خوشا بو رتبه و قدر و مقامه ای حجّاج
که وار باشوزدا سیزون لطف کبریادن تاج
.
خدای کعبه وئروبدور سیزه اوقدر عزّت
که لطفیله سیزی اوز بیتینه ائدوب دعوت
.
آتان زمانیده اول آستار کعبیه ال
بیزیمده عرضیمیزه ایلیون او وقته عمل
.
وئرون خدانی قسم کعبه نین جلالتینه
بیزیده ایسته سون اوز بیتینون زیارتینه
.
بیزه که اولموری قسمت گئدک او بیت خدا
خلوصیله ائدیروک سیزدن التماس دعا
.
طواف بیت خداده بیزیده یاده سالون
مقام سعی و صفاده بیزیده یاده سالون
.
ائدن زمانیده سیز امتثال امر جلیل
خلیل تک او مناده بیزیده یاده سالون
.
گورنده حضرت ختم رسالتین قبرین
همین او عالی بناده بیزیده یاده سالون
.
بهشت روح فزادور او روضه پر نور
بهشت روح فزاده بیزیده یاده سالون
.
ائدنده فاطمه قبرین زیارت اوچ یرده
کناره قبر خفاده بیزیده یاده سالون
.
امام اربعه نون قبرینی گورن وقته
گلنده ناله و داده بیزیده یاده سالون
.
اوپنده شامیده قبر جناب زینبدن
او کاخ جلوه نماده بیزیده یاده سالون
.
گورنده خیردا مزارین رقیّه خاتونون
اولاندا آه و نواده بیزیده یاده سالون
.
اولاندا شاه نجف بارگاهینه داخل
حضور شیر خداده بیزیده یاده سالون
.
چخاتمیون بیزی هئچ بیر مقامده یاددان
خصوص قبر زهراده بیزیده یاده سالون
- پنج شنبه
- 3
- مرداد
- 1398
- ساعت
- 12:30
- نوشته شده توسط
- ابوالفضل عابدی پور
- شاعر:
-
مرحوم ناصر اردبیلی
ارسال دیدگاه