احرار عالمین نسَبی بس جلیل اولار
آزاده لیق مقامی بو فعله دلیل اولار
.
.
قلبین کمال و منزلتی ساده لیق دادی
رمز صفاسی دهریده دلداده لیق دادی
احراره منتسب شرف ، آزاده لیق دادی
آزاده لیق کمالیله توأم عَدیل اولار
.
.
دلبر همیشه ناز ائدر اولسون انیس یار
طنّاز اولار کی جلب ائده افکاری آشکار
اما نه قدر صید ایلیه طعمه و شکار
دلداده اولماسا گونی گوندن ذلیل اولار
.
.
چوخلار غرور و نخوتیلن اخذکام ائدوب
حُبّ مقام و منصب خاطر قیام ائدوب
بیرعزت مَجاز تاپوب فکر خام ائدوب
فکرائتمیوب بو دهریدن آخر رحیل اولار
.
.
ناپاک قلبیلر گوره سن گه جلا تاپار
بعضی سی توبه بابینه راه رجا تاپار
آخر نفس ده نور ولادن صفا تاپار
دوشسه قلوبه نور ولایت ، شکیل اولار
.
.
جانلار فدادی حرِّ یزید ریاحیه
فکروعقیده سینده چاتوب بیردو راهیه
تا گوردی ارجحیّت ِ نوری سیاهیه
درک ائتدی اجر رهروعزت جزیل اولار
.
.
مرکبدن آتدی توپراقین اوسته ئوزون اودم
تا خیمه گه،سوروندی یوزاوسته اومحتشم
تا یتدی خیمیه دئدی ای شاه ذوالکرم
عفو گدا جلالت شاهه دلیل اولار
.
.
گلدیم بو بارگاهه ولی چوخدی واهمه
شاها تقبّل ایله منی باخ گواهیمه
بیر ایت حساب ائله منیده یابن فاطمه
ایتدن اگرچه نفس پلیدیم رذیل اولار
.
.
گلدیم بو بارگاهه آقا سینه داغلیام
چوخ بی لیاقتم اودی کی دیده باغلیام
وئرسن اجازه تا نفسیم واردی آغلیام
گوزیاشی سیل ائدم قاپیوا سلسبیل اولار
.
.
مولا نوای خیمه لریندن خجالتم
قلبینده آه پر شرریندن خجالتم
والله او خوردا صود امریندن خجالتم
جانیم فداده اولسا بو یولدا قلیل اولار
.
.
دشمن خیال ائدور کی من اوهامه دوشموشم
درک ایله مور کی جامۀ احرامه دوشموشم
زنجیر زلف اکبریلن دامه دوشموشم
اکبر یولوندا حرِّ جفاگر قتیل اولار
.
.
ای شاهکار خلقت و آلاف ذوالمنن
ایستور شرار عشقه یانا حرّ ممتحن
بو باش سنون بوجاندا سنون سرور زمن
یانسام بو نار غمده وجودیم خلیل اولار
.
.
خارم تحمل ایله مجاور بوداقیوا
گلخند مرحمت اوتورا تا دوداقیوا
آیا روادی شه قاپوسیندان گدا قووا؟
مخصوص او شه کی جدّی نبیِّ نبیل اولار
.
.
قلبیم یانور منیله حسین جان یانیشگیلن
بو روسیاهیلن گل ِ زهرا باریشگیلن
سن بیل رقیّه وین جانی منلن دانیشگیلن
یول وئرمه سن جان بوبدندن رحیل اولار
.
.
گلدی او دم قباقه سلیمان کربلا
آغوشه چکدی حرّی دئدی لا اَسِف اخا
آزاده لیق حقوقینی سن ایله دون ادا
آزاده قالسا کنج قفسده علیل اولا
.
.
سالما باشون اشاقه ایا حرّ خونجگر
وار مرتضایه نسبتیم عالم بونی بولر
قووماز گدانی ئوز قاپوسیندان علی چیلر
خاصه او کس عیار گوناهی ثقیل اولار
.
.
خوش گلدون عرصۀ خطره غملی زاهدیم
یتمیش بیر اولدی رزمگه ایچره مجاهدیم
اولما ملول قوزا باشون حقدی شاهدیم
توبه ن قبولیدور گنهون گر طویل اولار
.
.
وار«شهریار» و«واحد» اگر«صائب» اولماسا
«زرین قلم» حیاتیده دی «تائب» اولماسا
هر امر اولور اولا ، دایانار نائب اولماسا
بیرکس ولی دئمز کی«مُصیّب»،«دخیل» اولار
- سه شنبه
- 1
- مرداد
- 1398
- ساعت
- 11:45
- نوشته شده توسط
- ابوالفضل عابدی پور
- شاعر:
-
محمد علی مصیبی
ارسال دیدگاه