گل باغ حیدر یاموسی بن جعفر
عزیز پیغمبر غریب بغداد
قالان ای بحراندا اون بیر ایل زنداندا
ائدن اهل عشقی بلادن آزاد
واویلا واویلا(۳)مظلوم آقام وای
سنی بی دین هارون سیه چاله سالدی
بالالارون قالدی وطنده دلگیر
ایکی قوللار باغلی یانان سینه داغلی
ایاقونده کنده بوینوندا زنجیر
گجه لر راز اوسته راز و نیاز اوسته
زندانی دولدوردی نوای تکبیر
واویلا واویلا...
یوخودی همدردون رضانی سسلردون
دیردون گل اوغلوم بو حاله آغلا
اورک احساسین گور زنجیر یاراسین گور
گتور الده دستمال یارامی باغلا
گلِ آل هاشم قان اولدی گوزیاشم
غریبلر شهرینده منه یاس ساخلا
واویلا واویلا...
گوزونی معصومه یولا هرگون تیکدی
انتظارون چکدی آتامی گلسون
دله طوفان سالدی گوزی یولدا قالدی
یوخیدی امکانی اورک دینجلسون
چاغوراردی هر دم گل ای فخر عالم
یاخوندی هجرانون بو قلبی دلسون
واویلا واویلا...
بابا بو منزلده صفا یوخدی سنسیز
نوا یوخدی سنسیز یانان بلبلده
تالان اولدی باغلار مدینه قان آغلار
طراوت یوخ سنسیز چمنده گلده
اوزوب سندن ال باب الحوائج گل
علینون قیزلاری قالوب مشگلده
واویلا واویلا...
سنی یولا سالدیم رقیه تک قالدیم
بابا دیه دیه اورک قان اولدی
اونا چاتماز اما منیم دردیم بابا
اوقانلی باش گوردی بولود تک دولدی
دئدی ای دلداریم سفرکرده یاریم
بو گلدن زیبا یوز هایاندا صولدی
واویلا واویلا...
گل عذاریم لایلای هواداریم لایلای
قالان باشی الده شکاریم لایلای
دوداقونده یاره گلوبسن دیداره
سنی گوردوم گئتدی قراریم لایلای
باشیوی کیم کسدی قرا یللر اسدی
خزان اولدی سنسیز بهاریم لایلای
واویلا واویلا...
بابا بو نه حالدی عموم هاردا قالدی
قوشونسوز سرداریم نیه تک گلدون
یومولوب مژگانون گئدوب ازبس قانون
فراقون تیریله بو قلبیم دلدون
منی گوزدن آتدون کوللر اوسته یاتدون
تنور خولیده نجه دینجلدون
واویلا واویلا...
- یکشنبه
- 11
- فروردین
- 1398
- ساعت
- 15:20
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه