آچ گوزون گوزوم نوری- بیله نازیله یاتما
من فدا سنه گوزدن – دور حسینیوی آتما
(( دور گئداخ – دور گئداخ – خیمیه جوان اکبر
گوزلری – یولدادی – ناگران آنان اکبر ))
.
.
دشمنین جفاسیندن پیکریندی صدپاره
سینه قانه غلطاندی باش یارا بدن یاره
گردش فلک سالدی لیلی باشینه قاره
دور ایاقه لیلانی بوندان آرتیق آغلاتما
.
سو کیمین آخوب دشته پیکرون قزل قانی
لاله زار ائدوب گویا قتلگاه جانانی
آچ گوزون بئله یاتما سن بیل اصغرین جانی
پشت ابر فرقت ده مه لقا بالام باتما
.
چوخ چتین بو هجرانه صبر ائده آنان لیلا
گور نئدراگر گورسه چاک چاک اولوب اعضا
نعشیوه اوغول باخجاق من دوزنمورم حتّی
خون قلبیمی دور بیر اشک دیده مه قاتما
.
قویما غرق اولوم بحر غمده آچ گوزون نوحیم
تاب و طاقت و صبریم جاه و عزت و روحیم
آچ گوزون ایاقه دور ای غزال مجروحیم
بیر آلا گوزه قربان قاشلاری اونون چاتما
.
شاهراه عزتده فتح باب عشق ائتدون
چشمه چشمه قانیلن انقلاب عشق ائتدون
باشیوین آخان قانین سن خضاب عشق ائتدون
دوشمه میش محاقه من باری سن اوغول باتما
.
خیمه دن سسون آلجاق گلمیشم من ای دلبر
خیمیه دولاندیر گوز گور نئجه قوپوب محشر
غصه دن صولان قیزلار بیربه بیر یولون گوزلر
حالیمی اوغول درک ائت اقربانی آغلاتما
.
دوغرانان وجودینده اکبریم یارا چوخدی
آسمان جسمونده یاره نین سایی یوخدی
سینه قانه غلطاندی پیکرین دولی اوخدی
وار یری ؛ گلستانه بیله سینه اوخشاتما
.
اشبهِ رسول الله بیله جانیدن دویما
لیلیه ئوزون رحم ائت رخت وصلیوی سویما
هرزه دشمنین ایچره دور آتاوی تک قویما
سینمی اوغول داغ التهابه داغلاتما
.
سینه سین «مُصَیـّب» گر سوز و آهیلن داغلار
عشقیوین هواسینده اشکینی یوزه باغلار
سینه وین یارالارین یاد ینه سالوب آغلار
گوز تیکوب سنه ، گوزدن بو گدانی گل آتما
.
- چهارشنبه
- 26
- تیر
- 1398
- ساعت
- 12:25
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه