گوگل قوشی پَر آچوب عزم ائدور خراسانه
گوزومده جلوه لنن جلوه گاه جانانه
.
دوشوبدی یادیمه یاران حریم شمس شموس
جگرلری یارالی اوُل غریب خطّه ی طوس
.
سلام اولا او خراساندا حجّت اللهه
آچوب کرم قاپیسون هم گدایه هم شاهه
.
او شهریار جهانون رئوفیدور لقبی
که فخر هر دو جهاندی صفالی جدّ و ابی
.
آچوبدی خوان کرم شاهیلن گدا یوزونه
فدا اولوم او شهین زائرینه هم اوزونه
.
او زائری که اونون دوز گئده زیارتینه
او مطمئن دیون اولسون شهین شفاعتینه
.
ابوالحسندی او،شیر خدایه دلبردی
خدایه هشتمین حجّت گُل پیمبردی
.
حضور یاره گئدر،عاشقان دیوانه
بو رسمیدور یغیشار دور شمعه پروانه
.
نسیم صبحی اَسر عاشقین قرارین آلار
حرمی شکر اولا زائرله هی دولار بوشالار
.
حرمده گنبد عالی طلاسی وار آقامون
او گنبد اوسته یاشیل بیر لواسی وار آقامون
.
ضریح پاکی اونون چلچراغ اولوب فرشه
مثال مشعل حق جلوه سین سالار عرشه
.
حرمی فخر ائلیر عالم ایچره نُه طاقه
اولوبدی قبله ی حاجات حریمی عشّاقه
.
نئجه حرم اولوب انگشتر بهشته نگین
گونه آیا اودی فخر ایلیر بو چرخ زمین
.
حریمِ پاکی اونون فخر طور سینادی
گلن زیارتینه پا برهنه موسادی
.
بهشتیدنده گوزل بیر رواقی وار آقامون
همیشه اهل سمادن قوناقی وار آقامون
.
گوی اهلی درگهینی هی گلر اوپر دویماز
یقیندی قبریده اوز زائرینی تک قویماز
.
بو گونلر هر یره گئتسن او صحنیلر سوزودی
تمام زائرینه میزبان آقا اوزودی
.
ایا رسول خدایه سلیل شایسته
ئولنده زائری ای تئز گلن باشی اوسته
.
عنایت ایله که عبد ذلیلینوق آقا جان
ئولنده بیز،کرم ایله دخیلینوق آقا جان
.
بیر عمریدور که قاپیندا گزر بو نوکرلر
آدینلا خانه عشقی بزر بو نوکرلر
.
او عشقیوین قوشی بو سینه ده اولوب محبوس
بیزیده گل کرمیندن سن ایلمه مایوس
.
او گُل مثالی صولان رنگیوه فدا آقاجان
او حالدا اوز بالاوی ایلدون ندا آقاجان
.
دئدون یتور اوزوی تئز هرایه من ئولورم
گلوبدی فاطمه ده بو عزایه من ئولورم
.
سارالدی رنگی او گون زهر کین ائدیب اثرین
نئجه دیوم بو سوزی دوغریوب شهین جگرین
.
باخوبدی صاق صولا امّا چکوب اورکدن آه
بو شهریده دئدی الان غریبم ای الله
.
نئجه دیوم او شهین زهر کین قرارین آلوب
جوادینون باشینا غصّه ابری سایه سالوب
.
قوری یر اوسته قویوب الغرض یانان اورگین
چاقوردی دادینه اوُل شاه کربلا کمگین
.
دولاندیروب یوزونی بیرده شهر طاهایه
دئدی جواد اوزوی تئز یتور بو ماوایه
.
بابا دیه دیه بیردن او دلرباسی گلوب
باشینون اوسته غرض اوز جوان بالاسی گلوب
.
آتانی گوردی بالا اوردا چوخ پریشان حال
جوان بالا اورگینده چوخالدی درد و ملال
.
رضا جوان بالاسیلا او دم قوجاقلاشدی
ایکیسی قول بویون اولدی دویونجا آغلاشدی
.
یوزون دئدی گورورم ای عزیز پیغمبر
اولوبدی زهر جفادن صولان گُله بنزر
.
باشین دیز اوسته آلوب گوز یاشین ائدوب جاری
سرشگیله بالانون ایسلانوبدی رخساری
.
قوای غصّه او دم گوز ائوینده سان وئردی
آتا باشی بالانون سینه سینده جان وئردی
.
(رضوی) حشریده شه نوریدن علم ویراجاق
کتاب عشقه بو گوزیاشلاری رقم ویراجاق
.
- دوشنبه
- 24
- تیر
- 1398
- ساعت
- 11:53
- نوشته شده توسط
- ابوالفضل عابدی پور
- شاعر:
-
محمد رضا بیگی
ارسال دیدگاه