اولوب گر چه یریم زندان الهی
خوشام زنداندا وئرسم جان الهی
منی هارون ائدوب غربتده محبوس
گئجه گوندوز غم و دردیله مأنوس
حیاتیمدن ائدوب بالمرّه مأیوس
رضایم مرگیمه هر آن الهی
رطوبت یر قرانلوق کنج زندان
آدی زندان اوزی بیر چاه ویران
وجودیمدن گئدوب آرام و امکان
اولوب ظلمیله باغریم قان الهی
بو حبس خانه ده بی حد غمیم وار
یانمدا نه اوغول نه محرمیم وار
نه غمخواریم نه یار و همدمیم وار
انیسیم دیدۀ گریان الهی
دگل بیجا بئله پوزقوندی حالیم
آخار رخساریمه اشک زلالیم
گوزی یولدا قالوب اهل و عیالیم
چتیندور محنت هجران الهی
وئروب هارونه باش مندن نه تقصیر
ائدور صبح و مسا قتلیمده تدبیر
ووروبدور بوینوما زنداندا زنجیر
ائدوب غم قلبیمی سوزان الهی
اوجالسا وار یری عرشه فغانیم
فشار کنده دن گئتدی توانیم
چخا ای کاش زنجیر آلتدا جانیم
اولام راحت منِ نالان الهی
منی سند ابن شاهک گتدی جانه
ترحّم ایلمز من ناتوانه
وورار گونده منه چوخ تازیانه
ائدر ظلمنده چوخ طغیان الهی
اگر چه آتش ظلمیله یانّام
ولاکن صبر ائدوب یانّام دایانّام
بو قدری جور و ظلمی سهل سانّام
یتشسون کامینه عدوان الهی
دوشر جدّیم حسینون حالی یاده
وئرنده جان دیار کربلاده
گلوردی نی کیمی فریاد و داده
عطشدن اول شهِ عطشان الهی
آلوب اطرافینی یوز مین ستمگر
الینده داش قلج اوخ نیزه خنجر
او قدری ووردیلار یاره سراسر
اولوب گل پیکری خندان الهی
قفادن کسدیلر باشین لب عطشان
چاپوب آت سینه سینده قوم عدوان
قالوب اوچ گون یارالی جسمی عریان
قوم اوسته قانینه غلطان الهی
تالاندی خیمه سی گئتدی جلالی
اولوب غارت هامی مال و منالی
اسیر شمر اولوب بیکس عیالی
اولوبدی عالمی ویران الهی
صباح و شامی «#صحاف» الده خامه
یازار نوحه او شاه تشنه کامه
یتور کامه یتوب عمری تمامه
اولا تا دردینه درمان الهی
ــــــــــــــ
سبک بیا یابن الحسن آرام جانم
واگیر 1 برای این سبک
غریبه عالم آغلار
دوتاندا ماتم آغلار
نوا باشلار ملک لر
سزیلدار آدم آغلار
چتیندور محنت هجران الهی
واگیر 2 برای این سبک
غریبه باغلار آغلار
گوروکن داغلار آغلار
گوی اهلی وای دیئنده
گوزونی باغلار آغلار
چتیندور محنت هجران الهی
واگیر 3 برای این سبک
غریب آغلار، یل آغلار
گل اوسته بلبل آغلار
گوزون یاشین توکنده
گلوب درده ، دل آغلار
چتیندور محنت هجران الهی
- پنج شنبه
- 15
- فروردین
- 1398
- ساعت
- 19:38
- نوشته شده توسط
- ابوالفضل عابدی پور
- شاعر:
-
حاج محمد حسین جنتی مقام
ارسال دیدگاه