ساقيا باده گتور عشق ائوى آباد اولدى
شادلیق ايّامى گلوب غم ائوى برباد اولدى
سرخوش و مست ائله عشّاقى شغف جاميلن
گنه ديلّرده سرور و شعف ايجاد اولدى
آشنا چیخدى بيزه وجد و سرور و شادى
غم و درد و الم و غصّه بيزه ياد اولدى
بلبلا شور حجازى اوخى شوقيله بو آى
اوچ گولون عطرى گلور موسم اعياد اولدى
گولّى كوينك گينوب دشت ودمن، باغ و چمن
غمزده قوشلاراوچوب غصّه دن آزاد اولدى
شهرشعبانين اوچى،دوردى، بئشى خوش گوندى
دالبادال اوچ گونى اوچ سروره ميلاد اولدى
اوچومنجى آقاميز گلدى اوچونده بو آيين
او گوزلّر گوزلى مفخر اجداد اولدى
گونون آريديجا بنى هاشم آيى سيره چخوب
حضرت امّ بنين صاحب اولاد اولدى
شهربانو كه بيز ايرانّيلارين مفخريدى
او غفيفه آنادان حضرت سجّاد اولدى
شاه ايران قيزى، بطحا شهينه اولدى گلين
ائله شهزاده خانمدان بئله شهزاد اولدى
زينب آغوشه آلوب قارداشينون دلبندين
دئدى عمّون سنه قربان اورگيم شاد اولدى
باخدى مولوده حسين گولدى ولى "ثُمَّ بَكى"
دئدى بيلديم آناسى عازم ميعاد اولدى
اوغلونون آدين على قويدى،على‌اوغلى حسين
ائشيدنلر دئدى به به نه گوزل آد اولدى
وقت اولوب ايليه تزويج، آلوب فاطمهنى
اوز عموسى حسنه حُسنونله داماد اولدى
گر صفاتين سايابيلسون بيله جكسن آیدین
گوزل اجدادى كيمى مجمع اضداد اولدى
چوخلى سجده ائله‌دى سجده ائدنلر آقاسى
لقبى حشره كيمين زينت عبّاد اولدى
هره بير مجلسه يا بير زادا معتاد اولار
شكرللَّه كه «بشير» هيئته معتاد اولدى
- پنج شنبه
- 29
- فروردین
- 1398
- ساعت
- 12:12
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه