حسن ای سینمون گلی
آناسی زهرایه سویگلی
طراوتیندن سالوب اوغول
صورتون یاس و سنبلی
یات اوغول یات من سنه قربان
بئله اولما دیده سی گریان
گول اولا گللر یوزی خندان
ننه قربان اوغول حسن(۲)
حسن ای ماه منظریم
صدف کیمی دُرّ و گوهریم
باخ یوزومه گوزلروی اچ
سنه قرباندی گوزلریم
یوزی زیبا گوزلری شهلا
سنه تای وجه الحسن هاردا
دم به دم سویلر سنه زهرا
ننه قربان اوغول حسن(۲)
ائویمون زینتی حسن
سرای دل لذتی حسن
اولوبدی ورد زبان منیم
دلیمون صحبتی حسن
سنون ادون درده دوادی
هامی امراضه چون شفادی
کرمون باب التجادی
ننه قربان اوغول حسن(۲)
ای اولان یوسف حجاز
آناوا ایلمه عشوه ناز
یاراتدی زهرایه مه لقا
سنی یکتای بی نیاز
یر یوزونده یوخدی نظیرون
هدفون حق حقدی مسیرون
مرتضی تک واردی دبیرون
ننه قربان اوغول حسن(۲)
گل اوغول گل قوجاقیمه
قویوم دوداقون دوداقیمه
ئوپوم ، محبت چراغوون
دوشه نوری اطاقیمه
آغلاما یات سینمون اوسته
سینم اولموبدی هله خسته
گرچه اولام سینه شکسته
ننه قربان اوغول حسن(۲)
سنه واردی اوغول سوزوم
یانوبدی دلده ئورک کُوزوم
اولاندا یدّی ياشون سنون
دولاجک قانیلین گوزوم
گُوَرَر سیلیدن جمالیم
یاندیرار گرچه سنی حالیم
آغلامازسان ای پر و بالیم
ننه قربان اوغول حسن(۲)
حسنیم ای گل سمن
دوگولّم اول کوچه ایچره من
نه گورسن اول کوچه ده بالا
دئمه سن حیدره علن
چون اوگون مظلوم وطندی
کمکی یوخ غرق محندی
گرچه حیدر شاه زمندی
ننه قربان اوغول حسن(۲)
سیلیدن گر دوشه یره
قولاقیمون گوشواره سی
بول اوندا زهرانون ای بالا
کسیلوب راه چاره سی
منه اوندا منزلی گورسَت
سیلینون جریانینی گیزلت
صبره صبرین درسینی ئورگت
ننه قربان اوغول حسن(۲)
- شنبه
- 1
- تیر
- 1398
- ساعت
- 15:31
- نوشته شده توسط
- ابوالفضل عابدی پور
- شاعر:
-
حاج محمد متقی تبریزی
ارسال دیدگاه