یابن الحسن انیسم
افغانه آیریلیقدان
دوندی یارالی قلبیم
القانه آیریلیقدان
بیر عمردور که درد هجرانه مبتلایم
لطف ایله بی پناه و بی چیز و بینوایم
سن شاهسن جهانه من مستحق گدایم
ال آچمیشام قاپوندا احسانه آیریلیقدان
ای نور چشم زهرا هجرونده اشکبارم
شاید گورم جمالون دائم امیدوارم
هر جمعه گون باتاندا گوز یولدا انتظارم
قلبیم یانور شرار سوزانه آیریلیقدان
وئرّم قسم او قولسوز سقای کربلایه
یا آخرین نماز سلطان نینوایه
یا قاسم اللرینده خشکیده قان حنایه
گل سالما شیعیانی طوفانه آیریلیقدان
قلبینده ساخلیوبدی سوزنده کوزلر عمّون
گل قوی سنه دانشسون چوخ اوتلی سوزلر عمّون
الان سنی پریشان قبرینده گوزلر عمّون
گل قویما گلسون عمّون افغانه آیریلیقدان
سؤز یوخدی درد هجران دلدن سالاندی مولا
سنسیز خیام صبر و تابیم تالاندی مولا
سنسیز نه خیری واردی عمروم یالاندی مولا
گل قویما اولسون عمروم افسانه آیریلیقدان
گلزار طاقتیمده بحراندی یابن زهرا
بحر خیالیم ایچره طوفاندی یابن زهرا
صحرای انتظاریم سوزاندی یابن زهرا
گل سالما اوت بو قلب سوزانه آیریلیقدان
سن بیل غریب حسینون اول قانلی دستمازی
محراب قتلگهده اول آخرین نمازی
ظلمیله سجده گهده منحور اولان بوغازی
اولما رضا سویونسون بیگانه آیریلیقدان
- سه شنبه
- 3
- اردیبهشت
- 1398
- ساعت
- 11:56
- نوشته شده توسط
- ابوالفضل عابدی پور
- شاعر:
-
مهدی قلندری اردبیلی
ارسال دیدگاه