یابن الحسن آدوندا که اسراره مرحبا
دُرج دهنده رَشحه ی گفتاره مرحبا
زیبا پدیده خلق ائلیوب خالقون سنی
صورت چکن هنرور قهّاره مرحبا
پیکر تراش جوهروی نوریدن توکوب
سنده اولان تجلّی انواره مرحبا
حور و ملک گورنده رخ بی مثالوی
بشاش اولوب دیر حق داداره مرحبا
فخر ایلیر الوندن ئوپه ساکنان عرش
به به بو شأن و رتبه ی سرشاره مرحبا
صحن چمنده سرو چمان گورسه قدوی
سویلر بو نقش خامه ی اسراره مرحبا
حُسن جمال انوروه تای چکیلمیوب
بی همطراز او صورت گلناره مرحبا
تفسیر ائدوبدی کان زَهوقانی خلقتون
یُمن قدملرونده کی آثاره مرحبا
مُشک خُتنده یوخدی سنون عطری زلفوون
نکهت فزا او طرّه ی طرّاره مرحبا
گون اذن آلوب اگر باخا بیلسه جمالوه
مفتون اولوب دیر بئله رخساره مرحبا
آی آلنوی گورنده خجالت تری توکر
تزتز دیر بو ماه کُله داره مرحبا
رنگین کمان عرش وجاهتدی قاشلارون
تصویر بی نظیره و معیاره مرحبا
دام نگاهون آهوی جنّاتی صید ائدر
شهلا گوزونده جذبه ی بسیاره مرحبا
رنگ و جلانی سُرمیه کپریکلرون وئروب
مژگان تیز و سرمه نموداره مرحبا
صراف عشق باخسا او حمرا دوداقوه
اظهار ائدر بو گوهر شهواره مرحبا
سویلر بو قَدر لَعلی بدخشاندا سیندیرار
بو لعل کنز احمد مختاره مرحبا
مصر وجاهتونده ملکلردی مشتری
کالای عشق و خبره خریداره مرحبا
یوسف محالیدور وئره قیمت جمالوه
حُسن جمیل و گرمی بازاره مرحبا
قویدون قدم او لحظه که دامان نرگسه
حورا دئیوبدی بختینه صدباره مرحبا
نرگس قوجاقی ناز ائلدی کهکشانلارا
باخدی دئدی بو طفل لبن خواره مرحبا
میلادی ایلدی منی عالمده سرفراز
بو نازنین هدیّه ی دلداره مرحبا
ای منتظَر بو منتظِرانون سروریلن
فریاد ائدلله حُسن رخ یاره مرحبا
سنسن امیدی شیعه لرون ای امام عصر
سن تک ولیّ و صاحب درباره مرحبا
جدّون علیدن ارث یتوب معدلت سنه
نائب مناب حیدر کرّاره مرحبا
من مدحوی دیینده حسودون چیخار گوزی
عارف دییر بو شاعر و اشعاره مرحبا
جاهل همیشه رسمیدی که داشلار عالمی
دانا ولی دیر گُله گلزاره مرحبا
ای کور دل اینان گُلی الله گُل ایلیوب
هئچ کیم گورونمیوبدی دئسون خاره مرحبا
خبره بیلر تفاوتینی خاریلن گُلون
سوز خبره سی بو هیئت هشیاره مرحبا
دوندرمه ای قلم سوزوی مدح یاریدن
فریاد ائله بو سرور و سالاره مرحبا
دین پرچمین او گونکی اوجالدار بو منتقم
حق اهلی سسلنر بئله سرداره مرحبا
تا مسند عدالتون اوسته ائدر جلوس
عالم دیر بو شاه جهانداره مرحبا
سالدی الینده شعشعه تا ایری ذوالفقار
سس قوزانار بو تیغ شرر باره مرحبا
حقون بشیری عدلینه گوگلرده سس چکر
مظلومیلر او لحظه ده راحت نفس چکر
یا سیدی ظهور ائله مُلک جهانی آل
صاحب زمانه سن اله سیر زمانی آل
مرحب یخان قلنجی کنار ائت نیامیدن
صاق پنجه وه او اسلحه ی جانستانی آل
بو درد دیلدی من یازورام عفو ائله منی
سن خبره سن سوزومده که فنّ بیانی آل
سانما سوزومده واردی جسارت حضوروه
درویشووم دلیمده کی سوز نهانی آل
اوّل قصاص محکمه سین قور مدینه ده
حق و حقوق محسن و خیرالنسانی آل
سیندیر او ال که فاطمه نی ویردی کوچه ده
غاصب خلیفه دن ید جور و جفانی آل
بعد از مدینه اولساحضورونده مصلحت
تعجیل ائله حکومت کرب و بلانی آل
چک پای میز عدله قوناق ئولدورنلری
نامردی قیل محاکمه خون خدانی آل
کس نیزه ده یارالی باشا داش ویران الی
هم انتقام زینب قامت کمانی آل
شمر و سنان و خولیه وئر کیفر ستم
نوفلدن انتقام سر قهرمانی آل
شاد ایله روح لیلینی ییخ مُنقذی یئره
قهّار الونله خون شهید جوانی آل
گور کیم گلین قیزون چیخادوب گوشواره سین
شمشیریلن غرامت نو کدخدانی آل
تأخیره سالما حرمله دن انتقاموی
اوندان خبر قضیّه ی تیر و کمانی آل
گور شیرخواری هانسی گناهیله اوخلیوب
ویر گردنین قصاص گُل و باغبانی آل
بیرده خانم رقییه سیلی ویرانلاری
سال بنده خون دختر شیرین زبانی آل
یاصاحب الزمان دیورم دردیمی سنه
هرکیم منه داش آتسا الیندن توانی آل
آغلار گجه گونوز سنیلن «سیفی» شاعرون
وئر قدرت قلم حسدیم اولسا آنی آل
فخر ایلورم گدالیقیما درگهونده من
ای شاه عنایت ایله سلام گدانی آل
- چهارشنبه
- 4
- اردیبهشت
- 1398
- ساعت
- 11:4
- نوشته شده توسط
- ابوالفضل عابدی پور
- شاعر:
-
سید تقی سیفی اردبیلی
ارسال دیدگاه