گوردی لشکر کارزاره بیر مهِ تابان گلور
نو نهال مجتبی سو ایچمیوب عطشان گلور
.
عرصه میدانه یتدی اول جوان ماهرو
صولتیندن دوشدی خوفه اشقیای کینه جو
ایستدی ازّل ائده کفّاریله بیر گفتگو
حقّینون اثباتینه گورسونله نه برهان گلور
.
ایتدی فرمایش جماعت شرم ائدون جبّاریدن
احمد مختاریدن یا حیدر کرّاریدن
ال چکون بو شهریار بی کس و بی یاریدن
عزم ائدوب یثربدن آخر سیزلره مهمان گلور
.
آل پیغمبر گورورسوز جمله سی گریاندیلار
بیر بیاباندا جماعت سیزلره مهماندیلار
اوچ گئجه گوندور هامی خرد و کبار عطشاندیلار
العطش دادی خیمندن گورموسوز هر آن گلور
.
گوردی اصلا رحمه گلمز فرقه بی عار و ننگ
ال آتوب شمشیره اولدی شوقیله حاضر به جنگ
تا اوزون ووردی او دریا لشکره مثل نهنگ
اعتنا ائتمزدی لشکر هر طرف هر یان گلور
.
ایلدی شیرانه جنگ اول وارث شیر خدا
دورمادی بیر کس قباقدا سیندی صفلر بر ملا
خیمه لردن شاه مظلومان دئیردی مرحبا
ضرب شصتوندن خیاله ضیغم یزدان گلور
.
ائدوب آرامینی دلدن او قوم ناحقین
دوت رشید اوغلون اوزون ئولدوردی شامی ازرقین
قصد ائدوب آخر یاتوردا اشقیانین بیرقین
گوئیا شهبازیدور بیر صید اوچون پرّان گلور
.
سالدیلار بیردن آرایه قوم عدوان قاسمی
دوت طرفدن ایتدیلر آماج پیکان قاسمی
بی مروّت لر ائدوبلر سنگباران قاسمی
اوخ هوادن جسمینه چون بارش باران گلور
.
صیدینه صیّادیلر بیر بزم شورا قوردولار
باد ظلمیله گُل پیغمبری سولدوردولار
بیر قلج آخر باشیندان ظلم الیله ووردولار
دوشدی طاقتدن هجوم ایلوب گینه عدوان گلور
.
باشی اوستونده گوروب لبریزدور جام اجل
ایستدی دامان وصل شاهه بیرده وورسون اَل
دوتدی یوز سسلوب عمو فریاده گل
گور نئجه قاتل الینده خنجر برّان گلور
.
خیمه ده سمع امامه یتدی ناگه بو صدا
سرعتیله رزمگاهه گلدی شاه کربلا
باشی اوسته خنجر الده گوردی وار بیر بی حیا
دادینه شهزاده نون فکر ایلمور سلطان گلور
.
اَندیرن ساعتده شمشیرون امام ذوالحشم
بیر قولون وئردی قباقه اول ستم پرور او دم
ذوالفقاریله او بی عارون قولون ایتدی قلم
حس ائدوب اعضاسینه بیر شعله سوزان گلور
.
قاسمون گل پیکری یرده ائدوب اعداء هجوم
فاطمه قلبی یانوب گلزارینه اسدی سموم
آتلار آلتیندا قاریشدی بیر بیره عظم و لحوم
گور خیاله ایله بیر ظلم و ستم یاران گلور
.
یاتماقون توپراقلار اوسته ای سپهر حسنه ماه
باعث اولموش خیمه ده ایلور آنان فریاد و آه
اوزلیقیندان قورخورام چخسون حریم بی پناه
خیمه دن میدانه گور شیون و افغان گلور
.
باش طرفدن قوزادی آرامینی الدن آلوب
سینه قوزاندی ایاق سمتی ولی یرده قالوب
گوردی اعضا قطعه قطعه بیربیریندن آیریلوب
یعنی قوزاندوقجا یردن شانه تک شان شان گلور
.
آغلا بو غمده «علومی» توک یوزه اشک بصر
لیک بو امری قویما زحمتون اولسون هدر
دین و تقواسیز حسینه آغلاماق وئمز ثمر
نیّتون دور خالص ائله نیمه شعبان گلور
- دوشنبه
- 24
- تیر
- 1398
- ساعت
- 13:9
- نوشته شده توسط
- ابوالفضل عابدی پور
- شاعر:
-
محمد حسین کتابچی
ارسال دیدگاه