بیشۀ عشقیده تکتازیدی عباس علی
یل یل ِ حارب و ممتازیدی عباس علی
بی رمق دملره دمسازیدی عباس علی
شاهپرسیز اوجا شهبازیدی عباس علی
یارادان قامتینی گور نه دل آرا یارادیب
سینه سین منزلت و عشقیده دریا یارادیب
کربلا هنگینه سرلشگر و سقا یارادیب
صیحۀ موجیله همرازیدی عباس علی
نئجه،شهلا گوزه صورتده قلم قاش یاراشار
طُرّۀ حوری ِ غِلمانه هُریهْ ساش یاراشار
ائله ، دنیاده حسینه بئله قارداش یاراشار
بولور عالم نئجه سربازیدی عباس علی
گوستره بیر یول اگر قاشلارینین آخماقینی
یا اگر گورسه ده شهلا گوزیلن باخماقینی
نه زلیخا خود یوسف ده کسر بارماقینی
حُسن طلعتده ده تکتازیدی عباس علی
وجه فتّانه ده مژگانلارا اخگردی گلور
رَطل احساسی طِلِسماته مسخّردی گلور
قامتین کیمسه گورور سسلَوری حیدردی گلور
بس کی رزم آور ممتازیدی عباس علی
بو همان شه دی گدا آچسا الین آنی باخار
چاره سیز درد اولانا تا اولا امکانی باخار
یا حسین سسلیه نین دردینه مجّانی باخار
قاپوسی سائل ایچون بازیدی عباس علی
ای «مصیّب» قلمین اوج شرف دن دانیشار
شعلۀ عشق ِ ابوالفضلیله دائم یانیشار
((کیم چتین مشکله دوشسه اتگیندن یاپوشار))
مرتضیٰ تک ایشی اعجازیدی عباس علی
- چهارشنبه
- 28
- فروردین
- 1398
- ساعت
- 13:23
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه