مهدینی شیعه چاغور تا ئورگون دینجلسین
آز قالور سینه لری تیر ملامت دلسین
یالوار اللهه او ائللر گوزلی تئز گلسین
روز موعود ئورکلر سُوونوب دینجله جاق
ایسته ساخدا گله جاق ایستمه ساخدا گله جاق
مهدینی ایستسه هرکس صف دلداده ده دی
پیشواز ائت او مسافر بو یاخین جاده ده دی
ئوزی آزاده دی مهدی گوزی آزاده ده دی
سسلیون دردینی عشاق او مولا بیله جاق
سسله ساخدا گله جاق سسلمه ساخدا گله جاق
بیر بئله ای دل غافل گِله آغاز ائلمه
نازنیندور آقامیز نازینی چک ناز ائلمه
یاری تاپ شهپر اغیاریله پرواز ائلمه
آغلا آغلا گوزیوین یاشینی مهدی سیله جاق
آغلاساخدا گله جاق آغلاماساخدا گله جاق
مرحبا قامتینه قدّی قیامتدی اونون
دردین آل جانه سئوین جانی سلامتدی اونون
طرح برنامه سی بیرپارچا عدالتدی اونون
یولونی گوزله که ایمان دیریلوب کفر ئوله جاق
گوزله ساخدا گله جاق گوزلمه ساخدا گله جاق
دوزدی حق وعده سی وحیی ئوزیوه ناصح ائله
عقلیوی نفسیوه بو معرکه ده فاتح ائله
گل اباصالحه خاطر عملون صالح ائله
باغلاسان عهد صداقت گل زهرا گله جاق
باغلاساخدا گله جاق باغلاماساخدا گله جاق
موکب یار گلور باغلاماق اولماز یولونی
حمزه لر عیسیِ مریملر آلوب صاق صولونی
سو کنارینده گلور آختارا سقا قولونی
دولدوروب مشگی سوسوزلار آراسیندا بؤله جاق
ایسته ساخدا گله جاق ایستمه ساخدا گله جاق
- چهارشنبه
- 4
- اردیبهشت
- 1398
- ساعت
- 11:13
- نوشته شده توسط
- ابوالفضل عابدی پور
- شاعر:
-
ولی الله کلامی زنجانی
ارسال دیدگاه