عالم وصلیده ای گوزلریمون نوری اوغول
بیرده گل نطقه دانشدیر من مهجوری اوغول
.
.
ای غزال حرم ای حسن وفا کانی فتی
گورمیوب چشم ختن سن کیمی آهوی ختا
هانسی صیّاد خطا کار ایدوب بیله خطا
سنی صید ایتماق اولوب ظلمیله منظوری اوغول
.
.
ای گوزل گوزلری رشگ نگه مست غزال
بو باخوشدا اولا آهوی خطا چشمی محال
نجه خونریز ونه دل سختیدی بو قوم ضلال
دولدوروب قانیله بو نرگس مخموری اوغول
.
.
ایسته دی اوغلونی قربان ویره جانانه خلیل
اولمادی لایق قربانگه حق اسماعیل
بو مقامه سنی زیبنده گوروب رب جلیل
یازدی سن ذبح عظیم اسمینه منشوری اوغول
.
.
ایستورم پیکروی حمل ایلیم خرگاهه
باخورام بنزوری اوراق کلام اللهه
قورخورام لیلینی همدم ایده داد وآهه
گورسه بو نحویله بو مصحف مسطوری اوغول
.
.
دگمه موش تیغ و سنان گول بدنینده هارادی
باخورام گول کیمی باشدان باشا جسمون یارادی
ایندی بو زلف پریشانوی لیلا دارادی
بویادی قانیله کیم لوء لوء منثوری اوغول
.
.
قلبیمون بندینی قیردی اثری بیر یارانون
قلبینون بندی قیرولسون بو وتینی قیرانون
گیده گوزدن گوزونون نوری بو خنجر ویرانون(1)
واریموش قولدا نه اندازه مگر زوری اوغول
.
.
آناون گوزیاشینی یوخسا بو غم خون ایتمز
ذکرینی وا ولدا قلبینی محزون ایتمز
خانۀ صبرینی غم لشگری داغون ایتمز
اولماز عالمده مبدّل اَلَمه سوری اوغول
.
.
ای وجاهتده وران طعنه جمالی آیه
دوشسه مجنون کیمی لیلا یری وار صحرایه
بو عراق اهلی مذمّت ایلمز لیلایه
نینوا دشتنی دولدورسا اگر شوری اوغول
.
.
جانیوه آندولا اولدوم دیرلیقدان ایله سیر
راضیم باشوون اوستونده بوکفار شریر
ویرالار قانه دونن قلبیمه اوچ شعبه لی تیر
آچالار دلده اولان عقدۀ مستوری اوغول
.
.
سنسیز عالمده هامی فکریمی باشدان آتارام
منده گللم بویولی سنکیمی قانه باتارام
تا جهان وار علی بیر قبریده سنلن یاتارام
تا بالام قائم آلا بو بودَمِ موتوری اوغول
.
.
دیزیمون طاقتی روحیم وَلَدی یا وَلَدی
هانسی ظالم بو گوزل جسموی قانه بَلَدی
سنی اُولدوردی آنان باشینه توپراق اَلَدی
قویدی زلفون کیمی آشفته او رنجوری اوغول
.
.
اوّلیندن بیزه «سعدی زمان» دور منسوب
هورَه بولمز اونا هر ایت ایده بولمز مرعوب
دشمنین قهریم اودی یاندورار ایلر منکوب
قهریمون شهرتی ... اولی مقهوری اوغول (2)
ــــ
(1) در کتاب این مصرع چنین بود : کوره گونده گوزیمون نوری بو خنجر ویرانون؟؟
(2) در کتاب همینطور `... ” تایپ شده بود.
- دوشنبه
- 31
- تیر
- 1398
- ساعت
- 13:34
- نوشته شده توسط
- ابوالفضل عابدی پور
- شاعر:
-
سعدی زمان سیدرضا حسینی
زینب