کرب و بلا غمینده ازل آدم آغلادی
حوّا قوشوب سسین اونولا باهم آغلادی
نوح نبی قوراندا گمی تا بیلوب نه وار
هم نوحه باشلیوبدی حسینه هم آغلادی
چون ایچمه دی قویونلاری سو حضرت ذبیح
باخدی فراته دولدی گوزی نم نم آغلادی
یعقوبه یوسف اولدی بهانه او قیرخ ایلی
بیت الحزنده باتدی یاسا هر دم آغلادی
مکّه چولونده هاجر ائدوب زمزمه «حسین»
گوزیاشی تک آخوب او زمان زمزم آغلادی
اوندا کی دؤندی گولشنه اؤد، حضرت خلیل
برگِ جمالی اوسته دوزوب شبنم آغلادی
یاده سالوبدی خیمه لرین یانماقین یقین
بو سرّ عشقه هر کیم اولوب محرم، آغلادی
عاشور سرّینی ائله کی درک ائدوب کلیم
تکیه ائدوب عصاسینه چکدی غم آغلادی
بیر چولده کی میسیح یولون باغلامیشدی شیر
اوخشاتمالار دیوب آناسی مریم آغلادی
هر دفعه کی باخوبدی حسینون جمالینه
گوزیاشیله دولوبدی گوزی، خاتم آغلادی
صفّینیدن گلنده علی چاتدی اُول چوله
رؤیاده گوردی اُول چولو قانلی یم آغلادی
گوردی چالور حسین ال ایاق یوخ ولی کمک
ای وای اوغول دئدی او زمان عالم آغلادی
باخدی حسینه آغلادی مظلوم ئولن حسن
جان اوسته دوتدی قارداشینا ماتم آغلادی
عباسین اُول زمانینی یاده سالون بو دم
سو ایچمیوب چیخوبدی سودان، علقم آغلادی
قولاّر قلم، سو مشکینه ده اوخ ووروبدیلار
دیرسکلریله بیر اوجالان پرچم آغلادی
ادرک سسین حسین ائشیدوب چکدی دلدن آه
تا علقمه گلینجه او قدّی خم، آغلادی
اوغلی ئولنده آغلامادی چوخ اوجا ولی
قولسوز گورنده قارداشینی محکم آغلادی
چوخ آغلا وار نقَدری نفَس جدّیوه «بشیر»!
حسرت چکر صورا او کسی که کم آغلادی
- چهارشنبه
- 18
- اردیبهشت
- 1398
- ساعت
- 14:26
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه