان ایتدوقوم تحریریله
آغلارام بو نسگل اوسته اول غریب و بی کسه
دورت نفر حمّال او دمده وارد اولدی محبسه
نردبان تابوت اولوندی اول وجود اقدسه
حمل اولوندی غسل و کفن و دفنه چوخ تحقیریله
بو اسفلی قصّه دن اولدی سلیمان با خبر
آلدی اول نعشی دلده ناگه گوزده اشک تر
ویردی غسلین ایلدی تکفین او شاهه مختصر
شیعه لر تشییعه حاضر اولدولار تکبیریله
چوخ جنازه اوسته اهلی باش آچوب ساچ یولمادی
قلب زینب تک ولی هیچ قلب فغانه دولمادی
هیچ کیمون نعشی حسینون نعشی تک خوار اولمادی
هیچ کیمون جسمی الیله دوغرانمادی شمشیریله
سهلیدور اولموب حسینون نعشینه غسل و کفن
نچّه گون قالدی یر اوسته جسم شاه ممتحن
گزدیروب آت سینه سی اوستونده اشرار زمن
باخمادی عاصی دولوب گَل جسمی زخم تیریله
- یکشنبه
- 11
- فروردین
- 1398
- ساعت
- 12:18
- نوشته شده توسط
- ابوالفضل عابدی پور
- شاعر:
-
مرحوم حسن عاصی تبریزی
ارسال دیدگاه