یازیلّا صفحه ی تاریخیده بو عنوانی
قالوردی ایکی ایل ئولدورسون الله عثمانی
علیّ اکبر شهزاده گلدی دنیایه
ائدوب طواف ملک دودمان زهرانی
دییردی بیربیرینه یثرب اهلی ائولرده
نه قدری ایستیوب الله ، امّ لیلانی
پیمبرین عوضین وئردی امته الله
منوّر ائتدی رخی آسمان بطحانی
گورن دییردی یاتوب گاهواره ده احمد
امین وحی، اولوب گاهواره جنبانی
بیری دییردی مبارک آدین قویاخ یوسف
همیشه عشق اودونا یاندیرا زلیخانی
حسین آتاسی علینی زبس چوخ ایستردی
ئوزی قوجاقه آلوبدی او ماه سیمانی
اذان اقامه دئدی اکبرین قولاقینه
آدین علی چاغیروب آغلادی علی جانی
دئدی نه قدری بو واردی جهاندا منده وارام
حسینین عمرونون اکبر دقیق میزانی
تولدین یازورام کربلایه گئتمه قلم
هله تحمل ائله ساخلا بو قضایانی
بو آی تمام بنی هاشمه مبارکدی
دوتوبدی اهل ولا جشن بهجت افزانی
همیشه آغلاماقین وقتی واردی سن بیلوسن
یازاندا ابری تک آغلار او غملی صحرانی
علیّ اکبرین هاردا گلوبدی مانندی
هزار یوسف اولار خاکبوس و دربانی
اوغول تولدی عالمده آیری مرحله دی
خلاصه لذّتینون یوخدی حدّ و پایانی
بوگون حسین ائوینه فوق العاده گئت گَل وار
گلن زیارت ائدوردی شبیه طاهانی
یازولّا صالح اوغولّار بهشت میوه سیدی
آتا اوغولدان آلار عطر باغ رضوانی
شهید آتاسی بیلر که بو سؤز نجه سؤزدی
اوغول ئولنده قوجالدار بیرآنی انسانی
ائلیکه اکبری میداندا یخدیلار گویا
دوشوبدی کوفه ده محرابه حیدر ثانی
روادی ائتسه اگر جبرئیل گوگده ندا
خراب اولیدی علی سنسیز عالم فانی
حسین که اکبرینون خیمه ده سسین آلدی
یتیردی رزمه ئوزون کربلا سلیمانی
باشین آلوب دیزی اوسته توکردی گوزیاشینی
یوزون قویوب یوزونه آغلادوبدی زهرانی
دئدی نفس چک علی ئولمیوم باشین اوسته
دیریلت دمونله اوغول مفخر مسیحانی
- چهارشنبه
- 4
- اردیبهشت
- 1398
- ساعت
- 12:8
- نوشته شده توسط
- ابوالفضل عابدی پور
- شاعر:
-
حاج علی جعفری
ارسال دیدگاه