قافلۀ غم دوزولدی
سمتِ رَهِ نینوایه
وقت او وقت اولوب که گلسین
فاطمه چو نی نوایه
اول مریضه گوردی ناگه
جلوه لندی پرتو نور
صحنِ خانه‌یِ پیمبر
اولدی رشگِ وادیِ طور
چون کلیم او نوری گورجک
غش ائدیب او زارِ مهجور
هوشه گلدی مثلِ موسی
تکیه ایلدی عصایه
دوشدی تا گوزی حسینه
باشلوب اُول زمان شکایت
سویلدی مگر ائده لَّر
ناخوشی بئله عیاد‌ت
بیلمیر‌م بو گون نه گوندور
یوز وئریب منه سعاد‌ت
روز و شب بو گوند‌ن اوتری
ال گوتورموشم دعایه
وصلون ائتمیشم تمنّا
چون خدای لم یز‌لد‌ن
یئتمیشم مراده قویمام
دامنِ وصالون الد‌ن
قوی گوروم یوزون دویونجا
قورخارام بابا اَجَلد‌ن
هجریوی فلک مبادا
توش ائده بو مبتلایه
ایلیوب اونی او سرور
قصّۀ سفرد‌ن آگاه
آیریلوق آدین ائشیتجک
قلبید‌ن او چکدی بیر آه
عرض قیلدی چون گئدیرسن
ای بابا منی سن الله
بو مدینه ایچره تاپشور
اُول عمویِ با وفایه
سویلیوب قیزیم وفا یوخ
گردشِ سپهرِ دوندا
ایلمه غریق چشمون
بو سرشگِ لاله گوندا
منیله گئدیر عراقه
بو مدینه دن عَموندا
آفتابید‌ن گورونمز
آیریلا جهاندا سایه
عرض ائدیب بابا گئدو‌رسوز
ایندیکی هامی زن و مرد
درد الیندن عابدینون
من تک عارضی اولوب زرد
بس گلون اونی آپارمون
من اولوم اونیلا همد‌رد
میل ائد‌ر همیشه چونکی
برگِ کاهِ کهربایه
فاطمه دئدی خلاصه
هر جوانِ نامرادی
دفترِ سفرده گوردی
ثبت اولوبدی بیربیر آدی
عرض ائدیبدی واردی بولَّم
بو سَفَرون امتدادی
باری قوی سکینه قالسون
تا وئرک صدا صدایه
شاهِ دین بویوردی سیلِ
اشک ائوینده دورماق اولماز
شیشۀ دلِ حزینه
سنگِ هجری ویرماق اولماز
بو سکینه نی ئولونجه
لیلی دن آییرماق اولماز
آنا بالاسیز دؤزنمز
کربلاده هر بلایه
تنگه گلمه هِجر الیندن
صبر ائله قیزیم فراقه
صحّت تاپاسان بو غمدن
آخر دوراسان ایاقه
یولّارام علیِّ اکبر
گتیرور سنی عراقه
آغلاما بو اشک چشمون
عالمی وئرور فنایه
امر ائدوب شه مدینه
اشجع شجاع جوانلار
خانۀ رسوله سالسون
گون کیمی شعاع جوانلار
اُول مریضه نی دویونجا
ایلسون وداع جوانلار
قالاجاقلا چونکه حسرت
حشره تک او بینوایه
بستر غم و بلاده
فاطمه نه گوردی اوَّل
یوز قویوب گلور عموسی
هم مسلَّح و مکمّل
سویلدی گوزون فداسی
هاردا قالموسان عمو گل
نقد جان نثار ائدوم تا
عجزیله بو خاکپایه
اگلشوب قولون او سرور
ایلدی چو زیب بالین
حال ائوینده حالتیله
بیر به بیر سوروشدی حالین
سویلدی دویونجا دور گور
فاطمه علی عیالین
باغلانوب قطار محمل
کوچ ائدولّه کربلایه
بیرده چون باخوب نه گوردی
یوسف مدینه اکبر
خانمان مصطفایه
داخل اولدی چون پیمبر
سویلدی بئله گلولَّر
باجون ئولسون ای برادر
بو نه آیریلیقدور ایستر
کیم فلک سالا آرایه
ـــــ
افراد:
بو گجه عرش برینه یتوبدور افغانیم
علی دئمکدن علی آز قالوب چیخا جانیم
بو گئجه صبحه کیمی یاتمادوم منِ خسته
دئدیم صباح گلور اکبریم باشیم اؤسته
آنام ئولوبدی منیم یوخ یانیمدا بیر دیّار
روا دگُل بو قَدَر منتظر قالا بیمار
گلینجه سن منی تاپسا اگر اجل قارداش
قبول زحمت ائدوب قبریم اوسته گل قارداش
الون مزاریمه قوی ایله روحیمی راحت
تلاوت ائت منه بیر عشر آیۀ رحمت
صفا گتورموسن ای کاکلی سمن قارداش
منِ علیله اولان زیب انجمن قارداش
نه ائتمیشم سنه من گلمیسن عیادتیمه
اَل اؤزموسن منِ بیماریدن ندن قارداش
علیل و بیکس و بی یار و یالقوز ائولرده
نه وار قاپومی آچان بیر گلوب گئدن قارداش
نه جرم ایلمیشم سالمیسان منی گوزدن
مگر گلِیلیمی واردور سنه دییَن قارداش
بو قدری بولمزیدون بی وفالیقون رسمین
سنه بو قاعده نی کیمدور اؤرگَدَن قارداش
(پایان افراد)
ـــ
اُول مریضه نی وداع چون
ایلیوبدی هر مسافر
نوبتِ وداع یتیشدی
قاسمِ جوانه آخر
گوردی قاسمی گیینمیش
اگنینه لباسِ فاخر
سویلدی چوخ اوخشوسان سن
ای عم اوغلی کدخدایه
قاسمه باخاردی گوردی
زینبون گلور صداسی
داخل اولدی اول سیرایه
اگننده سفر لباسی
عرض قیلدی خوش گلوبسن
ای یتیم لرون آناسی
آناسیزلقدان گلایَم
واردی عمّه بی نهایه
ـــــ
افراد:
بو گون همان گونه بنزر که قلبیمیز یاندی
دیار کوفه ده حیدر باشی قلجلاندی
گیروب کجاویه زینب شکسته دل قالدوخ
نجه که فاطمه تابوتینی یولا سالدوخ
بتول قبرینه کیمسه گلوب گئدن اولماز
گلینجه عمَّم او قبرین توزین سیلن اولماز
(پایان افراد)
ـــــ
چون منی قویوب گئدیرسیز
ایندیکی مدینه دن سیز
بو سفرده غفلت ائتمین
باری بو سکینه دن سیز
حفظ ائدین اونی ای عمّه
ظلمِ اهلِ کینه دن سیز
قویمیین گلینجه یئتسین
درد و غم او مه لقایه
کیمسه دن بو دردِ جرمون
ممکن اولسا گر علاجی
کُلِّ عالمون حسینه
وار جزاده احتیاجی
روزِ حشریده گمانیم
یوخ بیر اوزگه زاده «#راجی»
اشکِ چشمِ خون فشاندا‌ن
توشه جمع قیل جزایه
ـــــــــــــــــــــــ
- پنج شنبه
- 15
- فروردین
- 1398
- ساعت
- 19:18
- نوشته شده توسط
- ابوالفضل عابدی پور
ارسال دیدگاه