او دردمند که تاپمور علاج دنیاده
عریضه اشکیله یازسون غریب بغداده
گُل عشقی اولماسا بلبلده آه و زار اولماز
گُلنده گُل اودی بلبلده انکسار اولماز
گُل اوسته قطره ی شبنم سرشک بلبلدور
اگر او آغلاماسا غنچه ژاله وار اولماز
سوروش حقیقت عشقی چمنده بلبلدن
حقیقت اولماسا بلبلده خاره خوار اولماز
محبّت اهلی اولان ماسِوانی گوزدن آتار
تجرّد اولماسا عاشقده افتخار اولماز
اگرکسیلمسه قید علایق کثرت
بشرده اوز اوزینه وحدت آشکار اولماز
غبار آینه نی سیلمسه گوزون یاشی
گوگولده اوز باشنا جلوه ی نگار اولماز
دیمه که عشقیده بی حد ملال و زحمت وار
مذلّت اولماسا گر عزّ و اعتبار اولماز
دایانمیان غم هجرانه وصله یول تاپماز
خیال خامیله عالمده وصل یار اولماز
قدم قوی عالم تجریده اهل وحدتی تاپ
مجرّد اولمیان اشخاص کامگار اولماز
تجرّد عالمینه باخ امام هفتمی گور
او شهریار کیمی عاشق فکار اولماز
معاینه گورورم روضه ی پیمبرده
نماز اوسته دوروب حقّیدن کنار اولماز
تمام ماخَلَقُ اللهی جمله گوزدن آتوب
بلی، امامیده قید دیار و دار اولماز
او شاه دین ایدوب اوز شاهدین او حالیله یاد
او هانسی گوزدی اونی گورسه اشکبار اولماز
باخوردی حالینه هارون کناریدن او شهین
دیدی بونیله منیم ملکیم استوار اولماز
هامی ممالکه سلطان اولور بنی عبّاس
ولی نه قدر وجود امام وار اولماز
نماز اوسته دوتون باغلیون ایکی قولونی
بو شیر بچّه کمند اولماسا شکار اولماز
او قدر قویمادیلار قورتارا نمازین امام
تعجّبم ندن آفاق تار و مار اولماز
نماز اوسته دوتوب قولّارینی باغلادیلار
ایله جفائیله بیر ظلم و انزجار اولماز
امامی گَتدیله فرعون عصر محضرینه
نجه گَتوردیله توضیحه اقتدار اولماز
کلیم عصر اَیاق اوستونده قالدی قول باغلی
کلیمیده او تحمّل او بردبار اولماز
امامه باخمادی بیر ساعته کیمی او دنی
ایله ستمگر و بی شرم و نابکار اولماز
او قدر گِچمدی کبریله قوزادی باشینی
خیاله سالمادی ظلم اهلی رستگار اولماز
تمام غیظیله موسی بن جعفره باخدی
او ماجرانی اگر ایتسم استتار اولماز
پیمبر اوغلونا بیر سوز دیدی پیمبردن
زهی، عجب او زنازاده شرمسار اولماز
نجه دیوم دیدیقی کلمه نی، دلیم یانسون
بُلر دل اهلی ولی مطلب اشتهار اولماز
بو دقر وار که روایتده شَتم عبارتی دور
قلمده معنی الفاظه اختیار اولماز
امام قلبینه دگدی او سوز خدنگ کیمی
پوزولدی حالی ایله تیر زهردار اولماز
دوباره ایلدی بیر حکم بی حیا هارون
بُلوب امامه داخی کیمسه غمگسار اولماز
او حکمیله ایکی هودَج ویروبدیلر ترتیب
او بی حیا کیمی مکّار کین شعار اولماز
امامی قویدولا بیر هودَجه حقارتیله
اسیر هودَجی زرتار و زرنگار اولماز
بیرینی بصریه یولّوب، بیرینی بغداده
امام حالینه بیر کسده اختبار اولماز
امامی اوز قاپوسیندان آپاردی اهل جفا
ایله وداع ایله بیر پراسف گذار اولماز
عیالینی گوره بیر لامحاله قومادیلار
ندن خراب بو دنیای کجمدار اولماز
توکولدی دیشره حرمخانه دن مُخدّره لر
بلی، او وضعی گورن دلده اصطبار اولماز
بونی مدینه ده قوی، کربلا غریبینه باخ
ایله قضیّه ی جانسوز و ناگوار اولماز
گوزیمده جلوه لنور آخِر وداع حسین
عبث گوزوم یاشی رخساریمه نثار اولماز
همینکه بُلدی خانملار گیدیر کمک سیز امام
داخی او گیتماقینا رجعت کِرار اولماز
توکولدولر باش آچوخ فاطمیّه لر یکسر
گر ایتمَسَم آناسیندان من اعتذار اولماز
آرایه آلدیلا دوتقون آیی ستاره کیمی
دوتولسا آی مگر آفاق تیره تار اولماز؟
ایشیق گونوز اولوب آل عبایه بیر شب داج
ئولونجه شیعه لره لیل اولور، نهار اولماز
ایله توکردیله گوز یاشی اهل بیت امام
یقین او شدّتیله بارش بهار اولماز
دیسم قیامتیدی سوز غلطدی، محشرده
او شورش و او فغان و او آه و زار اولماز
تصوّر ایله نه حاله قالور خانم بالالار؟
کبار رام اولی بیر نحویله، صغار اولماز
مُحَجَّبات ویروب سس سسه دیردی تمام
حسین! سنون کیمی بیر مهربان نگار اولماز
بیزی بو دشمن ایچینده قویوب هارا گیدوسن؟
سن اولماسان بیزه بیر کسدن انتصار اولماز
ولیّتُ الله صغری، بتول نائبه سی
گوروب محبّت اولان یرده شرم و عار اولماز
یوگوردی قارداشینون بوینونا قولین سالدی
دیدی حسین منه بوندان صورا وقار اولماز
وقار و عزّت زینب بو چولده بیر سنسن
سن اولماسان داخی بو روح مستعار اولماز
سن ئولسن اهل جفا قیزلارون سویار یکسر
حیالی قیزلاریوا حایل عذار اولماز
اَلیوی قلبیمه قوی بلکه بیر دوتا آرام
بو غملریله گوگلده داخی قرار اولماز
گَلوب تکلّمه مظلوم امام ویردی جواب
خدا عزیزی، آنام باجی سوگوار اولماز
بونی اوزوم بُلورم من شهادته یِتسم
سیزون باشوزدا داخی چادر و خمار اولماز
شقیدی شمر، دیمز فاطمه قیزی زینب
جهازسیز دَوِیه باش آچوخ سوار اولماز
ولی گرک دوزه سن، باش آچوخ اسیر اولاسان
اسیر اولماسان اثبات کردکار اولماز
باشیم دولانماسا نوک جداده شهر به شهر
بابام شریعتی دنیاده پایدار اولماز
سنون اسارتون اِکمال ایدر شهادتیمی
اسارت اولماسا، حاصل مآل کار اولماز
شهادتیمده منه سن شریک اعظم سن
سن اولماسان منه بو کربلا مزار اولماز
سن اولماسان اود ایچینده یانار علیل اوغلوم
جهاندا حجّت اگر اولماسا مَدار اولماز
بالامی کوفه ده سن اولماسان ایده لّه شهید
منه بو عالم امکاندا یادگار اولماز
دونر کِنِشته مساجد، اذان اولار ناقوس
رواج مذهب اسلام زینَهار اولماز
گرک دمشقیده حقّیّتیم اولا ثابت
عبث گیرنده باشیم شامه سنگسار اولماز
گدای کوی حسین اولمیان #حسینی یقین
گَلَنده محشره سلطان تاجدار اولماز
اَیا امام زمان صبریمیز تمام اولدی
اماندی گَل، بو قدر صبر و انتظار اولماز
- یکشنبه
- 11
- فروردین
- 1398
- ساعت
- 12:36
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه