بند 1 مقدمه و عزم جهاد امام (ع)
.
چوخ گناه ایلمشوخ دهرده سرگردانوخ
بو گناهیله گینه مستحق احسانوخ
.
هامو روزی آپارور سفرۀ احسانوندان
بیز که کفرانۀ نعمت ایلیوب گریانوخ
.
کسمه اما نظر مرحمتون بیزدن سن
بیز که باشدان ایاقا معصیت و عصیانوخ
.
بیزه امداد ایله سن بی مددوخ بی یاروخ
بیزه درمان ایله سن بی کس و بی درمانوخ
.
یوزی قاره الی بوش قویموشوخ اوز درگهوه
بیز عزادار حسینوخ او شه عطشانوخ
.
سن حسین ابن علینی بلوروخ چوخ سوه سن
اودی بیزده گجه گوندوز او شهه نالانوخ
.
گلدی میدانه دایاندی دیدی اشراره امام
هامو امت لره آفاقده بیز سلطانوخ
.
ایچمروخ سو دوتا دنیا یوزینی آب فرات
بزم یاره گیدروخ جدیمزه مهمانوخ
.
بیزوخ عالمده ویرن خلقته روح ابدی
گرچه ظاهرده بو گون غصه لیوخ حیرانوخ
.
ویرمروخ بیعت الین فاسق و فاجر الینه
که بیز اولاد رسولوخ شرف انسانوخ
.
کیمدی دین رهبری عالملره بو واضحدی
ئولدورورسوز بیزی بیز طایفۀ قرآنوخ
.
سپه شامدن اول سروره بیر کیمسه جواب
ویرمدی شه گنه اشراره بیله ایتدی خطاب
.
.
بند 2 اتمام حجت امام (ع)
.
ملک اسلامه بوگون سرور ممتاز منم
اگمرم باشمی اشراره سرافراز منم
.
سیز هاموز جیفۀ دنیایه ساتوبسوز دینی
دین و قرآنه اولان عاشق جانباز منم
.
قطعه قطعه بدنیم دوغرانا باشیم کسیله
حقی ترک ایلمرم یاریمه هم راز منم
.
حقی پامال ایلین فاسقه سیز تولاندوز
درس قرآنی ایدن نیزده آغاز منم
.
ای مسلمان قویان اوز آدینی ظاهرده بوگون
باش ویرن شوقیله او دینینه سرباز منم
.
العطش سویلَماقیم ناز ایلَماقدی حقه
یارالی پیکریله یاره ایدن ناز منم
.
من حسینم که اولوب دایه منه روح الامین
مَلَکیله ایلین گویلره پرواز منم
.
سسلیری دادینه قرآن سیزی سیز غافلسیز
دین اسلامه اولان ایندی هم آواز منم
.
پیکریم دوغرانا باشیم چخاجاق تبلیغه
حامیِ شرع نبی باز منم باز منم
.
گوردی قلب سپهی کفر دوتوب سرتاسر
ال ایدوب تیغ شررباره شه جن و بشر
.
.
.
بند 3 حسینیه_شجاعت
.
حمله ور اولدی حسین دشمنه اول حالته باخ
پوزدی بیر حمله ده قلب سهی صولته باخ
.
صوت تکبیری دل دشمنه سالدی وحشت
سندی صف لر داغلوب لشگر کین وحشته باخ
.
داغلوب مور و ملخ تک او بیابانه قوشون
فوج اشراری سالوب لرزیه بیر قدرته باخ
.
اولمادی جرأت اولا کیمسه او سلطانه حریف
یوز قویوب قاچماغا اشرار دنی سرعته باخ
.
نه قالوب میمنه نه میسره نه قلب سپاه
قاریشوب بر برینه اهل جفا حرعته باخ
.
گر او نحویله حسین جنگ ایلسیدی تنها
سرنوشتی عوض ایلردی ولی حکمته باخ
.
هامو فکری بو اییدی باشه یتشسون عهدی
عالمه حقنی اعلان ایلین حجّته باخ
.
یادینه سالدی اودم اکبریله عباسی
قولی سست اولدی دوروب گئتمدی بیر محنته باخ
.
یارالیدی بدنی چکدی کناره اوزینی
استراحت ایده بیر لحظه غم و حسرته باخ
.
چوخ چتیندی ایشیده بو سوزی ارباب کمال
دیرم مطلبی گوز یاشیم اگر ویرسه مجال
.
.
بند 4 کثرت غم امام (ع)
.
دیلیم عاجزدی دیه اهل دله بو خبری
خامه قاصردی یازا بو خبر پر شرری
.
صادق آل محمد اوزی فرمایش ایدوب
بودی مضمونی او فرمایشنون مختصری
.
ایلین، آل امیه ایلین ظلمی، بیان
قویمیون پرده ده قالسون ستم و کینه لری
.
منده علت اودی تفصیلله بو ظلمی گرک
دیم آخسون یوزینه شیعه لرین اشگ تری
.
عرصه ی کرب و بلاده شه عالی نسبه
نچه غم یتدی اوگون آخدی سرشگ بصری
.
بو سوسوزلوق غمی آلموشدی قرارین الدن
بیر اوغول فرقتی یوز ویردی که یاندی جگری
.
بیرده ویرمشدی شمادت یاراسی قوم دنی
بیرده عباسی ئولن وقتده سندی کمری
.
الی اوستونده علی اصغری اوخلاندی اوگون
قالدی میدانیده بی یار چوخالدی کدری
.
هامو غمدن غم اطفال او شهه اولدی چتین
که قالور دشمن آرا زینب نیکو سیری
.
بیر بیله غم لریله ایتدی گینه عرصه نی تنگ
او سپاهه که اولاردا یوخیدی حق اثری
.
استراحت ایله سین چکدی کناره اوزینی
ایلدی نیزه سنه تکیه بو اولدی نظری
.
بیر زنازاده آتوب داش شه عطشانه طرف
گوردی بیر صاف یری یوخ سجده گهین ایتدی هدف
.
.
.
بند 5 زخم پیشانی امام (ع)
.
الی سنمش ایلدی شیشه جانانی شکست
ظلمیله سجده گهِ شاه شهیدانی شکست
.
بی حیا داش وران الله نه جسارت ایلدی
بیلمدی داش ایدر آیینۀ طاهانی شکست
.
نه شکست ایلدی تنها او دنی سجده گهین
بلکه ایلیوبدی ستون حق یکتانی شکست
.
ظاهراً سندی جبینی او شهین قان آخدی
باطناً ایلدی دشمن دل مولانی شکست
.
خیمده زینب کبری اورگین سندیردی
بر داشیله ایلَدی سینۀ زهرانی شکست
.
حجت روی زمینون پوزولوب احوالی
قلب عالمده ایدوب عالم امکانی شکست
.
قان آخوب گوزلرینه اولدی جهان ظلمانی
گوزلرین سیلماقا آلدی الینه دامانی
.
.
بند 6 تیر حرمله به سینه امام (ع)
.
ناگهان سرعتیله آلدی اله حرمله اوخ
تازه دن تا دل زهرایه سالا ولوله اوخ
.
سوز بیوک یرده دی یا فاطمه چوخ معذورم
عرض ایدم تا نجه یخدی او شهی مقتله اوخ
.
هر ستمگر اله بیر اسلحه آلموشدی او گون
شمر بر خنجر خون ریز ولی حرمله اوخ
.
روز عاشورا اوچ اوخ آتدی او نمرود زمان
یعنی اوچ دفعه او صحرایه سالوب زلزله اوخ
.
اولین اوخدا عقاب اوستن ابوالفضلی سالوب
گور نه نوعیله سالار خیمه لره ولوله اوخ
.
اصغره ویردی ایکمجی اوخنی میداندا
ویردیروب کودک ششماهه نی الدن اله اوخ
.
بیله فکر ایلمه اوخ ظلمی یتوب پایانه
اوزگه ظلمه اؤزون آماده ایدردی هله اوخ
.
او دلیکه اورا چکمشدیلر اکبر داغی
یول تاپوب جرأتیله دگدی او داغلی دله اوخ
.
او اوخیله قوتولوب مسئله کرب و بلا
یارادوب عالم امکاندا بیوک مسئله اوخ
.
دورا بیلموردی آت اوستن او امام ثقلین
یخلوب گویلره سالدی او زمان هلهله اوخ
.
یخلاندا یره آتدان او شه کون و مکان
ذوالجناحی قویوب اوز خیمه لره شحه زنان
.
بند 7 آمدن ذوالجناح به خیام
.
خیمه گاهینده امامین او زمان محشریدی
هامو دلدن نگرانِ شه بی یاوریدی
.
اوزگه بیر عالمیدی عالمی اهل حرمین
هاموسی منتظر واقعۀ دیگریدی
.
بیر بلوک عورت اوشاق گوزیاشی ایلولّه روان
نیلسونلر هامو بی مونس و غم پروریدی
.
ذوالجناحین سسی بیردن یتشوب خیمه لره
او سسی که اونا واقف حرم حیدریدی
.
الده سو جامی هامو خیمه دن اولدی خارج
هامو عطشانیدی مخیم ده هامو مضطریدی
.
گوردولر مرکبی بی صاحب اولوب راکب یوخ
گلدیلر شیونه یوزلرده سرشگ تریدی
.
مرکبین زینی دونوب باشه جلو پاره لنوب
آقا وای ناله سی دلده هامونون ازبریدی
.
ذوالجناحین آلوب اطرافینی بیر فوج زنان
بو زبانحالیله بیر قیز دیدی دردین او زمان
.
.
بند 8زبانحال دختر امام (ع)
.
نه بلا یتدی نه یوز ویردی پریشان باباما
نه ستم گوردی روا فرقۀ دونان باباما
.
هاردا سالدون بابامب قالدی گوزوم یولاردا
گلماقا خیمه لره اولمادی امکان باباما
.
گر بابام دوشدی یره کیم باشین آلدی دیزینه
کیم تلاوت ایلدی آیه قرآن باباما
.
چوخ سوسوز گتدی گئدنده، دئ گوروم میداندا
ویردی سو شمر ستمگر او لب عطشان باباما؟
.
من سیز ایچمزدی سو بُلّم بویانوب قانه سوسوز
آغلارام منده نقدر ئولمه مشم قان باباما
.
ایندی بُلدوم منی بو قوم دنی قویدی یتیم
قالدیم حسرت داخی شاهنشه دوران باباما
.
شامیان رحمه گلوب ویرسله فرصت بو گجه
دوتارام عمّه میله شام غریبان باباما
.
ممکن اولسا گیدرم بو گجه دیدارینه من
بیر دویونجه ایدرم ناله و افغان باباما
.
باش قویوب سجده گهِ عشقه شهنشاه حجاز
یارالی جسمیله تا ایلیه بیر راز و نیاز
.
.
بند 9 امام (ع) در حال سجده
.
بستری توپراق اولوب بالشی شمشیر اولدی
یارالیدی او لحاف بدنی تیر اولدی
.
گوردولر طاقتی قالمور دورا جنگ و جدله
دوشدی توپراقلارا قالدی قوری تصویر اولدی
.
او قدر توکدوله داش پیکر مجروح اوسته
قان قاریشدی قوری توپراقله تخمیر اولدی
.
بیلدی او حالده مولا یتشوب وقت نماز
حاله گلدی دل ویرانه سی تعمیر اولدی
.
قبلیه ایتدی توجه دیدی بردن تکبیر
دلده وا غربتی وا محنتی تکبیر اولدی
.
یدّی عضوی یره لازمدی قویار اهل سجود
اولمادی ممکن اونا حالتی تغییر اولدی
.
ال یارا دیز یارا آنّی یارا بو حالتیله
یارالاردان سو کیمی قانی سرازیر اولدی
.
سجده ده گلدی دله فخر و مباهات ایلدی
پوزدی سُکّان سماواتی مناجات ایلدی
.
.
بند 10مناجات امام (ع)
.
دیدی جنّت ایلین قانلو بیابانی منم
کربلا کوه منادی منه قربانی منم
.
سنه مختصری بو لفظ منیّت یا رب
سنون عضقونده آتان شوکت دنیانی منم
.
باش ندی آتموشام عشقنده باشمدان هامونی
حفظ ایدن عالم آرا عهدله پیمانی منم
.
ویررم دشمنه انگشتیله انگشتریمی
بذل و بخشش ده قویان مات سلیمانی منم
.
نیزلرده یارالی باشیله شامه گیدرم
آغلادان چرخ چهارمده مسیحانی منم
.
طشت زرده باشیمی قویسالا قرآن اوخورام
شأت و شوکتده گچن حضرت یحیانی منم
.
سنون عشقونده بو دنیانی گوزومدن آتدیم
ساخلیان دشمن ظالم آرا قرآنی منم
.
بیلمورم هاردا قالوب نازلی رقیم الله
تک قویان دشمن آرا زینب کبرانی منم
.
دمبدم شوره گلور خیمده اهل حرمیم
داخی باشدان آنان اول فرقۀ نسوانی منم
.
سنه تاپشورموشام الله حرم طاهانی
ترک ایدن شوقیله بو عالم امکانی منم
.
دین اسلامه فدا ایلمیشم هر نه واریم
قوتاران حشرده غمدن هامو انسانی منم
.
ویر منه سنده شفاعت علمین محشرده
ایستیَن عجزیله سندن بیله احسانی منم
.
سس گلوب بیر بیله گوز یاشی نثار ائتمه حسین
ملکوت اهلینی بی صبر و قرار ائتمه حسین
.
.
بند 11 ندای ملکوتی به امام (ع)
.
ائتمه غم تنگ ایدوب اعدا بو بیابانی سنه
ویرمیشم منده عوض عالم امکانی سنه
.
ایستمه اهل جفادن سو سوسوزسان بلورم
منع ایدوب کوفه لیلر آب گوارانی سنه
.
آب کوثر سنی گوزلور دیمه یاندیم بو قدر
بزیوب گور نه ملک روضۀ رضوانی سنه
.
سن وفا ایلدون اوز عهدیوه چون روز جزا
ویرمیشم ای یارالی بیر بیله عنوانی سنه
.
ما ملک جمله سنون جنت و فردوس سنون
ائتموشم حشرده بو منصبی ارزانی سنه
.
تربتون خاک شفادی هامو درده یارالی
باخما بو عرصه ده تنگ ایتدیله میدانی سنه
.
سنه مختصّیدی سادات شهیدان لقبی
یوخ شهادتده بیریسی اولا رجحانی سنه
.
منه بوالفضلیله هم قاسم و اکبر ویردون
تار ایدوب اهل جفا ظلمیله رجحانی سنه
.
زینبون قولاری باغلانسادا قالمال نگران
من شریک ایله میشم زینب کبرانی سنه
.
یخلان پرچموی زینب علیا اوجادار
اودی مغلوب ایلین شامده اعدانی شنه
.
گلدی جبریل باخوب پیکر صد پاره سینه
شهپرین آچدی سالا سایه شَهین یاره سینه
.
.
بند 12 نزول جبرئیل
.
اوندا که گرم مناجاتیدی سلطان حجاز
قوملار اوستونده ایدردی حقیله راز و نیاز
.
نگوروب سایه سالیندی یارالی پیکرینه
کیمدی بو سویلدی ایستر که اولا محرم راز
.
جبرئیلم دیدی گلدیم سنه بیر خدمت ایدم
منی گوندردی بو مأوایه حق بنده نواز
.
دیدی یغ شهپروی زحمته سالما اوزیوی
قوی بو جان اوسته اولوم خالقیمیله دمساز
.
ای مقرب ملک خالق رحمان و رحیم
حایل اولسان آرادا حاصل قربت اولماز
.
من فدایی لریمی حقه گزارش ویرورم
یخلوب تورپاقا قانه بویانوب هر جانباز
.
قانیمی تحفه آپار محضر پیغمبره گیت
تا بیله سالدی نه احواله منی اهل حجاز
.
ایسته سن گیت سو کنارینده ابوالفضلیمی تاپ
اونی آتدان یره سالدی نچه مین تیر انداز
.
چوخلاری قتل حسینه ایدوب اُول دمده قیام
آناسی جدی آتاسی باش آچوخ گلدی تمام
.
بند 13شهادت امام (ع) و آمدن انبیا به قتلگاه
.
خولی اوّلده گلوب خنجر الینده او زمان
کسه باشین ایلیه قانینی توپراقه روان
.
گوئیا گوردی پیمبردی باشی اوستونده
وحشته دوشدی قایتدی او ستمگر حیران
.
آلدی خنجر الینه گلدی سنان ابن انس
اودا زهرانی گوروب ایلوری فریاد و فغان
.
قاتلی شمریدی غیظیله ایدوبدی حرکت
خنجرین چکدی علینون ایده گوز یاشنی قان
.
بیر طرفدن بو ایشه ناظریدی روح الامین
شمرله شاه شهیدانه باخوردی نگران
.
قبض روحه او زمان قابض الارواح گلوب
هامو سکان فلک آغلادی حشر اولدی عیان
.
گوتوروب جمله حجابی آرادان حیّ مجید
هامو ارواحه حسینی او زمان ویردی نشان
.
بو نِدا گلدی باخون بو یارالی جان ویرَنه
بو حبیبیمدی حسین دور ویروری شوقیله جان
.
اذن داداریله گلدی هامو ارواح رُسُل
کربلا دشتینه معناده هامو ناله کنان
.
ختم پیغمبرین اطرافین آلوب جمع ملک
تسلیت ویردی خانم فاطمیه فوج زنان
.
صون نفسدیدی باجی گلدی گوره قارداشینی
ایستیری شمر جفا جو کسه قارداش باشینی
.
.
بند 14 کشمکش حضرت زینب (س) با شمر ملعون در قتلگاه
.
دیدی ای شمر دنی حضرت طاهادن اوتان
بو حسین ابن علیدی بو دل آرادن اوتان
.
گورموسن بو یارالی قانه باتوب جان ویریری
یارالی قانه باتان سرور بطحادن اوتان
.
حجت داوره ائتمه بو قدر ظلم و ستم
سوسوز ئولدورمه بونی خالق یکتادن اوتان
.
ایندیکه ئولدوروسن رحم ایله بیر شربه سو ویر
بو سو مهریه دی زهراسینه، زهرادن اوتان
.
نه قساوتدی علی اوغلنا قلبونده سنون
بو علی اوغلودی ظالم داخی مولادن اوتان
.
سینه سی اوسته چخوب فاطمه نی آغلاتما
عرشی تیترتمه داخی عرش مُعلّادن اوتان
.
بیر امان ویر باشینی بلکه دیزیم اوسته آلام
باغلیوم گوزلرینی سیّد والادن اوتان
.
وئر اجازه گتورم باشینون اوسته حرمین
گورسون ایتگلی لرون دوغرانان اعضادن اوتان
.
عالم عشقیده ویردی بو سوسوز قربانلار
جان جانانه فدا عاشق شیدادن اوتان
.
ضعفدن حاله گلوب آچدی گوزون میر عرب
گوردی شمریله او دم کشکمش ایلور زینب
.
.
بند 15 شهادت امام (ع)
.
دیدی صبرایله باحی گلمه بیله افغانه
التماس ایلمه بیر بیله بو بی ایمانه
.
بو شقیدور نه حیا وار نه شرف نه ایمان
زورق دینی بو صحراده سالوب طوفانه
.
تولانوب جیفۀ دنیایه دانوب قرآنی
منیم امریم قوتولوب یتمه لیم جانانه
.
سن قایت خیمه لره قویما اوشاقلار قورخا
سرپرست اول حرم طایفۀ نسوانه
.
گوزومی باغلاماقا بوردا آنام حاضردی
باشیم اوستونده گزیر شوریله یانه یانه
.
باجی قارداشدان ال اوزدی قویوب اوز خیمه لره
گلدی گوردی اوجالوب ناله سسی کیوانه
.
ناگهان نغمۀ تکبیر ائشیدوب اهل حرم
بیر یارالی باشی دشمن گتورور جولانه
.
سوسوز ئولدوردی حسینی او بیاباندا عدو
ائتدیلر آل علی گلشنی نی ویرانه
.
بیله فکر ایتدیله بو مشعلی خاموش اولاجاق
سالدیلار اوزلرینی لعنت بی پایانه
.
توکدولر قانینی فکر ائتدیله یادان چخاجاق
بلکه زینت ویره جان حشره کیمی قرآنه
.
قائم آل محمد آلاجاق بو قانی
اوندا بو سینه لرین دردی یتر درمانه
.
بو حسین ابن علی آدی فراموش اولماز
مشعل دیندی «علومی» داخی خاموش اولماز
.
- دوشنبه
- 24
- تیر
- 1398
- ساعت
- 11:48
- نوشته شده توسط
- ابوالفضل عابدی پور
- شاعر:
-
محمد حسین کتابچی
ارسال دیدگاه