قویدی بو فنا عالمه قدم
وجه باقی لم یزل حسین
ایلدی منوَّر بو عالمی
گون جمالی گلدن گوزل حسین
هم اوزی گوزل هم آدی گوزل
هم آتا آناسی گوزل حسین
یار و آشناسی گوزل حسین
واگیر:
ای عزیز زهرا مقدمون مبارک
افتخار دنیا مقدمون مبارک
ایستدی خدا اهل عالمه
بؤلدوره حسینون جلالتین
جبرئیله امر ایتدی آرتیروب
باغ جنتین زیب و زینیتن
ایلدی جهنم اودین خموش
آلدی اهل دوزخ حرارتین
چون مزیّن ایلوب بو عالمی
صبح وقتی صبح ازل حسین
جلوۀ جمالِ منوری
یر یوزین ایدوب رشگ طور حق
ایلدی همین نوریدن او گون
طورده کلیمه ظهور حق
قویدی سجدیه مه جبیننی
آچدی دل ثنایه او نور حق
ذات حقه ویردی شهادتین
ذات حق تک بی بدل حسین
گلدی گر چه لعیا بهشتدن
اولدی بو شه دینه قابله
لیک حاضر اولموشدیلار هامی
بانوان عز و مجلله
آلدیلار حسینون قماطنی
افتخاریله بیر به بیر اله
شأنه باخ خواتین جنتین
گزدی اللرین ال به ال حسین
گوردیلر ترو تازه رنگ آچوب
آل هاشمون نو بهارینی
اوپدیلر او مولود اقدسین
گل کیمی شکفته عذارینی
خاتم النبیین گلوب گوره
درّ مایه افتخارینی
اشتیاقیله آچدی قولارین
سویلدی قوجاقیمه گل حسین
آلدی نور عینین قوجاقینه
ختم الانبیا سرور عباد
هرایکی قولین سالدی بویننا
اوپدی گل یوزیندن اولوبدی شاد
نور نورله اولدی متفق
ویردی جدینه دست اتحاد
عهدنامۀ ذرّده اولان
شرط عهده صاحب عمل حسین
میل ایدوب سر انگشت میم دن
شیر با صفا معنوی غذا
ایلدی احاطه او حضرتین
کل عضوینی خون مصطفی
قول ویردی جدی پیمبره
محو ایدنده اسلامی اشقیا
حکم دین و قرآن منزله
قویمیا یتیشسون خلل حسین
دسته دسته نازل اولوب یره
گوگلرین سراسر ملک لری
باشینه حسینون دولاندیلار
ایتدیلر زیارت او سروری
تهنیت دیین تسلیت ویرن
آغلادوب بتول و پیمبری
اولین وصالنده ایلدی
نار فرقتین مشتعل حسین
حاملان عرش عرض ایدوب خدا
تاپدیلار هامی بو سعاتی
بیزلره نصیب اولمادی نه دن
سوگلون حسینون زیارتی
یا اجازه ویر بیز نزول ایداخ
یاکه عرشه ایسته او حضرتی
بیزلری او فیض زیارته
ایلسون بو گون مشتعل حسین
امر اولوندی دربار قدسدن
جبرئیله سن نازل اول یره
جامۀ بهشتی آپار اوزون
بوک حسینی دیبای احمره
تیز گتور قماط حسینیمی
زیب ویرماقا عرش اکبره
جدی تک مبارک قدومیله
طاق عرشه ویرسون حلل حسین
واریانوندا یارب حسینوین
بو قدر جلال و شرافتی
بس نیه او گون رحم ایتمدی
اصغرینه کوفه جماعتی
غنچه تک اونی گاهواره دن
سولدوروب سوسوزلق حرارتی
امدی دل دوداقین تاپانمادی
سو ویره اونا لااقل حسین
گوردی بلبل پرشکسته نون
نطقی یوخدور آلدی قوجاقینه
حوض کوثرون صاحبی گلوب
رزمگاهده سو سوراقینه
بیرخدنگ مسمومیله چخوب
حرمله او طفلین قباقینه
اوخلانان بالانی آنا سنه
قیتروب ویره ما حصل حسین
اوغلون اکبرین جاننه سنی
ویرم ای شه کربلا قسم
دل شکسته صحاف بی کسم
رنجه قیل قدم ایله بیر کرم
باشیم اوسته گل جان ویرن زمان
صون نفسده بیر گل یوزون گورم
اوندا که گلور قبض روحیمه
باشیم اوسته پیک اجل حسین
- جمعه
- 23
- فروردین
- 1398
- ساعت
- 14:30
- نوشته شده توسط
- ابوالفضل عابدی پور
- شاعر:
-
حاج محمد حسین جنتی مقام
ارسال دیدگاه