گون کیمی طالع اولوب نیّر اعظم بو گئجه
اوزگه بیر عالم امکانیدی عالم بو گئجه
گورونوب صبحده بیر آیت حیّ ازلی
لمعۀ نور هدا شعشعۀ لم یزلی
بیر تجلّی ایلیوب شمس شموسین مثلی
باش ویروب گون کیمی سبط شه خاتم بو گئجه
بیر اوغول حضرت زهرایه ویروب حی قدیر
نه اوغول عارض وجه الحسنه ماه منیر
سبط طاهادی بو فرزند شه پاک ضمیر
شاد اولوب حضرت پیغمبر اکرم بو گئجه
نور پاک ازلی طالع و تابنده اولوب
نجه تابنده که خورشید سر افکنده اولوب
آستاننده بونون مهر و قمر بنده اولوب
بودور افلاکه ویرن فیض معظم بو گئجه
نور پاک حسنی عالم والایه چخوب
فرشدن ساطع اولوب عرش معلایه چخوب
شاد و خرم ملکوت اهلی تماشایه چخوب
لطفینی شامل ایدوب خالق عالم بو گئجه
بو همان نوریدی موسایه تجلا ایلیوب
یثربی نور رخی وادی سینا ایلیوب
غرق بو ماخلقی نعمت عظما ایلیوب
مقدمی ایلدی دنیانی مکرّم بو گئجه
ایکی دریادن اولوب درّ مثمّن نه خزف
فاطمه لجّۀ عفّتدی علی بحرِ شرف
دامن عصمتی بو لوءلوء مرجانه صدف
آیریلوب گوهر بَحرِینِ مسلّم بو گئجه
حَبَّذا محسنه دی صورت و معناسی گوزل
خلقت و خلقی گوزل دیده شهلاسی گوزل
آتاسی جدّی گوزل مام دل آراسی گوزل
شرط حسنادی فیوضاتیده بو دم بو گئجه
عید فرخنده دی بو نیمه شهرالرمضان
محترم گوندی مشرف یارادوبدور یارادان
آرتروبدور بو ولادت گیجیه عزّت وشان
لطف دنیایه ایدوب خالق احکم بو گئجه
مجتبا دور لقبی اسمی حسن سبط نبی
حال حیرتده چهار اُمی قویوب هفت اَبی
باش ویروب گون کیمی روشن ایلیوب تیره شبی
ایتدی پیغمبری بو اَمریده خرم بو گئجه
تازه مولودیدی اوصاف کمالی حسنه
صاحب عزت و احساندی جلالی حسنه
اشبه ختم رسالتدی جمالی حسنه
اولدی خوبانه وجاهتده مقدّم بو گئجه
سپری عمرون اولوب #عبدی نه غفلتدی اُویان
یاتما اخلاصیله یاز شعروی اُولما نگران
بلی خوشبختدی نوحه اوخویان نوحه یازان
یاز ویروب گون کیمی باش نَیّرِ اعظم بو گئجه
- دوشنبه
- 3
- تیر
- 1398
- ساعت
- 9:55
- نوشته شده توسط
- ابوالفضل عابدی پور
- شاعر:
-
مرحوم عبدی قراملکی
ارسال دیدگاه