ای گؤزوم بولوط کیمین بو مجلس عزاده آغلا
جان وئرن جوانلیقیندا حضرت جواده آغلا
حضرت جواده آغلا
.
.
امّ فضل، زهری وئردی بو امامه اؤز ائوینده
حضرته ایشیقلی گوندوز دؤندی شامه اؤز ائوینده
ایسته دی سو حسرتیله باخدی جامه اؤز ائوینده
زهر اودوندا پارچالانمیش اؤدلانان فؤاده آغلا
حضرت جواده آغلا
.
.
آغلیان غمِ جواده، مستحب عبادت ایلور
کاظمینی یاده سالسا ایله بیل زیارت ایلور
آغلا صدقیله کی مهدی، مجلسه نظارت ایلور
ناله ائت شکسته نی تک گل فغان و داده آغلا
حضرت جواده آغلا
.
.
هر آتانین اوغلو ئولسه غمده نی کیمین سیزیلدار
بو جوان ئولن امامه هر جوان حزین سیزلدار
فکر ائله آتاسی قؤیموش قؤینونا الین سیزیلدار
سنده سینه وور ادبله محضرِ رضاده آغلا
حضرت جواده آغلا
.
.
یاده سالدی جان وئرنده بو امام ، امام حسینی
ئولدوروبله سو یانیندا لشکر ظلام حسینی
سنده سو ایچنده یاد ائت شاه تشنه کام حسینی
گئت تخیّل عالَمیله دشت کربلاده آغلا
سال حسینی یاده آغلا
.
.
قانلی مقتل ایچره بیر باخ اُول یارالی پیکرینه
خشک اولان سوسوزلوقوندان پاره پاره لبلرینه
ساربانه لعنت ایله ال تاپوبدی اللرینه
ذبح اولوب باشی قفادن باشه وور مناده آغلا
سال حسینی یاده آغلا
.
.
بارها گئدوب گؤروبسن «قنبری» او غم دیاری
چوخ زیارت ایلیوبسن آلتی گوشه لی مزاری
ساخلا سینون اوسته دائم بو مدال افتخاری
گل «بشیر»یله نوایه فرصتِ بُکاده آغلا
سال حسینی یاده آغلا
- سه شنبه
- 1
- مرداد
- 1398
- ساعت
- 11:36
- نوشته شده توسط
- ابوالفضل عابدی پور
- شاعر:
-
سیدبشیر حسینی میانجی
ارسال دیدگاه