هر داش اورک هرگز دُر احساس اولا بیلمز
آهن پاراسی تیغه الماس اولا بیلمز
عالمده گزنلر شرف النّاس اولا بیلمز
عبّاس آدین هر کس قویا عبّاس اولا بیلمز
بازولرینی حیدر ئوپوب بیمه ائدوبدی
احسن اونا جبریل امین حتمی دئیوبدی
قارداشینی گورجک الین عالمدن ئوپوبدی
هر تپراق و داش تربت عبّاس اولا بیلمز
قامت اوجالار حضرت عبّاس اولا بیلمز
ای امّ بنین محشر ائدوب خط شکن اوغلون
تأیید ایلدی آل علی پنج تن اوغلون
یعنی بگنوب شخصاً حسین و حسن اوغلون
هر چشمه جوشار داخل دریا اولا بیلمز
چوخ ساقی گلوب حضرت سقّا اولا بیلمز
حیرتده قویوب دیدۀ شهلاسی جهانی
عشّاقه اولوب کعبه گوزل دارُالامانی
جوشدی رگ غیرتده که حیدر کیمی قانی
سسلندی حسین تک شه خوبان اولا بیلمز
عبّاس کیمون خیمه ده دربان اولا بیلمز
سسلردی حسینون در و دربارینه قربان
دیللرده گزن غیرت سرشارینه قربان
جانیم آقامون غمزده قیزلارینه قربان
عبّاس کیمون هرگز هوادار اولا بیلمز
دنیا یغیشا قولسوز علمدار اولا بیلمز
عبّاس فقط عشقیدی سلطان شرفدی
عبّاس فقط جنّتُ‌الاَعلادی هدفدی
عبّاس فقط بند دل شاه نجفدی
هر دیده سی شهلا اونا بنذر اولا بیلمز
شمشیر اله آلسا یل حیدر اولا بیلمز
میداندا ایدوب قامت دونانی خمیده
چوخلار اولوب عاشق اونا عالمده ندیده
تیترتمه سالوبدی آدی باخ کاخ یزیده
زینب دئدی دنیا شه عبّاس اولا بیلمز
عالم گله خاک ره عبّاس اولا بیلمز
عالمده اباالفضلین عجب رهبری واردی
رهبر نجه رهبر که گوزل اکبری واردی
عباسین علم ساخلاماقا اللری واردی
«غمکش» یاز اونا دهریده همتا اولا بیلمز
عبّاس کیمون عاشق مولا اولا بیلمز
- دوشنبه
- 3
- تیر
- 1398
- ساعت
- 10:12
- نوشته شده توسط
- ابوالفضل عابدی پور
اکبر مرسلی