علم ووردی مکانه لامکاندان سبط پیغمبر
گوروندی کون و امکاندا جمال جلوه ی اکبر
جمالی کُنتُ کَنزاً- آشکار اولدی معناده
شه اَحبَبتُ اَن اُعرَف- نشان ویردی رخ انور
شعاع نور لاشرقی و لاغربی عیان اولدی
بو قطبه عالم لاهوت و ناسوت اولدولار محور
حسین ابن علی نوری جهانی ایتدی نورانی
نگار مختفی اولدی ایشیقلی گون کیمی اظهر
تراب یثربه قویدی قدم تا بوتراب اوغلی
مقام خاکی ایتدی آرزو بو گنبد اخضر
اِله لَم یَلِد اوز آیتین گوستردی آفاقه
خدای لایُرایه اولدی ظاهر مُظهِر و مَظهر
جمال الله اعظمدور بو سرور عالم اکبر
عجبدور ویردی گنجایش اونا بو عالم اصغر
گَتوردی غیبیدن دارالشُّهوده صانع بی چون
صفات اللهه آئینه، لقاء اللهه بیر محضر
فلک لر بو احاطیله کیچیک بیر حلقه بابینده
ملک لر جوّ قدسینده به سان پشّه ی لاغر
عَدَم برجیندن اولدی جلوه گر بیر کوکب هستی
که نوریندن اونون کسب ضیاء ایلر خور خاور
بو نورین اولماسِیدی جلوه سی گون خلق اولونمازدی
بو نورین جلوه سیندن گون اولوب افلاکیده اَغبَر
باباسی کارگاه آفرینشدن ازل صادر
آتاسی اسم اعظم، خلق اولونموش آدلارا مصدر
علیّ المرتضی مرآت ربّانی بونا والد
آناسی عصمت کبری اُناث عالمه مفخر
زجاجِ نور یرده فاطمه- گویلرده منصوره
بهشتین زینتی زهرا- بو نور مطلقه مادر
بو بیر عود بهشتی دور- یر و گوی عالم لاهوت
تاپار عزّ و شرف اولسا بو عود جنّته مِجمَر
بونون فرمانینه مُذعِندی انس و جنّ و موجودات
بساطینده سلیمان حشمت الله کمترین چاکر
کنایه صورتیندن معنی والشّمس قرآندا
اشاره تار زلفیندن اولوب واللهیده مُضمر
ووراندا موج دریای ولایت بطن زهرادن
بلی- زیبنده دور چشم جهان گورسون بیله گوهر
بهشت عَدندن گَلدی بو نوره قابله، زهرا
تقاضا ایتدی حقدن جبرئیل اولسون بونا نوکر
بُلوردی بیر سودا یوخدی لیاقت خالق یکتا
امین وحیه امر ایتدی آپار جنّاتیدن کوثر
سویی سن توک حسینون تار گیسوسین یوسون جدّی
او زلفی که ایدر غبطه اونا مشک تر و عنبر
او باش که اوندا بو عزّت بو شوکت بو شرافت وار
روادور بالشی اولسون او باشین خاک و خاکستر
حسینون باشی مطبخده، یزیدین تاج باشینده
نه حکمتدور خداوندا توکولموب یرلره گوگلر
دگول مقصد "حسینی" بوردا ذکر مطبخ خولی
بودور مقصد حسینون آدی اولسون زینت دفتر
بو باشدور ایلین باشی اوجا اسلام و قرآنی
تشیّع عالمینده با شهامت قائد و رهبر
دیانتده، شجاعتده، سیاستده، شهامتده
حسینون مثلینی بدو جهاندان گورمیوب گوزلر
حسین شخصیّتین، جانین، منالین، اهلین، اولادین
خدایه وقف ایدوب، دینه ویروب جاه و جلال و فر
ووران ساعت ایشیقلی گون کیمی باش چرخ عزّتدن
یره قویدی یوزین عرض ایلدی ای خالق داور
قضایه راضیم تسلیم محضم امریوه یارب
منه یوخ ماسواللهده مَلاذ و ملجاءِ دیگر
حبیبیم سن، طبیبیم سن، سنه وابسته دور گوگلوم
ایکی دنیاده غیر از سن یوخومدور بیر نفر دلبر
اوزون آگاهسن لفظ بلایه من بلا ویردیم
رضایم اکبریم دوغرانسا، اوخلانسا علی اصغر
گلستان ایلرم اوز جسمیمی شمشیر و خنجردن
جبینیمده آچار سنگ فلاخون لاله ی احمر
سِنانه بوستانِ سینه ده چون سرو یِر ویرّم
گویردَر سینمین صَحنینده اوخلار سنبل و ضَیمر
بنای دینیوی اوز قانیمیله ایلرم محکم
آدیم تا واردی دنیا مرز اسلمه اولار سنگر
حسین ابن علیدن ای «حسینی» ایله استدعا
قیامتده دیسون یارب «حسینی» دور منه نوکر
- پنج شنبه
- 22
- فروردین
- 1398
- ساعت
- 11:10
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
ارسال دیدگاه